የቀድሞው የኢትዮጵያ አየር መንገድ ዋና ሥራ አስፈጻሚ አቶ ግርማ ዋቄ የሩዋንዳ መንግሥት የትራንስፖርት ሚኒስቴር በአቪዬሽን ጉዳዮች አማካሪና የሩዋንዳ አየር መንገድ (ሩዋንዳ ኤር) የቦርድ ሊቀመንበር አድርጐ ሾሟቸው፡፡ ባለፈው ሳምንት በሩዋንዳ የጥቂት ቀናት ቆይታ አድርገው ወደ አዲስ አበባ የተመለሱት አቶ ግርማ፣ በመጪው ሳምንት ወደ ኪጋሊ ተመልሰው እንደሚጓዙ ለማወቅ ተችሏል፡፡ የአቶ ግርማ ሹመት የሚፀናው ከጥር 23 ቀን 2004 ዓ.ም. ጀምሮ ይሆናል፡፡

አቶ ግርማ ለሪፖርተር እንደገለጹት፣ ለአፍሪካዊ አየር መንገድ መሥራት የሚያስደስታቸው በመሆኑ ሹመቱን ተቀብለዋል፡፡ አክለውም የሩዋንዳ አየር መንገድ ከኢትዮጵያ አየር መንገድ ጋር ተባብሮ በሚሠራበት ሁኔታዎች ላይ እንደሚሠሩ ገልጸዋል፡፡

አቶ ግርማ የኢትዮጵያ አየር መንገድን ለ40 ዓመታት ያህል ካገለገሉ በኋላ ባለፈው ዓመት ጥር ወር ጡረታ ወጥተዋል፡፡ ቀድም ሲል በዲኤችኤልና በገልፍ ኤር በከፍተኛ ኃላፊነት ማገልገላቸው ይታወሳል፡፡ አቶ ግርማ የአዲስ አበባ ሒልተን ሆቴልና የኅብረት ኢንሹራንስ የዳይሬክተሮች ቦርድ አባል ናቸው፡፡