መነሻ ገጽ - ሌሎች አምዶች - ማህበራዊ ጉዳዮች - ማህበራዊ - የመጪው ዓመት ተስፋና ሥጋት
Buy Valtrex Online Buy Albuterol inhaler Online Buy Prinivil Online

ዘንድሮ አሮጌ ሆኖ ለማለፍ አዲሱን ዓመት 2006 ዓ.ም. ለመቀበል ሁለት ቀኖች ብቻ ቀርተዋል፡፡ መጪውን ዓመት አስመልክቶ የተወሰኑ ሰዎች ምልከታቸውን እንዲነግሩን ጠየቀናል፡፡

ወይዘሮ ውዳላት ገዳሙ (የማዕከላዊ ስታትስቲክ ሕዝብ ግንኙነት ኃላፊ)

ሁሌም ጊዜዬን በአግባቡ ለመጠቀም የምሞክር ሰው ብሆንም እንደብዙዎች በቅዱስ ዮሐንስ (በአዲስ ዓመት) ታጥቄ ተሰንቄ ነው የምነሳው፡፡ ለራሴ ለቤተሰቤ ለማኅበረሰብ ለአገር የተሻለ ሥራ ለመሥራት፣ ለመጀመር፣ ያላለቀውን ለመጨረስ፡፡ 

መሥሪያ ቤቴ በአጭር ጊዜ በተቀናጀ መልኩ መረጃ እንዲሰጥ ከባልደረቦቼ ጋር እጥራለሁ፡፡ ሕፃናት ይታነፁ፣ ባህልና ወጋቸውን ያውቁ ዘንድ በድርሰት ሥራዎቼ የበኩሌን ለማበርከት ብዕሬን አነሳለሁ፡፡ 

የግድ ዱሮ በሔድንበት መንገድ የግድ እንሒድ ባይባልም ዘመናዊነት የመተጋገዝና የመጠያየቅ ማኅበረሰባዊ እሴታችንን እንዳያጠፋው መጠንቀቅ አለብን፡፡ የመጠያየቅ የመረዳዳት እሴታችን በማግኘት በማጣት የሚሻር አይደለም፤ መሠረቱ ፍቅር ነውና፡፡ 

ብዙ ጊዜ በተለያዩ አጋጣሚዎች እንደምናገረው በመጪው ዓመት መቀየር አለበት የምለው የሥራ ባህላችን ነው፡፡ ስንፍና ያለብን ይመስለኛል፡፡ በተለይም ጊዜው የተለያዩ ዕድሎች ያሉበት እንደመሆኑ ወጣቱ ጊዜውን ለአገርና ለወገን የሚበጅ ነገር ላይ ማሳለፍ አለበት፡፡ ዕድሜያችን በጣም አጭር ነው፡፡ ነገር ግን ጊዜያችንን በአግባቡ ለመጠቀምና ለኅብረተሰቡም ለአገር ጠቃሚ የሆነ ሥራ በመሥራት ሞትን መቅደም ይቻላል ብዬ አምናለሁ፡፡ 

**************

አትሌት ገብረ እግዚአብሔር ገብረ ማርያም

አገራችንን በኢኮኖሚ፣ በማኅበራዊ ዘርፍ በዴሞክራሲም የተሻለ ለማድረግ እየተፍጨረጨርን እየተንጠራራን ነው፡፡ በብዙ መልኩ ብዙ ጥሩ ጅምሮች አሉ፡፡ ይህ ሊበረታታ ይገባል፡፡ ገጽታችንን የመገንባት ጅምሮችም አሉ፡፡ እነዚህም ጅምሮች ሊቀጥሉ ይገባል፡፡ ይህ ሁሉ ቢሆንም ግን ኅብረተሰቡ ከታየው ዕድገት ተጠቃሚ እንዲሆን ብዙ ሊሠራ ይገባል፡፡ ምክንያቱም በተለያየ መልኩ መሻሻሎች ቢኖሩም ሕዝቡ ገና ተጠቃሚ አልሆነም፡፡ 

