መነሻ ገጽ - ሌሎች አምዶች - ማህበራዊ ጉዳዮች - ዲያስፖራ - በአሜሪካ ኢትዮጵያውያንን ያሰባሰበ ሸንጐ
Buy Valtrex Online Buy Albuterol inhaler Online Buy Prinivil Online
21 July 2013 ተጻፈ በ 

በአሜሪካ ኢትዮጵያውያንን ያሰባሰበ ሸንጐ

ኢትዮጵያውያን፣ ትውልደ ኢትዮጵያውያንና የኢትዮጵያ ወዳጆች በአሜሪካ ምክር ቤት በሬይበርን ሃውስ የተሰባሰቡት የቀድሞው የአፍሪካ አንድነት ድርጅት የአሁኑ የአፍሪካ ኅብረት የተመሠረተበትን 50ኛ ዓመት የወርቅ ኢዮቤልዩ በዓል ለማክበር ነበር፡፡

ሰኔ 20 ቀን 2005 ዓ.ም. የተካሄደውን መድረክ ያዘጋጀውን የኢትዮጵያ ጉባኤ ሸንጐ (The Congressional Ethiopia Caucus) ጠቅሰው አቶ ሳምሶን ደምሴ ተፈራ ለሪፖርተር በላኩት መግለጫ እንደተመለከተው፣ መድረኩ የተዘጋጀው ለአፍሪካ ዕድገት መሠረት የሆነውን የአፍሪካ አንድነት ድርጅት 50ኛ ዓመት የወርቅ ኢዮቤልዩ ለማክበርና አፍሪካ ኅብረት ተብሎ መጠራት ከጀመረ ወዲህ ያለውን ሚናና ያሳየውን ዕድገት ለመዘከር ነው፡፡

የኢትዮ - አሜሪካ ማኅበረሰብ መሠረታዊ ጉዳዮች ላይ ድምፅ ለማሰማትና በኢትዮጵያና በአሜሪካ መካከል ያለውን ግንኙነት ለማጠናከር የተመሠረተው ሸንጐ ባዘጋጀው መድረክ፤ የቀዳማዊ ኃይለ ሥላሴ የልጅ ልጅ ልዑል ኤርሚያስ ሳህለ ሥላሴ ኃይለ ሥላሴ፣ በቀዳማዊ ኃይለ ሥላሴ ዘመን ውጭ ጉዳይ ሚኒስትር የነበሩትና ለአፍሪካ አንድነት ድርጅት መመሥረት የሞኖሮቪያና የካዛብላንካ ቡድኖችን በማቀራረብ ታላቅ ሚና የተጫወቱት አቶ ከተማ ይፍሩ ልጅ አቶ ሙሉጌታ ከተማ፣ እንዲሁም የአሜሪካ ምክር ቤት አባል የሆኑት ሚስተር ማይክ ሆንዳ ተካፋይ ነበሩ፡፡

መድረኩን በንግግር የከፈቱት ሚስተር ማይክ ሆንዳ አፍሪካ በሌላው ዓለም ፊት ኃይሏን ልታሳይ የምትችለው በራሷ በሕዝቦቿ ስትመራ መሆኑን ተናግረዋል፡፡

የአፍሪካ መፃኢ ዕድል ብሩህ ሊሆን እንደሚችል የገለጹት ሚስተር ሆንዳ ለዚህም ወጣት ኢንተርፕሩነሮቿ፣ እያደገ የመጣው የሠራተኛ አቅም እንዲሁም የአህጉሪቷ ፀጋ የሆነው ያልተነካ የተፈጥሮ ሀብት ትልቁን ሚና እንደሚጫወቱ አክለዋል፡፡

የሸንጐው መሥራችና ተባባሪ ኃላፊ እንዲሁም የአሜሪካ ምክር ቤት አባል የሆኑት ሚስተር ሆንዳ ከኢትዮጵያ መንግሥት፣ ከሲቪል ሶሳይቲ ድርጅቶች፣ ከማኅበረሰብ መሪዎች፣ ከወጣት ኢትዮጵያውያን እንዲሁም ከትልቋ አፍሪካ ጋር አብረው እንደሚሠሩም ተናግረዋል፡፡

