Skip to main content
x
የጥጥ ልማት ባለሥልጣን ሊቋቋም ነው

የጥጥ ልማት ባለሥልጣን ሊቋቋም ነው

በተግዳሮቶች የተተበተበውን የጥጥ ልማትን ያሻሽላል የተባለለትና ከሁለት ዓመታት ጥናት በኋላ የተዘጋጀው የጥጥ ልማት ስትራቴጂ ይፋ ሊደረግ ነው፡፡ በዚህም መሠረት የጥጥ ልማት ባለሥልጣን ይቋቋማል፡፡

የጥጥ ልማት ከዚህ ቀደም በጨርቃ ጨርቅ ልማት ኢንስቲትዩት ሥር በዳይሬክቶሬት ደረጃ ተደራጅቶ ነበር፡፡ አሁን ግን ራሱን ችሎ ለጠቅላይ ሚኒስትር ጽሕፈት ቤት ተጠሪ የሚሆን፣ የኢትዮጵያ የጥጥ ልማት ባለሥልጣን እንደሚቋቋም በስትራቴጂው ይፋ ተደርጓል፡፡

የአገሪቱን የጥጥ ልማት የሚያስተዳድረው መዋቅር የራሱ የሆኑ  የተለያዩ ችግሮች ያሉበት፣ የአፈጻጸምና የመወሰን አቅሙ የተገደበ፣ እንዲሁም ከጥጥ ልማት ጋር የተያዘ የዕውቀት ውስንነቶች የሚታዩበት እንደነበር በስትራቴጂው ተገልጿል፡፡ በተጨማሪም መዋቅሩ ከሌሎች ተጓዳኝ መሥሪያ ቤቶች ጋር ያለው ቅንጅት ደካማ መሆኑም ተጠቁሟል፡፡

ይኼ በዋናነት በእንግሊዝ የዓለም አቀፍ ልማት ድርጅት የገንዘብ ለጋሽነት በውጭ ባለሙያዎች የቀረበው ጥናት፣ የጥጥ ልማት ለአገሪቱ አሁን እንደ ቡና ሁሉ ወሳኝ ፋይዳ አለው ይላል፡፡ ባለሥልጣኑ እንዲቋቋም መደረጉ አስፈላጊ መሆኑን፣ አገሪቱ አሁን ያለችበትን ነባራዊ ሁኔታ ከግምት ውስጥ ያስገባ ነው ሲል ጥናቱ ያብራራል፡፡

ከጥጥ ዘርፍ የሚገኘውን ጥቅም ለማሳደግ ሲባል ተጠሪነቱ ለእርሻና ተፈጥሮ ሀብት ሚኒስቴር ሳይሆን፣ ለጠቅላይ ሚኒስትሩ እንደሚሆን ስትራቴጂው ይፋ አድርጓል፡፡

በሁለተኛው ዕድገትና ትራንስፎርሜሽን ዕቅድ መጨረሻ መንግሥት ከጨርቃ ጨርቅና አልባሳት እስከ አንድ ቢሊዮን ዶላር ገቢ የማግኘት ዕቅድ ይዟል፡፡ ይህ እንዳይሳካ ከጥጥ አቅርቦትና ከጥራት ጋር የተያያዙ ችግሮች ዘርፉን ሲገዳደሩ መቆየታቸውም ተገልጿል፡፡

በአቅርቦትና በጥራት ሳቢያ አገሪቱ በቅርቡ የባዮ ቴክኖሎጂ ውጤት የሆነ ጥጥ ለማልማትና ለመጠቀም ዕቅድ አላት፡፡ ይህንንም ለማሳካት በተለያየ ደረጃ የላቦራቶሪና የመስክ ሙከራዎች እየተደረጉ ነው፡፡

ይኼ የጥጥ ልማት ስትራቴጂ የተለያዩ ባለድርሻ አካላት በሚገኙበት ሐሙስ ጥቅምት 2 ቀን 2010 ዓ.ም. ይፋ ይደረጋል ተብሎ ይጠበቃል፡፡