የኢትዮጵያ ሕዝብ አንድነት በጠንካራ መሠረት ላይ የተጣለ ቢሆንም በተለያየ መልኩ አንድነታችንን ለማላላት የሚንቀሳቀሱ ኃይሎች መኖር ያሰጋኛል፡፡ ስለዚህ መጪው አዲስ ዓመት ይበልጥ መልካም ነገሮች የምናይበት ይሆን ዘንድ አንድነታችንን ይበልጥ ልናጠነክር ይገባል፡፡ 

*****************

አቶ ኢየሱስወርቅ ዛፉ (የሕብረት ኢንሹራንስ ቦርድ ሊቀመንበር)

ማንኛውም መካከለኛ ኢትዮጵያዊ እንደሚመኘው የምመኘው ሰላምና የተሻለ ዕድገትና ልማት ነው፡፡ ከመንግሥት በኩል እስካሁን ድረስ ካደረገው በተሻለ የማድመጥ ፍላጎት ብቻም ሳይሆን የማዳመጥ ድፍረት እንዲኖረው እፈልጋለሁ፡፡ መንግሥት አያዳምጥም፡፡ የማዳመጥ ድፍረት ያስፈልገዋል ብዬ አምናለሁ፡፡ የራሳቸውን ድምፅ መስማት ነው የሚፈልጉት፡፡ አሁን ሊያደምጥ የሚገባውን ያህል እያዳመጠ አይደለም፡፡ 2006 ዓ.ም. ጨለምተኛ አይሆንም፡፡ እኔ በምፈልገው መንገድም አይቀጥልም፡፡ ጨለምተኛም አይደለሁም፡፡ በምመኘው ደረጃ ብሩህ ይሆናል ብዬ ባላስብም ብሩህና የተሻለ እንዲሆን እፈልጋለሁ፡፡ 

ሌሎች የሚሉትን ማዳመጥ ያስፈልጋል፡፡ በአሁኑ ጊዜ ያለማዳመጥ ወይንም ስህተት ሲፈፀም ስህተትን በስህተት የመሸፈን አዝማሚያ አለ፡፡ ሁለት ስህተት ደግሞ አንድ ትክክለኛ ነገር ሊያመጣ አይችልም፡፡ 

*************

ገብሩ አሥራት (የመድረክ አመራር አባልና የኣረና ትግራይ ሊቀመንበር)

ኢሕአዴግ የዱሮውን ሌጋሲ (ውርስ) እንከተላለን እያለ ነው፡፡ ሌጋሲው ደግሞ የፖለቲካ ምህዳሩን የሚያጣብብ ከአሁን በፊት የወጡ አፋኝ አዋጆችን እንዲቀጥሉ የሚያደርግ ነው፡፡ በተለይ ተቃዋሚ ፓርቲዎችን በተቃዋሚነት ፈርጆ ለማሳደድ ለመቅጣት የሚፈልግ ነው፡፡ 

የቆየውን ሌጋሲ እናስቀጥላለን እስካላሉ ድረስ የፖለቲካ ምህዳር መስፋት፤ ፖለቲካዊ ማኅበራዊና ኢኮኖሚያዊ ችግሮች የመፍታት አቅጣጫ ብዙም የምጠብቀው አይደለም፡፡ ምክንያቱም የዚህ ምልክት እንኳ የለም፡፡ ገዢው ፓርቲ አመራሩም እንደገና ነገሮችን ከመምጣት ይልቅ ይበልጥ ኅብረተሰቡን ለመቆጣጠር የሚያስችሉ ደረጃዎችን እያወጡ ነው፡፡ ሕዝቡ በአንድ ለአምስት ተደራጅቶ በአንድ እስትንፋስ እንዲተነፍስ በአንድ አስተሳሰብ ወደገዢው ፓርቲ እንዲሔድ ጫና እያደረገ ነው፡፡ ያም ሆኖ ሕዝቡ ነፃነት መብቱ እንዲከበር ሕገ መንግሥቱ እንዲከበር፣ መልካም አስተዳደር ይፈልጋል፡፡ በመንግሥት በኩል ችግሮችን ከመሠረቱ የመፍታት አቅጣጫ እየታየ ስላልሆነ ከገዢው ፓርቲ በ2006 ዓ.ም. የምንጠብቀው ነገር የለም፡፡ 

