Skip to main content
x

አገር የጠላት መጫወቻ እንዳትሆን!

በአሁኑ ጊዜ በአገሪቱ የተለያዩ ሥፍራዎች እያጋጣሙ ባሉ ግጭቶች የንፁኃን ሕይወት እየጠፋ ነው፣ የነገን ተስፋ የሚያጨልሙ አሳዛኝ ድርጊቶች እየተፈጸሙ ነው፡፡ በተለይ ሰሞኑን በዜጎች ላይ የተፈጸሙ ግድያዎች ያሳምማሉ፡፡ አገርን እየገጠመ ያለው መከራ ከሐዘን መግለጫ በላይ ነው፡፡ ሲያስቡት ይቀፋል፣ ያሳፍራል፣ ቃላት ሊገልጹት ከሚችሉት በላይ መራር የሆነ ስሜት ይፈጥራል፡፡ መንግሥት ካለፉት ሦስት ዓመታት ወዲህ እያጋጠሙ ላሉ ዘርፈ ብዙ ችግሮች ሁሉንም ወገን የሚያስማማ ጠብሰቅ ያለ መፍትሔ ማምጣት አቅቶት አገር ቋፍ ውስጥ ትገኛለች፡፡ ራሱ የፈጠራቸውን ችግሮች ማስተካከል አቅቶት በተፈጠረው ክፍተት ጠላት እየገባ ነው፡፡