መነሻ ገጽ - ፓለቲካ - ‹‹ጅሃዳዊ ሐረካት›› - በጥርጣሬና በጥያቄ መሀል
Buy Valtrex Online Buy Albuterol inhaler Online Buy Prinivil Online
10 February 2013 ተጻፈ በ 

‹‹ጅሃዳዊ ሐረካት›› - በጥርጣሬና በጥያቄ መሀል

ተመስገን ደረጀ በ20ዎቹ ዕድሜ ውስጥ የሚገኝ በአዲስ አበባ የሚኖር ወጣት ነው፡፡

ከአምስት ያህል ጓደኞቹ ጋር ተሰባስበው በአንድ መዝናኛ ክበብ ምሳቸውን ሲበሉ እንደሌላ ጊዜ በሳቅና በጨዋታ ሳይሆን በከፍተኛ ጭቅጭቅ ውስጥ ነበሩ፡፡ በአካባቢያቸው የነበሩ ሰዎች በጉዳዩ ላይ እየተነጋገሩ ባይመስሉም በዚሁ ቡድን ክርክርና ጭቅጭቅ ግን ቀልባቸው የተገዛ ይመስላል፡፡ የሚጨቃጨቁት ደግሞ በፖለቲካ አቋም ወይም በእምነት ምክንያት አይደለም፡፡ ሰሞኑን ከሦስት ጊዜ በላይ በኢትዮጵያ ቴሌቪዥን ‹‹ጅሃዳዊ ሐረካት›› በሚል በተላለፈው ዘጋቢ ፊልም ላይ ነበር፡፡

የታፈነ ድምፅ ለመተንፈስ
ሕዝቡን በስፋት እያነጋገረ ያለው ይኼው ዘጋቢ ፊልም ከአተራረኩ ጀምሮ የተመረጠበት ጊዜና ከሌሎች ዓለም አቀፍ የሽብር ተግባራት ጋር እንዲተሳሰር የተደረገበት ምክንያት ‹‹እውነት ነው››፣ ‹‹ውሸት ነው›› በሚል በሁለት ጎራ እያከራከረ ነው፡፡ አብዛኛዎቹ አስተያየት ሰጪዎች የዘጋቢ ፊልሙ እውነትነት ወይም ድራማ መሆን የሚመዘነው ከቀረበው መሠረታዊ እውነት መሆንና አለመሆን ላይ ሳይሆን፣ ግለሰቦች በመንግሥት ላይ ካላቸው አመለካከት ወይም አቋም እየተለካ ይመስላል፡፡

ይህ ዓይነቱ አቋም የተሰማት አንድ ወጣት ሴት ጋዜጠኛ፣ ‹‹አንዳንድ ሰው ፊልሙን በኢቲቪ በመተላለፉ ብቻ በጭፍን እየተቃወመ ይመስለኛል፡፡ እውነት ነው አይደለም አልልም፡፡ በአብዛኛው ድራማ ነው፣ የመንግሥት ፈጠራ ነው የሚሉ ሰዎች የሚያቀርቡት ምክንያት አሳፋሪ ነው፡፡ ድራማ ነው እያሉ ያሉ ሰዎች ለጉዳዩ ትልቅ ትኩረት ሰጥተው ፊልሙን በሥርዓት ተመልክተው የቱ ጋ ‘ፌክ’ እንደሆነ አውቀው አይመስለኝም፤›› ትላለች፡፡ ምናልባት በሌላ ዓለም አቀፍ ሚዲያ ቀርቦ ቢሆን ሊቀበሉት ይችሉ ነበር በማለት፡፡ የጋዜጠኛዋ አስተያየት ሰዎች ዘጋቢ ፊልሙን እውነት ነው ውሸት ነው ብለው ለመቀበልና ላለመቀበል ለመንግሥት ካላቸው ጥላቻ ወይም ፍቅር ጋር መያያዝ የለበትም የሚል ይመስላል፡፡

