Skip to main content
x
ብአዴን በ347 አመራሮች ላይ የፖለቲካ ዕርምጃ መውሰዱን አስታወቀ

ብአዴን በ347 አመራሮች ላይ የፖለቲካ ዕርምጃ መውሰዱን አስታወቀ

ከአራቱ የኢሕአዴግ ድርጅቶች አንደኛው ብሔረ አማራ ዴሞክራሲያዊ ንቅናቄ (ብአዴን)፣ በ2009 ዓ.ም. በ347 ከፍተኛና መካከለኛ አመራሮች ላይ የፖለቲካ ዕርምጃ መውሰዱን አስታወቀ፡፡

የብአዴን ጽሕፈት ቤት ኃላፊ አቶ ዓለምነው መኮንን ሐሙስ መስከረም 18 ቀን 2010 ዓ.ም. ለሪፖርተር እንደተናገሩት፣ ብአዴን 1.6 ሚሊዮን አባላትና 7,500 መካከለኛና ከፍተኛ አሉት፡፡ ከእነዚህ መካከል በ347 አመራሮች ላይ ፖለቲካዊ ዕርምጃ ወስዷል፡፡ መለስተኛ ጥፋት የፈጸሙና ማስጠንቀቂያ የተሰጣቸው 203 እንደሆኑ ጠቁመው፣ 144 ደግሞ ጉዳያቸው በክልሉ ፀረ ሙስና ኮሚሽን ተይዞ ምርመራ እየተደረገባቸው መሆኑን ገልጸዋል፡፡

ብአዴን መካከለኛና ከፍተኛ አመራሮቹ ከመስከረም 15 እስከ 18 ቀን 2010 ዓ.ም. ድረስ በባህር ዳር ከተማ ኮንፈረንስ ማካሄዳቸውን አቶ ዓለምነው አስታውቀው፣ በኮንፈረንሱ የጥልቅ ተሃድሶ ንቅናቄ ተደርጎ በነበረበት ወቅት በቀረቡ አምስት ችግሮች ላይ ግምገማ እንደተካሄደ ጠቁመዋል፡፡

በጥልቅ ተሃድሶው ወቅት እንደ ችግር የተለዩ አምስት ጉዳዮችንም አቶ ዓለምነው ዘርዝረዋል፡፡ የድርጅቱ ውስን አባላት ከልማታዊ ዴሞክራሲያዊ መስመር መልቀቅና ሌላ የተሳሳተ መስመር የመያዝ አስተሳሰብና ተግባር፣ በመንግሥትና በሕዝብ መካከል ያለው ግንኙነት መጓደል፣ የውስጥ ድርጅት ዴሞክራሲ አለመጠናከር፣ አንድ የኢኮኖሚና የፖለቲካ ማኅበረሰብ ለመፍጠር በሚደረገው ጥረት ያፈነገጡ አመራሮች መኖርና ለለውጥ የተሠለፈው ታጋይ ኅብረተሰባዊ ለውጥ ላይ መሳተፍ ትቶ ወደ ግል ፍላጎቱ የመሄድ አዝማሚያ መኖር እንደሆኑ አስታውሰዋል፡፡

የዚህ ኮንፈረንስ ዋና ዓላማም ዓመታዊ የተሃድሶ ንቅናቄን መገምገም፣ ጠንካራና ደካማ ጎኖችን ፈትሾ በጥሩ ጎን የታየውን የማጎልበት፣ በአንፃሩ በድክመት የሚታዩትን ደግሞ የማስተካከል እንደነበር ገልጸዋል፡፡ በኮንፈረንሱ ከ2,300 በላይ አመራሮች እንደተሳተፉ የገለጹት አቶ ዓለምነው፣ የተሃድሶ እንቅስቃሴው የሚቀጥል ከመሆኑ አኳያ የአንድ ዓመት እንቅስቃሴ ብቻ ላይ ትኩረት ተሰጥቶ ግምገማ እንደተካሄደ ጠቁመዋል፡፡

በዚህ ግምገማ ሊያድጉ የሚችሉ ጥሩ ጅምሮች  እንደታዩ አቶ ዓለምነው ገልጸዋል፡፡ ከታዩ ለውጦች መካከልም ከአስተሳሰብ መዘበራረቅና ከመስመር ክህደት ጋር የተያያዙ ችግሮች ወደ ትክክለኛ ቁመናቸው መምጣት፣ በሙስና የሚገለጸው የኪራይ ሰብሳቢነት ድርጊቶች ላይ ግልጽነት መፍጠርና ሌሎች እንደሚገኙበት አክለዋል፡፡