መነሻ ገጽ - ሌሎች አምዶች - ማህበራዊ ጉዳዮች - ወጣት - የወጣቶች ሥራ አጥነትን መታደግ ያልቻሉት
Buy Valtrex Online Buy Albuterol inhaler Online Buy Prinivil Online
04 September 2013 ተጻፈ በ 

የወጣቶች ሥራ አጥነትን መታደግ ያልቻሉት

‹‹የንግድ ድርጅቶች ብሔራዊ ኃላፊነት ተሰምቷቸው ሥራ ለሚፈልጉት በርካታ ወጣቶች ምን እያደረጉ ነው? ምንስ ሊያደርጉ ይገባል?›› በሚል የተንደረደረ ጥናት የቀረበበት መሰናዶ ባለፈው ዓርብ በማኅበራዊ ጥናት መድረክ (ማጥመ) ቀርቦ ነበር፡፡

ማጥመ፣ ‹‹ወጣትና ልማት›› በሚል ዐቢይ ርእስ በተከታታይ በሚያካሂደው ሕዝባዊ ውይይቱ ላይ በርእስነት የቀረበው ‹‹ወጣቱና የንግድ ድርጅቶች ማኅበራዊ ኃላፊነት›› የሚል ነው፡፡ ጥናታዊ ጽሑፉን ያቀረቡት በንግድ ነክ ጉዳዮች የማማከር ሥራ ላይ የተሰማሩት የቀድሞው የኢትየጵያ ንግድ ምክር ቤት ዋና ጸሐፊ አቶ አንዱዓለም ተገኝ ናቸው፡፡ 

የአቶ አንዱዓለም ጥናት የሚያጠነጥነው የንግድ ድርጅቶች ማህበራዊ ኃላፊነት ላይ እና ወቅታዊ የሆነው የወጣቱ ችግር የሥራ ዕድል ማጣት በመሆኑ ድርጅቶች በጉዳዩ ላይ የሚኖራቸው ማህበራዊ ኃላፊነትን በተመለከተ ነው፡፡ 

‹‹በአገራችን የወጣቱ ትውልድ ብዛት እጅግ በከፍተኛ ፍጥነት እየጨመረ ይገኛል፡፡ በዚያው ልክ የሥራ አጥነት ችግሮች ይስተዋላሉ፤›› ያሉት አቶ አንዱዓለም፣ የዓለም የቢዝነስ ካውንስል ማብራሪያን በመጠቀም የንግድ ድርጅቶች ሥራ አጥነትን ከመቀነስ አኳያ ማህበራዊ ኃላፊነት እንዳለባቸው ጠቅሰዋል፡፡ ቀጥለውም እንዳስረዱት ከሆነ አንድ ድርጅት የአካባቢውንና የኅብረተሰቡን የአኗኗር ሁኔታን በሚያደርገው የቅጥር ሒደት ለማሻሻል አስተዋፅኦ እንደሚያደርግ ገልጸዋል፡፡ 

‹‹የንግድ ድርጅቶች ማኅበራዊ ኃላፊነት›› የሚለው  ጽንሰ ሐሳብ ሰፊና በውስጡ የተለያዩ ጉዳዮችን እንዳካተተ የገለጹት ጥናት አቅራቢው የኩባንያ አመራር፣ የሠራተኞች አያያዝና አስተዳደር፣ የአመራር ሥነ ስርዓት፣ የኮርፖሬት ማኅበራዊ ሥነ ምግባር፣ የቢዝነስና የአካባቢ ሥነ ምግባር እንዲሁም የሙስና ችግርንና የመሳሰሉትን ነጥቦችንም አጠቃሎ የሚይዝ ሐሳብ እንደሆነ ተናግረዋል፡፡  

‹‹የንግድ ድርጅቶች ማህበራዊ ኃላፊነት አለባቸው ወይስ የለባቸውም?›› የሚለውን ጥያቄ ያነሱት አቶ አንዱዓለም፣ ባለፉት ዘመናት በተለያዩ ምሁራን አንድ ድርጅት ማህበራዊ ኃላፊነት አለበት ወይስ የለበትም በሚለው ጥያቄ ላይ ሰፊ ውዝግቦች እንደነበሩ አስታውሰው፣ የተገኙት ምላሾችም ድርጅቶች ኃላፊነት አለባቸው እንዲሁም የለባቸውም የሚል እንደነበር ገልጸዋል፡፡ ‹‹አንድ ድርጅት ማኅበራዊ ኃላፊነት አይኖርበትም›› የሚለውን ሐሳብ የሚያንጸባርቁት ቡድኖች የአንድ የንግድ ድርጅት ማህበራዊ ኃላፊነት የኢኮኖሚ ሥራዎችን በተቀላጠፈ ሁኔታ በማካሄድ ምርቶችን ለኅብረተሰቡ በማቅረብ ከፍተኛ ትርፍ ማስገኘት ብቻ ነው ብለው በማመናቸው  የማህበረሰብ ተግባራትን ለሌሎች የህብረተሰብ ድርጅቶችና ለመንግሥት መተው እንዳለባቸው ይናገራሉ፡፡  