ተመስገን ያለበት ቡድን አባላትም ጋዜጠኛዋ ያለችውን ነገር የሚያረጋግጡ ይመስላሉ፡፡ ከጥቂቶቹ በስተቀር ዘጋቢ ፊልሙ ለመደገፍና ለመቃወም የሚያቀርቡት ምክንያት ‹‹የኢትዮጵያ መንግሥት እኮ ነው››፣ ‹‹ኢቲቪ ነው እኮ››፣ ወዘተ በሚል ይመስላል፡፡ ያም ሆነ ይህ ዘጋቢ ፊልሙ ድራማ ከሆነባቸው ሁለቱ ሰዎች መካከል አንደኛው በፊልሙ የቀረቡት ተጠርጣሪዎች ተገደው የሚያነቡ የመሰለው ሲሆን፣ ሁለተኛው ደግሞ ሰዎቹ ከምር አሸባሪ ቢሆኑ ኖሮ የፈለገው ስቃይና ምርመራ ቢደርስባቸው ቃላቸውን አይሰጡም ይላል፡፡ በአሜሪካ ጓንታናሞ እንኳን በተመሳሳይ ወንጀል የተከሰሱ አሸባሪዎች ነፍሳቸው እስክታልፍ አንዳች ቃል ትንፍሽ አይሉም በሚል መከራከርያ ነጥብ፡፡

የሁለቱም አቋም መንግሥት የሙስሊሙን ማኅበረሰብ ጥያቄ መመለስ ስላቃተው የፈጠረው ልብ ወለድ ነው የሚል ነው፡፡ ‹‹በኢትዮጵያ ውስጥ እንዲህ ዓይነት ተግባር ፈጽሞ አይታሰብም፡፡ መንግሥት ራሱ ሽብር እየፈጠረ ነው፤›› የሚሉ ሲሆን፣ አንድ ቦታ የተፈጸመ አንድ የሽብር ተግባርን መንግሥት በተጨባጭ አለማሳየቱም ሌላው መከራከርያ ነጥባቸውን የሚያጠናክሩበት ነው፡፡

‹‹ጅሃዳዊ ሐረካት››
ጅሃዳዊ ሐረካት ባለፈው ዓመት ‹‹አኬልዳማ›› በሚል ርዕስ አንዳንድ መንግሥትን በኃይል ለመጣል ከሚንቀሳቀሱ ነፍጥ ያነገቡ (እንደ ኦነግ፣ ኦብነግና ግንቦት 7 የመሳሰሉ) ቡድኖች፣ ከአልሸባብና ከሻዕቢያ ጋር በመተባበር በአዲስ አበባ ሳይፈጸም ስለከሸፈው የሽብር ተግባር ከሚተርከው ዘጋቢ ፊልም ጋር ተመሳሳይ ይዘት ያለው ዘጋቢ ፊልም ነው፡፡ የቀረበውም በኢትዮጵያ መረጃና ደኅንነትና የፌዴራል ፖሊስ ፀረ ሽብር ግብረ ኃይል ነበር፡፡

በዚሁ ፊልም ከቀረበው ተጠርጣሪ አሸባሪ የቡድን መሪ ተብሎ የቀረበው አማን አሰፋ (አማን እስማኤል) እንደሚለው፣ የቡድኑ የመጨረሻ ዓላማ በኢትዮጵያ እስላማዊ መንግሥት (Islamic State) መመሥረት ሲሆን፣ የሽብር መረቡ ከኬንያ (ዳሩ ቢላል) በሞቃዲሾ በኩል ወደ ኢትዮጵያ የተዘረጋ ነው፡፡ አቶ አማን አሰፋ እንደሚለው፣ በአጠቃላይ ለሽብር አፈጻጸሙ ለውጊያ አመቺ ቦታ መምረጥ፣ የጦር መሣርያ ማከማቸትና የምሽግ አቆፋፈር ጭምር በአልሸባብ አባላትና በሌሎች አሸባሪዎች ሥልጠና ተሰጥቷቸዋል፡፡