ልዑል ኤርሚያስ ሳህለ ሥላሴ ኃይለ ሥላሴ፤ የአፍሪካ አንድነት ድርጅት በአብዛኛው ሲተች ቢሰማም ከትችቱና አከራካሪ ጉዳዮች ባሻገር እያበበ መምጣቱን ገልጸዋል፡፡ አያይዘውም፣ ‹‹ዓለም በተለይም አፍሪካ ባለፉት ሃምሳ ዓመታት ዕድገት አስመዝግበዋል፡፡ ድርጅቱ የተመሠረተበት ዋና ጉዳይ [አፍሪካን አንድ ማድረግ] አሁንም አልተሳካም ነው፡፡ አሜሪካ 54 ግዛቶችን በማሳተፍ እውነተኛ አህጉራዊ አቅም ለመፍጠር እንደቻለችው ሁሉ የአፍሪካ ኅብረትም [አፍሪካን አንድ ለማድረግ]  ቀደምቶቹ የጣሉት መሠረት አቅም ይሆነዋል፤›› ብለዋል፡፡  

ለአፍሪካ አንድነት ድርጅት መመሥረት 32 የአፍሪካ አገሮች ለተጫወቱት ሚና እንዲሁም ለደቡብ ሱዳን መመሥረትና ለአፍሪካ ኅብረት መጠናከር የቀድሞው ጠቅላይ ሚኒስትር መለስ ዜናዊ ለነበራቸው አስተዋጽኦም ምስጋና አቅርበዋል፡፡

በቀዳማዊ ኃይለ ሥላሴ ዘመን የውጭ ጉዳይ ሚኒስትር የነበሩት የአቶ ከተማ ይፍሩ ልጅ አቶ ሙሉጌታ ከተማ፣ አባታቸው አቶ ከተማ አፍሪካን ለሁለት በወጠሩት የሞኖሮቪያና የካዛብላንካ ቡድኖች መካከል የነበሩ ልዩነቶችን በማጥበብና ወደ አንድ አቅጣጫ በማምጣት እንዲሁም ድርጅቱን ለመመሥረት የነበሩ እንቅፋቶችን በመጥረግ ሁለቱም ቡድኖች ያደረጉትን ሚና አውስተዋል፡፡

በአሜሪካ በተካሄደው መድረክ አሜሪካና ቻይና በአፍሪካ ላይ ያላቸውም ሚና ተነስቶ ነበር፡፡ አፍሪካ በተለይም በአዲሱ ሚሌኒየም ከቻይና ጋር ያላት ትስስር ጐልብቷል፡፡ አሜሪካ በፖለቲካም ሆነ ኢኮኖሚ ያላት መሪነት በአፍሪካ ብቻ ሳይሆን በተቀሩትም አገሮች እያሽቆለቆለና በቻይናና በሌሎች አገሮች እየተሳበ መጥቷል፡፡

የአፍሪካ ኢኮኖሚ በቻይና ላይ እያደላ መምጣትና ቻይና ለአፍሪካ ልማት የምታደርገው ድጋፍ አፍሪካ ከአሜሪካና ከምዕራቡ ዓለም ጋር ያላት ግንኙነት እየቀነሰ እንዲመጣ አድርጓል፡፡ ሆኖም አሜሪካ ለአፍሪካ በኢኮኖሚያዊና ፖለቲካዊ አመራር ዘርፍ የምትሰጠውን ድጋፍና ትብብር ዋጋ ማሳጣት ስህተት መሆኑ ተወስቷል፡፡

የአፍሪካ ኅብረትም ከቻይና ይልቅ በአሜሪካና በአውሮፓ የተፈተሹ የፖለቲካና የኢኮኖሚ ግንኙነቶችን ለመፍጠር መነሳሳት አለበትም ተብሏል፡፡ እንደ ቻይና የመሳሰሉ አገሮች የፖለቲካ አመራር ችግር ስላለባቸው ለአፍሪካ ኅብረት የወደፊት አቅጣጫ ጥሩ አይሆኑም፡፡ አሜሪካ ግን በአፍሪካ አፍሪካ ልማት ባንክን ጨምሮ የተለያዩ ተቋማትን በማጠናከርና በአፍሪካ መሠረታዊ ለውጥ የሚያመጡ ተቋማዊ ድጋፎችን በማጠናከር ጭምር ልትረዳ ትችላለች ተብሏል፡፡

የቀድሞው የአፍሪካ አንድነት ድርጅት የዛሬው አፍሪካ ኅብረት 50ኛ ዓመት ኢዮቤልዩ በዓል በ2013 በሙሉ የሚከበር መሆኑ ይታወቃል፡፡