በ2005 ዓ.ም. ላይ በዚህች አገር መግባባት አለ ቢልም መግባባት አልተፈጠረም፡፡ በሃይማኖት በኩል ችግር እየታየ ነው፡፡ የኢትዮጵያ ችግር በማያባሩ ስብሰባዎችና ፕሮፖጋንዳዎች የሚፈታ አይደለም፡፡ መሠረታዊ የሆኑ ጉዳዮች ላይ ኢሕአዴግ ከኢሕአዴግ ጋር ብቻ ሳይሆን ከሕዝቡና ከተቃዋሚ ፓርቲዎች ጋር መግባባት ላይ መድረስ አለበት፡፡ የእኛ ፍላጎት የአገራችን ሕገ ደንብ ተከብሮ፣ ሕዝቡ ነፃነት አግኝቶ አገራዊ መግባባት ላይ እንድንደርስና ፖለቲካውንና ኢኮኖሚውን የተቆጣጠረው ኢሕአዴግ አካሄዱን እንዲለውጥ እንመኛለን፡፡ 

*****************

አርቲስት ጸጋዬ እሸቱ

በ2006 ዓ.ም. ይሳካ ወይም ይሁን ብዬ የማስበው እያንዳንዱ ዜጋ በጐ የሚያስብበትና ለሚቀጥለው ትውልድ ጥሩ ነገር አስቀምጦ ሊያልፍ የሚችልበትን ከላይ ከሚመሩን ጀምሮ እስከታች ያለነው ቀና የምናስብበት ዘመን እንዲሆን ነው፡፡ ብዙ ጊዜ የምንነሳው ከመጥፎ ነገር ነው፤ ይህ ተጀመረ፣ ሊሠራ ነው ሲባል ከጥሩው አመለካከት የምንነሳበት ዘመን ቢሆን እሻለሁ፡፡ በሙያችን ዙሪያ ሙያውን በአግባቡ ልንሠራ የምንችለው ቀና አመለካከት ሲኖረን ስለሆነ፤ ጥበብም ፍቅርና ጥሩ ማሰብ ስለሆነ ፍቅርን በፍቅር የምንገልጽበት ዘመን እንዲሆን እፈልጋለሁ፡፡ የኢትዮጵያ ድምፃውያን ማኅበር ለሙያተኞቹ መልካም የሥራ ዘመን ለኢትዮጵያ ሕዝብ ደግሞ መልካም የሚታሰብበት ዘመን እንዲሆን ይመኛል፡፡

*****************

ደራሲ ተሾመ ብርሃኑ ከማል

እንደ አገር ኢትዮጵያ ሰላም የሰፈነባት እንድትሆን እመኛለሁ፡፡ ሁላችንም ታጥቀን ብንሠራ በ2005 ዓ.ም. ያየናቸው በሃይማኖትና በፖለቲካ በኩል ያሉ ተቃርኖዎች ይወገዳሉ፡፡ ልዩነቶች እንዳሉ አብረን ልንሠራ እንችላለን ብለው ከተነሱ እኔ ብቻ ሳልሆን እነሱም ትክክል ናቸው የሚል ሐሳብ እንዲመጣና 2006 ዓ.ም. ልማታችንን የምናፋጥንበት እንዲሆን እፈልጋለሁ፡፡ አንተም በእኔ መንገድ መጓዝ አለብህ የሚል አመለካከት በፖለቲካው በሃይማኖቱም ይስተዋላል፡፡ 