የምሥራቅ አፍሪካ የአልቃይዳ ዩኒት በተለያዩ አካባቢዎች ያልተማከለ የሽብር ጥቃት የመፈጸም አዲስ ዕቅድ አካል መሆኑን የሚተርከው ይኼው ዘጋቢ ፊልም፣ በናይጄሪያ የንፁሐን ዜጎችን ደም እየፈሰሰ ካለው ቦኮ ሃራምና በማሊ ታሪካዊ ቅርሶችን እያፈራረሰ ካለው አሸባሪ ቡድን ጋር ለማመሳሰል የተደረገ ጥረትም አለ፡፡ ባለፈው ዓመት በአወልያ ትምህርት ቤት የተነሳውን አመፅ፣ በግብፅ ካለው አመፅ ጋር ለማገናኘትም ተሞክሯል፡፡ በናይሮቢና በዳሬሰላም በሚገኙ የአሜሪካ ኤምባሲዎች የተፈጸሙ የሽብር ተግባራት ምስልም ተካተውበታል፡፡ በከሚሴ የመጀመርያ ጥቃቱን ለመፈጸም በዝግጅት ሳለ ቡድኑ በቁጥጥሩ መዋሉን የሚዘግበው ጅሃዳዊ ሐረካት፣ ከግንቦት ሰባት አባላትና ከኤርትራ መንግሥት ጋር ለማገናኘትም ሙከራ አድርጓል፡፡ ኢትዮጵያ ከፍተኛ የሽብር ማዕከላት ከሆኑት አፍጋኒስታን፣ የመንና ፓኪስታን መካከል መመረጧንም በዘጋቢ ፊልሙ ከተጠርጣሪዎች አንደበት ተሰምቷል፡፡

የፍርድ ቤት ወይስ የሚዲያ ውሳኔ?
‹‹ጅሃዳዊ ሐረካት›› በኢትዮጵያ ቴሌቪዥን እንደሚተላለፍ መተዋወቁን ተከትሎ፣ የተጠርጣሪዎች ጠበቆች ባቀረቡት የይታገድልን አቤቱታ መሠረት የፌዴራል ከፍተኛ ፍርድ ቤት ልደታ ምድብ አራተኛ ወንጀል ችሎት ዳኛ የእገዳ ትዕዛዝ መጻፋቸው ተሰምቷል፡፡ ሆኖም ዓቃቤ ሕግ ይህንን እግድ በመቃወም ባቀረበው የይግባኝ አቤቱታ መሠረት የከፍተኛው ፍርድ ቤት ፕሬዚዳንት ወዲያውኑ እግዱን በማንሳታቸው ምክንያት በተያዘለት ጊዜ ዘጋቢ ፊልሙ መተላለፍ ችሏል፡፡

የተጠርጣሪዎች ጠበቆች አቤቱታ ጉዳዩ በፍርድ ሒደት ላይ መሆኑንና ዘጋቢ ፊልሙ እንዲቀርብ መደረጉ በዳኞችና በአጠቃላይ በኅብረተሰቡ ላይ የሚያሳድረው ጫና ደንበኞቻቸው ራሳቸውን የመከላከል መብት ላይ አሉታዊ ተፅዕኖ ያሳድራል የሚል ነው፡፡ ቀደም ሲል በተመሳሳይ እንዲተላለፍ የተደረገው ‹‹አኬልዳማ›› ዘጋቢ ፊልምን ጨምሮ፣ በፍርድ ቤት የተያዙ የሽብር ወንጀሎች በዘጋቢ ፊልም ሲቀርቡ የመጀመርያ አይደለም፡፡ ከዚህም በተጨማሪ የቀድሞው ጠቅላይ ሚኒስትር መለስ ዜናዊ በሽብርተኝነት ተጠርጥረው ጉዳያቸው በፍርድ ቤት በመታየት ላይ ያሉ ግለሰቦችን አስመልክቶ በፓርላማ ለቀረበላቸው ጥያቄ ሲመልሱ፣ ‹‹ወንጀለኞች መሆናቸውን አረጋግጠናል›› የሚል አስተያየት መስጠታቸው የሚታወስ ነው፡፡ አስፈጻሚው የመንግሥት አካል በሕግ ተርጓሚው (ፍርድ ቤት) ላይ የሚያሳድረው ተፅዕኖ ተደጋግሞ የተተቸ ጉዳይ ነው፡፡ ባለፉት ተመሳሳይ ጉዳዮች ላይ በርካታ ትችቶችን ያስተናገደው መንግሥት አሁንም ‹‹ጅሃዳዊ ሐረካት›› ዘጋቢ ፊልምን በኢቴቪ ያስተላለፈው፣ የተጠርጣሪዎቹን ምስል እያሳየና በአንደበታቸው እንዲናገሩ በማድረግ ሲሆን፣ ይኼም አንዱ የፊልሙ አነጋጋሪ ጉዳይ መሆኑ ይወሳል፡፡

