Skip to main content
x
ከክቡር ሚኒስትሩ ጋር ውጭ አገር ቢዝነስ የሚሠራ ወዳጃቸው ደወለላቸው

ከክቡር ሚኒስትሩ ጋር ውጭ አገር ቢዝነስ የሚሠራ ወዳጃቸው ደወለላቸው

[ክቡር ሚኒስትሩን ለማነጋገር አንድ ሰው ቢሯቸው መጥቷል፡፡ ጸሐፊያቸው ቢሯቸው ገባች]

  • ክቡር ሚኒስትር የመጣ እንግዳ አለ፡፡
  • ዛሬ ቀጠሮ አለኝ እንዴ?
  • ቀጠሮ እንኳን አልነበረዎትም፡፡
  • ታዲያ ማን ነው ያለ ቀጠሮ የሚያገኘኝ?
  • ክቡር ሚኒስትሩን ካላገኘኋቸው ከዚህ አልሄድም እያለ ነው፡፡
  • ሥራ ላይ ናቸው ለምን አትይውም?
  • ሥራ ግን አልያዙም ብዬ ነው፡፡
  • አንቺ ነሽ እንዴ ሥራ የምትሰጪኝ?
  • እንደዛ ማለቴ አይደለም ክቡር ሚኒስትር፡፡
  • ታዲያ ምን እያልሽ ነው?
  • ሰውዬው የሚሄድ ዓይነት አይደለም፡፡
  • ለመሆኑ ምን ፈልጐ ነው?
  • ጉዳዬ እሳቸው ጋር ነው ስላለኝ ምን እንደፈለገ አላወቅኩም፡፡
  • እኔ እኮ የአገር እንጂ የግለሰብ ጉዳይ አልመለከትም፡፡
  • አልገባኝም ክቡር ሚኒስትር፡፡
  • ማንም ግለሰብ ካላናገርኩት ስላለ ማናገር አለብኝ?
  • ምናልባት ሰውዬው የያዘው የአገር ጉዳይ ሊሆን ይችላል፡፡
  • ይኼኔ ገንዘብ እርዳኝ ሊል ይሆናል፡፡
  • መጀመርያ ገብቶ ጉዳዩን ቢሰሙት አይሻልም?
  • እሺ አስገቢው፡፡

[ግለሰቡ ክቡር ሚኒስትር ቢሮ ገባ]

  • እስቲ ተቀመጥ፡፡
  • አመሰግናለሁ ክቡር ሚኒስትር፡፡
  • ምንድን ነበር ጉዳይህ?
  • ምነው ምነው ክቡር ሚኒስትር?
  • ምን ሆነሃል?
  • ረሱኝ እንዴ ክቡር ሚኒስትር?
  • እንተዋወቃለን እንዴ?
  • ተው እንጂ ክቡር ሚኒስትር፡፡
  • ምን ሆነሃል ሰውዬ?
  • ረስተውኛል ማለት ነው፡፡
  • እኔ እኮ ብዙ ሰው ነው የማገኘው፡፡
  • ምንም ትዝ አላልኩዎትም?
  • እንግዲህ ሥራዬ ከብዙ ሰዎች ጋር ስለሚያገኛኘኝ አላስታወስኩህም፡፡
  • የእኔ ግን ለየት ያለ ነበር ክቡር ሚኒስትር፡፡
  • ለየት ያለ ስትል?
  • እርስዎ አይደል እንዴ የተቀበሉኝ?
  • ሰውዬ ከአንተ ምንም ዓይነት ጉቦ አልተቀበልኩም፡፡
  • እኔ ስለጉቦ መቼ አወራሁ?
  • ኮሚሽን ቢሆንም ከአንተ አልተቀበልኩም፡፡
  • ምን ያለበት ዝላይ አይችልም አሉ፡፡
  • ምን?
  • እኔ ስለጉቦም ስለኮሚሽንም አይደለም የማወራው፡፡
  • ታዲያ ምንድነው የተቀበልኩህ?
  • ባለፈው እርስዎ ነበሩ ከኤርፖርት የተቀበሉኝ፡፡
  • ዘመዴ ነህ እንዴ?
  • ኧረ አይደለሁም፡፡
  • ምንድን ነው የምታወራው ታዲያ?
  • ከሳዑዲ ተመላሾች መካከል አንዱ ነኝ፡፡
  • እሺ፡፡
  • ባለፈው ከእርስዎ ጋር በየሚዲያው ኢንተርቪ ስደረግ ነበር፡፡
  • ውይ ውይ ውይ፡፡
  • ችግር የለውም ክቡር ሚኒስትር፡፡
  • ዛሬ ታዲያ ከየት ብቅ አልክ?
  • ግራ ገብቶኝ ነው የመጣሁት ክቡር ሚኒስትር፡፡
  • ምን ሆንክ?
  • ያኔ ስንት ነገር ሰብካችሁን ወደ አገር ቤት ተመለሱ ባላችሁን መሠረት ተመለስን፡፡
  • ታዲያ አገሪቷ በልማት እየተመነደገች አይደል እንዴ?
  • ስለየትኛዋ አገር ነው የሚያወሩት?
  • ስለኢትዮጵያ ነዋ፡፡
  • ይኸው ባለፈው አገራችሁ ውስጥ ሠርታችሁ ማደግ ትችላላችሁ ተብለን ብንመጣም ምንም ዓይነት ሥራ የለም፡፡
  • እስካሁን ሥራ አልጀመርክም?
  • ጭራሽ አዲስ ባወጣሁት ስልክ ላይ ከሳዑዲ ተመላሾችን ለማቋቋም ገንዘብ እርዳ ተብሎ ተላከልኝ፡፡
  • ታዲያ ብትረዳ ምን አለበት?
  • ለነገሩ ውጭ የሚወራውና አገር ውስጥ ያለው ነገር በጣም የተለያየ መሆኑን አረጋግጫለሁ፡፡
  • ምን እያልክ ነው?
  • አገሬ ስመጣ ሠርቼ አድጋለሁ ብዬ አስቤ ነበር፡፡
  • ከሠራህማ መለወጥህ አይቀርም፡፡
  • እንደገባኝ አገሪቷ ላይ ሠርቶ ማደግ አይቻልም፡፡
  • ታዲያ ምንድነው የሚቻለው?
  • ሠርቆ ማደግ!

