መነሻ ገጽ - ሌሎች አምዶች - ማህበራዊ ጉዳዮች - ሴት - እውቅና
Buy Valtrex Online Buy Albuterol inhaler Online Buy Prinivil Online

ብዙዎች በአንድም ይሁን በሌላ መንገድ ለአገራቸውና ለወገናቸው ብዙ ያበረከቱ የሚገባቸውን እውቅና አለማግኘታቸው በርካቶችን የሚያስማማ እውነት ነው፡፡

ነገር ግን ዘግይቶም ቢሆንም በሥራቸውና በአስተዋጿቸው እውቅና የተሰጣቸው አሉ፡፡ ብዙ አበርክተው እውቅና ካልተሰጣቸው ዘግይቶም ቢሆንም እውቅና ከተሰጣቸው መካከል በርካታ ሴቶች አሉ፡፡ ለእነኚህ ሴቶች እውቅናውን የሰጡ አካላት የተለያዩ እውቅና ያገኙበት አስተዋጽኦም የተለያየ ከመሆኑ አንጻር በከፍተኛ የትምህርት ተቋማት እውቅና በተሰጣቸው ሴቶች ላይ ለማተኮር ወደድን፡፡

በያዝነው ዓመት ማብቂያ ላይ ጐንደር ዩኒቨርሲቲ ለዶክተር እሌኒ ገብረመድህን የክብር ዶክትሬት ሰጥቷል፡፡ ዩኒቨርሲቲው ለዶክተር እሌኒ እውቅና የሰጣቸው  በኢኮኖሚው ዘርፍ ባደረጉት ከፍተኛ አዎንታዊ ተጽእኖ ነው፡፡

የሰዎች ለሰዎች ድርጅት መሥራች የሆኑት ካርል ሀይንዝ ባለቤት ወይዘሮ አልማዝ ቦን ጅማ ዩኒቨርሲቲ እውቅና ከሰጣቸው ሴቶች አንዷ ናቸው፡፡ ዩኒቨርሲቲው በ1997 ዓ.ም. ለወይዘሮ አልማዝ የሰጠው የክብር የአካዳሚክ ስታፍ አባልነት እውቅና ሲሆን ወይዘሮ አልማዝን ለእውቅና ያበቃቸው በግብርናው ዘርፍ ያደረጉት ከፍተኛ አስተዋጽኦ መሆኑን በጅማ ዩኒቨርሲቲ የሕዝብ ግንኙነት ኮምዩኒኬሽን ዳይሬክተሩ አቶ መዘምር ሰይፉ ገልጸውልናል፡፡

እንደ ዳይሬክተሩ ገለጻ የክብር አባልነት እውቅና የሚያስገኛቸውና የሚያስከትላቸው ጥቅሞችና ግዴታዎች አሉ፡፡ ይህ እውቅና የተሰጠው ሰው በማንኛውም የዩኒቨርሲቲው ዝግጅት ላይ ይገኛል፣ የዩኒቨርሲቲውን መገልገያዎች የመጠቀም ፈቃድ አለው፣ የዩኒቨርሲቲው ማኅበረሰብ አባልነት መታወቂያም ይሰጠዋል፡፡ በሌላ በኩል ዩኒቨርሲቲው የሚያደርገውን ምርምር በተለያየ መልኩ የመደገፍ፣ ዩኒቨርሲቲው የውጭ ግንኙነቶች እንዲፈጥር ሁኔታዎችን የማመቻቸት፣ የገቢ ማሰባሰብ ሥራዎች ላይ የመሳተፍና በተለያዩ ርእሰ ጉዳዮች ላይ በሚዘጋጁ የውይይት መድረኮች ላይ የማስተማር ኃላፊነት አለበት/ባት፡፡

ዩኒቨርሲቲው በ1999 ዓ.ም. የክብር ዶክትሬት ዲግሪ የሰጣቸው ሴት ደግሞ ወይዘሮ አበበች ጐበና ናቸው፡፡ “ከ25 ዓመት በላይ ለወገን ባደረጉት የላቀ ሰብአዊ አገልግሎት የክብር ዶክትሬት ዲግሪው ሊሰጣቸው ችሏል” ያሉት አቶ መዘምር፣ ዩኒቨርሲቲው ዲግሪውን ከመስጠት አልፎም ሙሉ ወጭውን በመሸፈን ሐውልታቸውን በብሔራዊ ሙዚየም ቅጥር ግቢ ውስጥ እንዲቆም ማድረጉ አስታውሰዋል፡፡

ጅማ ዩኒቨርስቲ 2000 ዓ.ም. ላይ የክብር ዶክትሬት ዲግሪ የሰጣት አትሌት ኮሎኔል ደራርቱ ቱሉ በዓለም አቀፍ መድረክ የአገርን ስም ማስጠራት በመቻሏ፣ እንዲሁም እንደ ጥሩነሽ ዲባባ ያሉ ተተኪ አትሌቶች እንዲወጡ ተጽዕኖ መፍጠር በመቻሏ እውቅና እንደሚገባት አቶ መዘምር ይናገራሉ፡፡  “ለወጣቶችና ለሴቶች አርአያ መሆን ችላለች፡፡ ብዙዎች አትሌቲክሱን እንዲቀላቀሉ ምክንያት ሆናለች፡፡ ተቋማት ደግሞ በአንድም ይሁን በሌላ መንገድ ለአገር ያበረከቱ ሰዎችን እውቅና መስጠት ይገባቸዋል፡፡”