ከተጠርጣሪዎቹ ጠበቆች መካከል አቶ ተማም አባቡልጉ ለሪፖርተር እንዳስረዱት፣ በዘጋቢ ፊልሙ ከቀረቡት መካከል አብዛኞቹ በሽብርተኝነት ተጠርጥረው ክስ ተመሥርቶባቸው ምስክር በመሰማት ላይ በመሆኑ ነበር በፍርድ ቤት አሳግደውት የነበረው፡፡ ሆኖም ጠቅላይ ፍርድ ቤት እግዱን ውድቅ አድርጎ ሊቀርብ መቻሉ እሳቸው እንደሚሉት፣ የክስ ሒደቱን በእጅጉ ይጋፋል፡፡ ተጠርጣሪዎቹ ፖሊስ አስገድዶ አንብቡ እያላቸው ጭምር እንዲቀርብ ተደርጓል ይላሉ፡፡

አንድነት ለዲሞክራሲና ለፍትሕ ፓርቲ ሰሞኑን ባወጣው መግለጫ፣ በዚሁ ዘጋቢ ፊልም የሙስሊሙን ማኅበረተሰብ ጥያቄ ለማፈን ሙከራ እየተደረገ ነው ይላል፡፡ በፍርድ ቤት የታገደ ፊልም ያለምንም ይግባኝ በሌላ ፍርድ ቤት ውድቅ እንዲደረግ በመደረጉም ፓርቲው ተቃውሞውን አሰምቷል፡፡ ይህንን አስመልክተን ያነጋገርናቸው የፓርቲው የሕዝብ ግንኙነት ኃላፊ አቶ ዳንኤል ተፈራ፣ ዘጋቢ ፊልሙ ሙስሊሞች ያቀረቡትን ግልጽ የሆነ ጥያቄን ለማፈን ሆን ተብሎ የቀረበ መሆኑን ይናገራሉ፤ የመንግሥት ኃላፊነት የጎደለው ተግባር በማለት፡፡ ትረካው ሚዛናዊነትን ያልጠበቀ፣ ሕዝቡ በፍርድ ቤት ላይ ያለውን እምነት የሚያሳጣ መሆኑንም አስረድተዋል፡፡

የኢትዮጵያውያን ዲሞክራሲያዊ ፓርቲ (ኢዴፓ) ፕሬዚዳንት አቶ ሙሼ ሰሙ በበኩላቸው፣ ዜጎች የመንግሥት ጥበቃ ያስፈልጋቸዋል በማለት አሁን በተደረገው ግን የፋይናንስም ሆነ የቴክኖሎጂ አቅም ያለው መንግሥት በተጠርጣሪዎች ላይ ጫና ይፈጥራል ይላሉ፡፡ ሕጉ ቢፈቅድም ባይፈቅድም፣ ተጠርጣሪዎች በፍርድ ቤት ወንጀለኛ እስካልተባሉ ድረስ ንፁህ መሆናቸው እየተጣሰ ነው ብለዋል፡፡ ፊልሙ ፍርድ ከተሰጠ በኋላ ቢሆን ታማኝነቱ ከፍተኛ ይሆን እንደነበርም ይናገራሉ፡፡ እንዲሁም ደግሞ ፊልሙ አሁን ካለው የሙስሊሞች ጥያቄ ጋር ቀጥታ ግንኙነት እንደሌለው ምልከታቸውን ገልጸዋል፡፡