ሁሉም አንድነትን ይፈልጋሉ፣ ሆኖም አንድነቱን የሚፈልጉት ልዩነታቸውን አቻችለው ሳይሆን በራሳቸው መንገድ ብቻ ነው፡፡ ይህ ደግሞ ሰላማችን እንዲረበሽ የሚያደርግ አመለካከት ነው፡፡ ሰው መሆናችን፣ በፈጣሪ ማመናችን፣ መስገዳችን፣ አብረን መማራችን፣ አብረን ውኃ መጠጣታችንና ሌሎችም አንድ ያደርጉናል፡፡ በ2006 ዓ.ም. ሁሉም የብሔር ብሔረሰብ፣ የፖለቲካ፣ የእምነትና ሌሎች ልዩነቶችን አቻችሎ እንዲሠራና ዓመቱን የለውጥ ቢያደርግ እመኛለሁ፡፡

************

ወይዘሮ ዘሚ የኑስ

አገራችን ዕድገት ላይ ነች፣ ታድጋለችም፡፡ ጊዜው የእኛ የዕድገት ነው፡፡ ሁሉም ነገር ሒደት አለው ብዬ አምናለሁ፡፡ ስለዚህም አስቸጋሪው ሁኔታ ታልፎ ዕድገት ላይ እንደሆንን ይሰማኛል፡፡ ይህን ማንም ወደ ኋላ አይመልሰውም፡፡ ስለዚህ የበለጠ ዕድገት የአዲስ ዓመት ተስፋዬ ነው፡፡

በፖለቲካ ልዩነት፣ ከሃይማኖት ጋር በተያያዘ ያለውን ነገር ትኩረት ሰጥተን ትልቅ ሥራ ካልተሠራ ነገሩ ያስገኛል፡፡ በፖለቲካና በሃይማኖትም ልዩነቶች ይኖራሉ፡፡ ነገር ግን ቁጭ ብሎ በመነጋገር ኢትዮጵያ አገራችን አንድ መሆኗን በማሰብ መስማማት ላይ መድረስ እንደሚቻል አምናለሁ፡፡ በመጭው ዓመት ለዚህ ጉዳይ ከፍተኛ ትኩረት ተሰጥቶ በአገር ውስጥ በውጭ አገር ያለው ኢትዮጵያዊ ተነጋግሮ መግባባት ላይ እንዲደረስ ምኞቴ ነው፡፡

****************

ወጣት መድኃኔ መለሰ (የአዲስ አበባ ወጣቶች ማኅበር ፕሬዚዳንት)

ወጣቱ በተለያየ መንገድ እየተጠቀመ ነው፡፡ ይህ ደግሞ በመጭው አዲስ ዓመትም ይቀጥላል ብዬ አምናለሁ፡፡ አዲስ ዓመት ስለመጣ ሳይሆን ሁሌም ጨለምተኛ አመለካከትን ወደ ጐን በመተው በነገሮች ላይ ተስፋ ማድረግን መምረጥ አለብን፡፡

የወጣት ሥራ አጥነት፣ የኑሮ ውድነትም አለ፡፡ ይህ ግን በአገሪቱ አጠቃላይ ሁኔታ አዎንታዊ ለውጥ በመኖሩ በተስፋና በጽናት ውስጥ ሆኖ መሥራት የሚለውጥ ነው፡፡ በመጪው ዓመት እንደ ተግዳሮት የምመለከተው የወጣቱ ፍላጐት ሰፊ፤ የወጣቱ ቁጥርም ብዙ በመሆኑ ካለንበት ተጨባጭ ሁኔታ አንፃር ለሁሉም ፍላጐት ምላሽ መስጠት አለመቻሉን ነው፡፡   

***************

አምባሳደር ዲና ሙፍቲ (የውጭ ጉዳይ ሚኒስቴር ቃል አቀባይ)