አዲስ አበባ ዩኒቨርሲቲ ያበረከቱትን አስተዋጽኦ ከግምት አስገብቶ እውቅና ከሰጣቸው ታላላቅ ሴቶች መካከል ወይዘሮ ስንዱ ገብሩ፣ ንጋቱ ከልካይ፣ አውስትራሊያዊቷ የማሕጸንና የጽንስ ስፔሻሊት ዶክተር ካትሪን ሀምሊንና ኬንያዊቷ ዋንጋሪ ማታይ እንደሚገኙበት ከዩኒቨርሲቲው ኮምዩኒኬሽን ቢሮ ያገኘነው መረጃ ያመለክታል፡፡

ወይዘሮ ስንዱ በጣልያን ወረራ ወቅት በአርበኝነትና ባደረጉት ትግል፣ የመጀመሪያዋ ሴት የፓርላማ አባልና (የሕግ መምሪያ ምክር ቤት ምክትል ፕሬዚዳንት) በመሆን ለሴቶች መብት መከበር ላደረጉት ታላቅ አስተዋጽኦ እውቅናው ተሰጥቷቸዋል፡፡ ወይዘሮ ስንዱ ቋንቋ፣ ታሪክ፣ ጂኦግራፊና ሕግ በስዊዘርላንድ ያጠኑ ሲሆን፣ ወደ ኢትዮጵያ ተመልሰው በመምህርነት አገልግለዋል፡፡ በርካታ መጻሕፍትንም ጽፈዋል፡፡ የወይዘሮ ሥህንና የእቴጌ መነን ትምህርት ቤቶችም ዳይሬክተር ሆነው ሠርተዋል፡፡ እቴጌ መነን ትምህርት ቤትን በዳይሬክተርነት በመምራት የመጀመሪያዋ ኢትዮጵያዊት መሆናቸውንም መዛግብት ይመሰክራሉ፡፡ 

አውስትራሊያዊቷ ካትሪን ሀምሊን ከባለቤታቸው ጋር የፊስቱላ ሕክምና ለመስጠት ወደ ኢትዮጵያ የመጡት በ1960ዎቹ ነው፡፡ የጽንስና የማሕጸን ስፔሻሊቷ ካትሪንና ባለቤታቸው በ1974 ዓ.ም. የፊስቱላ ሆስፒታል በማቋቋም ካለዕድሜ በመውለድና በአስገድዶ መዳፈር ለፊስቱላ የተጋለጡ ብዙዎች ሕክምና ያገኙ ዘንድ የፈውስ በር መክፈታቸው ይታወቃል፡፡ 

በ2002 ዓ.ም. አዲስ አበባ ዩኒቨርሲቲ የክብር ዶክትሬት የሰጣቸው ካትሪን ሀምሊን ዲግሪውን በተቀበሉበት ወቅት ለተመራቂ ተማሪዎች “አገራችሁን አገልግሉ ወደ ሌላ ቦታ አትሂዱ ተስፋም አትቁረጡ” በማለት በአገሪቱ የሚስተዋለውን የተማረ ሰው ኃይል ኩብለላ አስመልክተው ተናግረዋል፡፡

ከሀምሊን ፊስቱላ ሆስፒታል ያገኘነው መረጃ እንደሚያመለክተው ሆስፒታሉ 30ሺሕ የሚሆኑ በፊስቱላ ይሰቃዩ የነበሩ ሴቶችን በ90 በመቶ ውጤታማነት ፈውሷል፡፡ በአሁኑ ወቅት ሆስፒታሉ በዓመት 2,500 ለሚሆኑ ሴቶች የፊስቱላ ቀዶ ሕክምና አገልግሎት ይሰጣል፡፡ በዓመት 50 የሚሆኑ ሴቶች አልጋ ይዘው ሕክምና እንዲከታተሉ ይደረጋል፡፡

ድምፃዊ ንጋቷ ከላካይ ከወጣትነት ጀምሮ ዕድሜአቸው እስከገፋበት ድረስ ለአገሪቱ የኪነጥበብ ዘርፍ ባደረጉት አስተዋጽኦ በ1997 ዓ.ም. ዕውቅና ሲሰጣቸውና የክብር ዶክትሬት ሊበረከትላቸው ችሏል፡፡

አዲስ አበባ ዩኒቨርሲቲ በዚያው ዓመት እውቅና የሰጣቸው ኬንያዊቷ የአካባቢ ጥበቃና ፖለቲካ አቀንቃኝ ዋንጋሪ ሙታ ማታይ ናቸው፡፡ ዋንጋሪ ማታይ ላደረጉት የላቀ አስተዋጽኦ የተለያዩ ዓለም አቀፍ እውቅናዎችን ሲያገኙ የኖቤል የሰላም ሽልማትም ባለቤት ነበሩ፡፡ ኬንያ ውስጥ የተወለዱትና በኬንያና በአሜሪካ ትምህርታቸውን የተከታተሉት ዋንጋሪ ማታይ ሐቻምና ማብቂያ ላይ ከዚህ ዓለም በሞት መየታቸው ይታወሳል፡፡