በተጨማሪም ይተላለፍ ከተባለ እንኳን ተጠርጣሪዎቹ በቀጥታ በአንደበታቸው ከሚናገሩት ውጪ፣ ምንም ግንኙነት የሌለው የሆሊውድና ሌሎች ቪዲዮዎች ተቀናብረው መቅረባቸው ጉዳዩን የበለጠ ለማግዘፍ እንደሆነ ያምናሉ፡፡

ጉዳዩን አስመልክተን ጥያቄ ያቀርብንላቸው የመንግሥት ኮሙዩኒኬሽን ጉዳዮች ጽሕፈት ቤት ምክትል ኃላፊ አቶ ሽመልስ ከማል ግን፣ የሽብር ተግባር አደገኛና በሕዝብ ላይ የሚያስከትለው ጉዳትም ከፍተኛ በመሆኑ መንግሥት ምን እያደረገ እንደሆነ የማሳወቅ ግዴታ አለበት ይላሉ፡፡ በዘጋቢ ፊልሙ የቀረበው ጉዳይ ገና በፍርድ ቤት ያልተያዘ መሆኑንም ይናገራሉ፡፡

አንዳንድ በሌላ የሽብር ተግባር የተከሰሱ ተጠርጣሪዎች ያሉበት መሆኑን ግን ተናግረዋል፡፡ የፀጥታ ኃይሎች ተከታትለው ገና ከመፈጸሙ በፊት በማክሸፍ በቁጥጥር ሥር የዋለ ሴራ መሆኑን ገልጸው አንድም ሕዝቡ እንዲያውቅ፣ ሁለትም ከዚህ ጋር በተያያዘ ሕዝቡ ለፀጥታ ኃይሎች ተባባሪ ሆኖ በዚህ ተግባር ላይ የተሰማሩ ሰዎች ካሉ ለሚመለከተው አካል ሪፖርት እንዲያደርግ ማስጠንቀቂያ ነው ይላሉ፡፡ ያለ ሕዝብ ትብብር ውጤታማ መሆን አይቻልም በማለት፡፡ ጉዳዩ ግልጽ የሆነ ማስረጃ የተያዘበት መሆኑን ተናግረው፣ በማንም የፍርድ ቤት አካል ላይ ተፅዕኖ ለመፍጠር መንግሥት ዓላማ እንደሌለውም አስረድተዋል፡፡

ተያያዥነት የሌላቸው ጉዳዮች በፊልሙ መካተታቸውን በተመለከተ ለቀረበላቸው ጥያቄ፣ በማሊና በናይጄሪያ እየሆነ ያለው በኢትዮጵያ የማይሆንበት ምክንያት የለም ሲሉ ምላሽ ሰጥተዋል፡፡ በቁጥጥር ሥር ካልዋለ ወደዚያ ማምራቱ አይቀርም ነበር በማለት ‹‹ማስጠንቀቂያ ነው፤›› ብለዋል፡፡

በኢጋድ የፀረ ሽብርተኝነት አቅም ግንባታ ኃላፊ ኮማንደር አበበ ሙሉነህ፣ እንዲህ ዓይነት ጥቃት የአልቃይዳ አዲሱ ስትራቴጂ መሆኑን ይናገራሉ፡፡ ቀደም ሲል እንዲህ ዓይነት የሽብርተኝነት መናኸርያ የነበሩት አፍጋኒስታን፣ ኢራንና ሱዳን የነበሩ መሆናቸውን ጠቁመው፣ አሁን በግብፅ የሙስሊም ወንድማማቾች ወደ ሥልጣን መምጣት በምሥራቅ አፍሪካ የሽብርተኝነት ገጽታ ሊቀየር እንደሚችልም ያስረዳሉ፡፡ ተጠርጣሪዎቹ ከአልሸባብና ከሌሎች የአልቃይዳ መሪዎች ጋር ቀጥተኛ ግንኙነት ያላቸው መሆኑን በመጠቆም፣ በሌሎች አገሮች የሚታዩ ጥቃቶች በኢትዮጵያ ውስጥ እንዳይፈጸሙ ከፍተኛ ሥጋት እንዳለ ያምናሉ፡፡