 

[ከክቡር ሚኒስትሩ ጋር ውጭ አገር ቢዝነስ የሚሠራ ወዳጃቸው ደወለላቸው]

  • ሄሎ ክቡር ክቡር ሚኒስትር፡፡
  • እንዴት ነህ ወዳጄ?
  • የት ነው ያሉት ክቡር ሚኒስትር?
  • አገሬ ነዋ፡፡
  • አሁን እንደው አፍ ሞልቶ አገር አለ ማለት ይቻላል?
  • ምን እያልክ? ደግሞ ምን ተፈጠረ?
  • ይኸው በየቀኑ የምንሰማው እልቂት፣ መፈናቀል፣ ግጭትና ረብሻ አይደል እንዴ?
  • እባክህ ይኼ የፀረ ሰላም ኃይሎች ወሬ ነው፡፡
  • እና አገር ሰላም ነው እያሉኝ ነው?
  • ሰላም ቢሉህ ሰላም ነው እንዴ?
  • ኧረ ተው ክቡር ሚኒስትር፡፡
  • እውነቴን ነው የምልህ፤ ሰሞኑን ራሱ ከአንድ ሥራ ያገኘሁት ትርፍ ቀላል እንዳይመስልህ?
  • ከምንድን ነው ትርፍ ያገኙት?
  • ከዶላር ጭማሪው፡፡
  • እውነት?
  • በቃ የጀመርኩትን ሕንፃ የሚያስጨርሰኝ ነው ስልህ?
  • ግብር ከፈሉ ታዲያ?
  • የምን ግብር?
  • ይኼን ንፋስ አመጣሽ ታክስ ምናምን የሚሉትን ነዋ፡፡
  • ንፋሱን ያመጣሁት እኔ አይደለሁ እንዴ?
  • ለነገሩ እርስዎ እንኳን ንፋስ አውሎ ንፋስ ማስነሳት ይችላሉ፡፡
  • ስለዚህ ስለአገሪቷ ብዙም አትጨነቅ፡፡
  • እኔማ አንድ ነገር ላማክርዎት ነበር፡፡
  • ምንድን ነው የምታማክረኝ?
  • ማለቴ አገሪቷ ውስጥ ያለው ሁኔታ የሚያስፈራ ነው፡፡
  • ምን ለማለት ፈልገህ ነው?
  • ያው ያሉንን ሕንፃዎች፣ ፋብሪካዎችና ንብረቶች ወደዚህ ብናሸሽ ብዬ ነው፡፡
  • ለምን ሲባል?
  • እንደነገርኩዎት የአገሪቷ ሁኔታ እያስፈራኝ ነው፡፡
  • ስማ ዝም ብለህ አትምቦቅቦቅ፡፡
  • ክቡር ሚኒስትር ሀብታችንን ሳናሸሽ አንድ ነገር ቢፈጠር እኮ ክፉኛ ነው የምንጐዳው፡፡
  • እዚህ ልማትና ልማት ብቻ ነው ያለው ስልህ?
  • ይኼ የሚሰማው ብጥብጥ ግጭት ምንድነው?
  • የፀረ ልማት ኃይሎች ሥራ ነው ስልህ?
  • እኔ ግን ብዙም አላማረኝም፡፡
  • ምንም አትፍራ አልኩህ?
  • ሕዝብ እኮ እምቢ እያለ ነው፡፡
  • ከቁጥጥራችን ውጪ አይወጣም ስልህ?
  • ብቻ ጐርፉ ይዞዎት እንዳይሄድ?
  • የቱ ጐርፍ?
  • የሕዝቡ ጐርፍ!