የዕድገትና ትራንስፎርሜሽን ዕቅዳችንን ለማሳካት ከ2006 ዓ.ም. ጋር የቀረን ሁለት ዓመት ነው፡፡ ስለዚህ በአብዛኛው በዕቅዱ የተቀመጡት ግቦች ከ60 በመቶ በላይ ይፈጸማሉ ብለን ተስፋ እናደርጋለን፡፡ አገራችን በ2005 ዓ.ም. በተለያዩ መስኮች ከሌሎች አገሮች ጋር የፈጠረቻቸው ግንኙነቶች በኢኮኖሚ፣ በማኅበራዊ፣ በፖለቲካዊና በወታደራዊ ዘርፍ የበለጠ ተጠናክረውና ፍሬያማ ሆነው የሚቀጥሉበት ዓመት ይሆናል ብለን እናስባለን፡፡ በ2005 ዓ.ም. ሕዝባችን ከገጠሙት አንዳንድ ፈተናዎች የሚወጣበት ዘመን እንዲሆን ነው የምንመኘው፡፡ በሕዝባችን መካከል መቻቻል፣ የነበረው የአብሮነት መንፈስ የበለጠ በተጠናከረ ጊዜ እንደሚሆን እንጠብቃለን፡፡ 

በሶማሊያና በሱዳን በ2005 ዓ.ም. ሰላምን ለመፍጠር የተጣሉ መሠረቶች የበለጠ ተጠናክረው የሚሄዱበት፣ በሶማሊያ መንግሥት የሚጠናከርበት፣ ሁለቱ ሱዳኖች በመካከላቸው ያለውን ልዩነት በሰላማዊ መንገድ የሚፈቱበት እንዲሆንና ከፍጥጫና መናቆር ይልቅ ስለ ትብብር የሚያስቡበት ዘመን እንደሚሆን እናስባለን፡፡ 

የጐረቤት አገሮች ሰላም ከሁሉም በላይ ከኢትዮጵያ ሰላም ጋር የተሳሰረ ስለሆነ በኬንያና በጅቡቲ ያለው አንጻራዊ ሰላም የበለጠ የሚገፋበት በሁለቱ ሱዳኖችና በሶማሊያ ያለው ውጥረት ወደ ሰላም አዘንብሎ የሚጓዝበት፤ እንደዚሁ ጐረቤት አገሮች ከኢትዮጵያ ጋር ያላቸውን ግንኙነት አጠናክረው የሚሄዱበት እንዲሆን እንመኛለን፡፡ 

ከኢትዮጵያ ጋር ጥሩ ግንኙነት የሌለው የሻዕቢያ አመራርም ልቦናውን ገዝቶ ሰላማዊ ግንኙነት የሚፈጥርበት ካልሆነም በአካባቢው የሚያደርጋቸውን አሉታዊ ተፅዕኖዎች የሚቀንስበት ዘመን እንደሚሆን ተስፋ እናደርጋለን፡፡ 

በዴሞክራሲ ሥርዓታችን የተቃዋሚ ፓርቲዎች መኖር የግድ ነው፡፡ የብዙኀን ፓርቲ ሥርዓት በአገራችን መኖር አለበት እያልን ነው፡፡ ገንቢ ተቃውሞ ይጠበቃል፡፡ ይህ መንግሥት እንዳይባልግ፣ ዴሞክራሲያዊ አስተዳደር እንዲኖር ያደርጋል፡፡ እዚህ ላይ ሁለት ነገሮች አሉ፡፡ ተቃዋሚ ፓርቲዎች አገራዊ በሆኑ ጉዳዮች ላይ ተባብረው መሥራት አለባቸው፡፡ 

ከፓርቲና ከመንግሥትም በላይ የሆኑ አገራዊ ጉዳዮች አሉን፡፡ በአገራዊ ጉዳያችን ዙሪያ መንግሥትም ሆነ ተቃዋሚ ፓርቲዎች አብረው ይሠራሉ የሚል ተስፋ አለን፡፡ አገራዊ ሰላምና ልማትም በዚሁ ደረጃ መታየት አለበት፡፡