ጅሃዳዊ ሐረካት - ልብ ወለድ ወይስ እውነት?
ፌስቡክን ጨምሮ በተለያዩ ማኅበራዊ ድረ ገጾች በርዕሰ ጉዳዩ ላይ ከፍተኛ ክርክር እየተደረገ ሲሆን፣ ‹‹መንግሥት የፈበረከው ውሸት ነው›› ከሚለው ጀምሮ የተጠርጣሪው ቡድን ዓላማ ነው ከሚባለው፣ ‹‹በኢትዮጵያ እስላማዊ መንግሥት ማቋቋም›› ምን ክፋት አለው እስከማለት የደረሱ አስተያየቶች እየተሰጡ ነው፡፡ በኢትዮጵያ ሕገ መንግሥት መንግሥትና ሃይማኖት የተለያዩ መሆናቸውን በግልጽ አስቀምጧል፡፡ ይህንን አንስተው ለሚከራከሩም ቀደም ሲል ኢትዮጵያ ውስጥ ክርስቲያናዊ መንግሥት ለዘመናት አልነበረም ወይ የሚል ምላሽ የሚሰጡ አሉ፡፡ ‹‹አንዱ ስህተት በሌላ ስህተት አይተስካከልም›› በሚል ሐሳባቸውን የሚያቀርቡ አስተያየት ሰጪዎች ቢበዙም፣ ‹‹የሕዝቡ ፈቃድ ከሆነ እስላማዊ መንግሥት በሰላማዊ መንገድ መመሥረት ምን ክፋት አለው?›› የሚሉ አስተያየት ሰጪዎችም ይደመጣሉ፡፡

በድረ ገጾችም ሆነ በሕዝቡ ውስጥ ተጠርጣሪዎች የፍርድ ውሳኔ ከማግኘታቸው በፊት በሚዲያ መቅረቡ አግባብነት የለውም የሚሉ በርካታ አስተያየቶች ይሰጣሉ፡፡ ፊልሙን የሙስሊሙን ማኅበረሰብ ለአንድ ዓመት የዘለቀ ተቃውሞ የተቀላቀለበት ጥያቄ ለማክሸፍ መንግሥት የፈበረከው ነው የሚሉም አልታጡም፡፡

ጋዜጠኛዋ እንዳለችው፣ በአብዛኛው ዘጋቢ ፊልሙን የሚያጥላላና የሚያጣጥል የኅብረተሰብ ክፍል በመንግሥት ላይ ያለውን የፖለቲካ ጥላቻና ተቃውሞ መሠረት ያደረገ ይመስላል፡፡ በኢቴቪ በመተላለፉ ብቻ እውነት ነው ብለው የማይቀበሉ ሰዎችም አሉ፡፡ በመንግሥት ላይ ተቃውሞ ማሰማት የሚፈልግ የኅብረተሰብ ክፍል የሙስሊሙ ማኅበረሰብ አመፅ እንዲቀጣጠልም ፍላጎት ያለው ይመስላል፤ ተቃውሞውን በሌላ አቅጣጫ ለመግለጽ፡፡ መንግሥት ደግሞ እየታዩ ያሉ የሽብር እንቅስቃሴዎች በአጭሩ ካልተቀጩ መዘዙ ከፍተኛ በመሆኑ ሕዝቡን ማስጠንቀቅ አለብኝ ይላል፡፡