በተቃራኒው ደግሞ ‹‹ድርጅቶች ማህበራዊ ኃላፊነት አለባቸው›› የሚሉት ቡድኖች ደግሞ የንግድ ድርጅቶች የማህበራዊ ችግሮችን ይፈጥራሉና እነዚያን ችግሮች የማቃለልና የመከላከል ኃላፊነት እንዳለባቸውና ድርጅቶች ጠንካራ የማህበረሰብ ተዋናይና የብዙ ሀብት ባለቤት በመሆናቸው ሀብታቸውን ለማኅበረሰቡ አገልግሎት በመስጠት ሊጠቀሙበት ይገባል የሚል እምነት እንዳላቸው አቶ አንዱዓለም ገልጸዋል፡፡ ‹‹በነዚህ ክርክሮች አማካይነት በብዙ የሥነ ጽሑፍ መዛግብትም እንደተጠቀሰው የንግድ ድርጅቶች ማህበራዊ የሆነ ኃላፊነት ሊኖርባቸው የሚገባ መሆኑን ታምኖበታል፤›› በማለት ጥናት አቅራቢው ሁኔታውን አስረድተዋል፡፡ 

 

ስለንግድ ድርጅቶች ማኅበራዊ ኃላፊነት ስልታዊ ትንተና መስጠት የተጀመረው ከ60 ዓመት በፊት እንደሚገመት መረጃዎች እንደሚያሳዩ የጠቀሱት ጥናት አቅራቢው፣ የንግድ ድርጅቶች ማህበራዊ ኃላፊነት ጠቅለል ባለ ሁኔታ ሲታይ የኅብረተሰብ የጋራ ልማት ፕሮግራሞችንና ማኅበራዊ ችግሮችን ለመፍታት መጣር፣ እንደ በጎ አድራጎት ድርጅት ሆኖ መሥራት፣ ለማህበራዊ ግልጋሎቶችና ተግባራቶች ቀዳሚ መሆን መቻል፣  ማህበራዊ ዕርዳታ ለሚያሻቸው ጉዳዮች ስፖንሰር ማድረግ፣ በሰብአዊ ጉዳዮች ላይ ትኩረት ማድረግና ሌሎች ነጥቦችንም አጠቃሎ እንደሚይዝ አስታውሰዋል፡፡ 

ይህም በመሆኑ ድርጅቶች ባለባቸው የማህበረሰባዊ ኃላፊነት አማካይነት የወጣቶችን ሥራ አጥነትን መቀነስ ታላቅ ሚና እንዳለባቸው ለመረዳት ተችሏል፡፡ ይሁንና ተባብሮ ሀብትና ንብረትን አጣምሮ ሠርቶ የመነገድ ባህል አለመዳበር፣ የሥራ ፈጠራ ክህሎትን ይዞ አለመገኘት፣ ቢዝነስን አቅዶ መንቀሳቀስና መሥራት በብዛት ባለመኖር የንግድ ድርጅቶች በአገሪቷ ውስጥ እምብዛም እንዳይስፋፉ ምክንያት ከሚሆኑ ጉዳዮች ውስጥ የሚጠቀሱ እንደሆኑ አቶ አንዱዓለም አስረድተዋል፡፡ 

በአገራችን ያሉ የንግድ ድርጅቶች ወጣቱን ሥራ በማስያዝ፣ በመቅጠር፣ ሥራን በማለማመድና የመሳሰሉትን ነጥቦች በተመለከተ አብዛኛዎቹ ድርጅቶች ማህበራዊ ግዴታቸውን እየተወጡ አይደለም ብሎ መናገር ይቻላል፤›› ያሉት አቶ አንዱዓለም ድርጅቶች በአንድም ይሁን በሌላ ምክንያት የወጣት ሥራ አጥን ቁጥር ከመቀነስና ሌሎች ማህበራዊ ግዴታዎችን ከማከናወን ገታ ያሉ እንደሆነ አያይዘው አብራርተዋል፡፡