Skip to main content
x
መንግሥት 400 ሺሕ ቶን ስንዴ ሊገዛ ነው

መንግሥት 400 ሺሕ ቶን ስንዴ ሊገዛ ነው

መንግሥት 400 ሺሕ ቶን ስንዴ ከውጭ ሊገዛ ነው፡፡ ጨረታው በሚቀጥለው ሳምንት ይወጣል፡፡

ከኢትዮጵያ ንግድ ኮርፖሬሽን የተገኘ መረጃ እንደሚያመለክተው ግዥውን ለማቅረብ ወደ ተቋሙ የሚመጣ ኩባንያ በሦስት ጭነቶች ስንዴውን እስከ መጪው የካቲት ወር አጓጉዞ ማስረከብ ይኖርበታል፡፡

የመጀመሪያው ጭነት 200 ሺሕ ቶን፣ ሁለተኛው ዙር 125 ሺሕ ቶን፣ እንዲሁም የመጨረሻው ዙር 75 ሺሕ ቶን ሆኖ ወደ አገር መግባት ይጠበቅበታል፡፡

ኮርፖሬሽኑ ለሚፈጽመው ግዥ በአሁኑ ወቅት ዝቅተኛ የስንዴ ዋጋ የሚሰጡት እንደ ሩማኒያ፣ ዩክሬን ወይም ሩሲያ የተሻለ የማሸነፍ ዕድል እንዳላቸው መረጃዎች ያመለክታሉ፡፡

እ.ኤ.አ. በ2017 እስከ ሴፕቴምበር ወር ድረስ ብቻ ኢትዮጵያ 630 ሺሕ ቶን ስንዴ ከውጭ ያስገባች ሲሆን፣ ከዚህ ውስጥ 23 ሚሊዮን ዶላር የሚያወጣ 120 ሺሕ ቶን የስንዴ ምርት ከአሜሪካ መንግሥት በዕርዳታ የቀረበ መሆኑ ታውቋል፡፡ የሚገዛው ስንዴ ለኅብረተሰቡ የምግብ ፍጆታ እንደሚውል ታውቋል፡፡ መንግሥት ከውጭ ለሚያስገባው ስንዴ በየዓመቱ የሚፈጽመው ክፍያ ኢኮኖሚውን እንደጎዳበት መዘገባችን ይታወሳል፡፡

መንግሥት በአንድ ኩንታል እስከ 250 ብር ድጎማ የሚያደርግ ሲሆን፣ ከ2003 ዓ.ም. ጀምሮ እስከ 2009 ዓ.ም. መጀመሪያ ድረስ አሥር ቢሊዮን ብር ለድጎማ አውጥቷል፡፡

ይህም በመንግሥት ላይ ከፍተኛ ጫና እያሳደረ በመሆኑ፣ በጠቅላይ ሚኒስትሩ ትዕዛዝ የመፍትሔ ሐሳብ አጥንቶ የሚያቀርብ ኮሚቴ ተቋቁሟል፡፡

ኮሚቴው በቀድሞው የገንዘብና ኢኮኖሚ ልማት ሚኒስትር አቶ ሱፊያን አህመድ የሚመራ ሲሆን፣ የንግድ ሚኒስትሩ በቀለ ቡላዶ (ዶ/ር) እና የብሔራዊ ባንክ ገዥ አቶ ተክለ ወልድ አጥናፉ ይገኙበታል፡፡ ኮሚቴው በ2009 ዓ.ም. ቢቋቋምም እስካሁን የመፍትሔ ሐሳብ አልቀረበም፡፡