Skip to main content
x
‹‹በማንኛውም ጊዜ የኑክሌር ጦርነት ሊጀመር ይችላል፡፡››

‹‹በማንኛውም ጊዜ የኑክሌር ጦርነት ሊጀመር ይችላል፡፡››

በተባበሩት መንግሥታት ድርጅት (ተመድ) የሰሜን ኮሪያ ምክትል አምባሳደር ኪም ኢን ርዩንግ፣ ለተመድ ጠቅላላ ጉባዔ የጦር መሣሪያ ቅነሳ ኮሚቴ ካደረጉት ንግግር የተወሰደ፡፡ ዋሽንግተን ፖስት ይዞት በወጣው ዘገባ መሠረት፣ ምክትል አምባሳደሩ የኮሪያ ልሳነ ምድር አጠቃላይ ሁኔታ ለኑክሌር ጦርነት መቀስቀስ ጫፍ ላይ ደርሷል ብለዋል፡፡ አገራቸው ሰሜን ኮሪያ እ.ኤ.አ. ከ1970ዎቹ ወዲህ በአሜሪካ ጽንፍ የረገጠና ቀጥተኛ የኑክሌር ማስፈራሪያ እየተደረገባት ነው ሲሉ አክለዋል፡፡ በዚህም ምክንያት ሰሜን ኮሪያ ራሷን ለመከላከል ስትል የኑክሌር መሣሪያ የመታጠቅ መብት እንዳላት አስታውቀዋል፡፡ በኮሪያ ልሳነ ምድር በአሜሪካ መሪነት መጠነ ሰፊ ወታደራዊ ልምምድ በየዓመቱ ከመካሄዱም በላይ፣ በኑክሌር መሣሪያ በመታገዝም የሰሜን ኮሪያን አመራር ለማስወገድ ሚስጥራዊ ዘመቻ መጀመሩ በጣም አደገኛ እንቅስቃሴ ነው ብለዋል፡፡ በዚህም ሳቢያ አገራቸው ኃይድሮጂን ቦምብን ጨምሮ የተለያዩ ርቀቶች የሚወነጨፉ ኑክሌር ተሸካሚ ባለስቲክ ሚሳይሎችን ሠርታ ማጠናቀቋን፣ በየትኛውም ጊዜ ጥቃት ቢሰነዘርባት የአሜሪካን ሁሉንም ሥፍራዎች መምታት ትችላለች ሲሉ አስጠንቅቀዋል፡፡ ‹‹አንዲት ኢንች ግዛታችን ብትወረር አሜሪካ ከቅጣት ብትራችን አታመልጥም፤›› ሲሉም ዝተዋል፡፡ የአሜሪካ የውጭ ጉዳይ ሚኒስትር ሬክስ ቲለርሰን የሰሜን ኮሪያን ቀውስ በዲፕሎማሲያዊ መንገድ ለመፍታት የመጀመሪያው ቦምብ እስኪፈነዳ ድረስ ጥረቱ ይቀጥላል ብለዋል፡፡ በምሥሉ ላይ የሚታየው የአሜሪካ ኤፍ 35 ስቲልዝ ተዋጊ ጄት ሲሆን፣ ሰኞ ጥቅምት 6 ቀን 2010 ዓ.ም. በደቡብ ኮሪያ ዋና ከተማ ሴዑል ታይቶ ነበር፡፡