Skip to main content
x
የኢጋድ አባል አገሮች የደቡብ ሱዳን ተገዳዳሪ ኃይሎችን ለማስታረቅ እየጣሩ ነው

የኢጋድ አባል አገሮች የደቡብ ሱዳን ተገዳዳሪ ኃይሎችን ለማስታረቅ እየጣሩ ነው

የደቡብ ሱዳን ፕሬዚዳንት ሳልቫ ኪርና ዋነኛ ተቃዋሚያቸው ሪክ ማቻር (ዶ/ር) መካከል ያለውንና ጉዳት እያስከተለ ያለውን ልዩነት ለመፍታት፣ የምሥራቅ አፍሪካ የልማት በይነ መንግሥታት (ኢጋድ) አባል አገሮች የውጭ ጉዳይ ሚኒስትሮች ዓርብ ጥቅምት 3 ቀን 2010 ዓ.ም. በጁባ ውይይት አደረጉ፡፡  

የውጭ ጉዳይ ሚኒስቴር ቃለ አቀባይ አቶ መለስ ዓለም ከጁባ ለሪፖርተር እንደገለጹት፣ በደቡብ ሱዳን ያለው አለመረጋጋት በዘላቂነት እስኪፈታ ኢጋድ ጥረቱን ይቀጥላል፡፡ የኢጋድ የውጭ ጉዳይ ሚኒስትሮች ምክር ቤት ሊቀመንበርና የውጭ ጉዳይ ሚኒስትር ወርቅነህ ገበየሁ (ዶ/ር) በጁባ የተካሄደውን ስብሰባ እንደመሩት ታውቋል፡፡

የዚህ ውይይት ዓላማም ኢትዮጵያ በምትመራው የኢጋድ የውጭ ጉዳይ ሚኒስትሮች ሰኔ 2009 ዓ.ም. አዲስ አበባ ውስጥ ተሰጥቷቸው የነበረውን ተልዕኮ መገምገም እንደሆነ አስረድተዋል፡፡

የኢጋድ የውጭ ጉዳይ ሚኒስትሮች ከዚህ በፊት በአዲስ አበባ፣ በካርቱምና በሌሎች የኢጋድ አባል አገሮች ተካሂደው በነበሩ ስብሰባዎች አባላቱ የደቡብ ሱዳን መሪዎችንና የተቃዋሚ ፓርቲ አባሎችን በማነጋገር እርቅ እንዲፈጠር፣ በደቡብ ሱዳን ዘላቂ ሰላም እንዲመጣ ጥረት ማድረግ እንደነበር አቶ መለስ ጠቁመዋል፡፡

በዚህ መሠረት የኢጋድ አባል አገሮች የውጭ ጉዳይ ሚኒስትሮች አሁን በሥልጣን ላይ ያሉ ወገኖችንና የተቃዋሚ ፓርቲ አመራሮችን አግኝተው እንዳወያዩዋቸው ገልጸዋል፡፡ በጁባ በተካሄደው የሰላም ውይይት የደቡብ ሱዳን ፕሬዚዳንት ሳልቫ ኪር የሰላም ሒደቱ ከግብ እንዲደርስ በጎ ፈቃድ እንዳላቸውና የኢጋድን አቋም እንደሚደግፉ መናገራቸውን አቶ መለስ ተናግረዋል፡፡

የኢጋድ አባል አገሮች የውጭ ጉዳይ ሚኒስትሮች በሙሉ በስብሰባው ላይ መገኘታቸውንም ገልጸዋል፡፡

በውይይቱ ላይም ወደፊት ምን መደረግ እንዳለበት አቅጣጫ መቀመጡን ተናግረዋል፡፡ በጁባ፣ በካርቱም፣ በአዲስ አበባና በፕሪቶሪያ በተደረጉት ውይይቶች የአገሪቱ የቀድሞው ተቀዳሚ ምክትል ፕሬዚዳንት ሪክ ማቻርን ጨምሮ ሁሉም ወገኖች የሰላም ሒደቱ እንዲፋጠን ፍላጎት እንደላቸው አቶ መለስ ገልጸዋል፡፡

በውይይቱ ላይ የውጭ ጉዳይ ሚኒስትሩ የኢጋድ አባል አገሮች የአዲስ አበባው የሰላም ስምምነት ሙሉ በሙሉ እንዲተገበር ድጋፍ ቢያደርጉም፣ ዋነኛ ፈጻሚዎቹ ግን የደቡብ ሱዳን ሕዝብና መንግሥት እንደሆኑ መግለጻቸውንም ቃል አቀባዩ አክለዋል፡፡