 

[ክቡር ሚኒስትሩ አንድ የአገር ሽማግሌ ደውሉላቸው]

  • ሰላም ክቡር ሚኒስትር፡፡
  • እንዴት ነዎት ጋሼ? ዛሬ ከየት ተገኙ?
  • መቼም እኔ አገር ሲታመስ ነው የምደውለው፡፡
  • ኧረ ሁላችንም ጤና ነን፡፡
  • ተው እንጂ ክቡር ሚኒስትር፡፡
  • ምነው?
  • ምንድን እየተሠራ ነው?
  • ግድብ፣ ባቡር፣ የኢንዱስትሪ ፓርክና ሌሎችም እየተሠሩ ነው፡፡
  • ለጊዜው ባልቱን እንተወው፡፡
  • የምን ቧልት ነው?
  • አገሪቷ አጣብቂኝ ውስጥ እኮ ናት ያለችው፡፡
  • የምን አጣብቂኝ ነው ጋሼ?
  • እኛ ይህቺ አገር እንዳትፈርስ ምን ያህል መስዋትነት እንደከፈልን ያውቃሉ?
  • እሱን በሚገባ አውቃለሁ፡፡
  • ለልጆቻችን ግን ምን ዓይነት አገር ጥለን ነው የምናልፈው?
  • የበለፀገችና ተወዳጅ አገር፡፡
  • የበለፀገች አገር ለማድረግ እየሠራን ነው ብላችሁ ታምናላችሁ?
  • ይኸው የአገሪቷ ኢኮኖሚ በ11 በመቶ ሲያድግ እኮ የእኛ እንቅልፍ በ11 በመቶ ቀንሷል፡፡
  • ታዲያ የማትተኙት ስትሠሩ ነው ስታሴሩ?
  • ምን እያሉን ነው ጋሼ?
  • ይኸው የሴራ ፖለቲካ እኮ አገሪቷን ቁልቁል እየወሰዳት ነው፡፡
  • ስለምን እያወሩ እንደሆነ አልገባኝም?
  • አገሪቷ ውስጥ ሰዎች እየሞቱ አይደል እንዴ?
  • ይኼ እኮ አንዳንድ ሚዲያዎች የሚያናፍሱት ተራ አሉባልታ ነው፡፡
  • እኔ እንደሚያገባኝ ግን የሚዲያ ጨዋታውን ወደ ጎን ትቶ ለሕዝቡ ምላሽ መስጠቱ ያዋጣል፡፡
  • ጋሼ አገሪቷ ለምን  አልታመሰችም ብሎ ወሬ የሚያራግቡት ሚዲያዎቹ ናቸው፡፡
  • ኧረ የምትመሯት አገር ትልቅ ናት፡፡
  • እሱንማ እናውቃለን፡፡
  • ታዲያ የሕዝቡን ጥያቄ ለምን አትመልሱም?
  • ሁልጊዜ የሕዝቡን ጥያቄ እንደመለስን አይደል እንዴ?
  • ክቡር ሚኒስትር ለሚዲያ መግለጫ እየሰጡ አይደለም እኮ፡፡
  • ምን እያሉ ነው?
  • አገሪቷ ላይ እየተካሄደ ያለውን ነገር በሚገባ አውቀዋለሁ፡፡
  • የሰሞኑ ግርግር እኮ በፀረ ልማት ኃይሎች የተቀነባበረ ነው፡፡
  • ክቡር ሚኒስትር በአጠቃላይ አገሪቷ እኮ በብሔር ፖለቲካ እየተናወጠች ነው፡፡
  • ኢትዮጵያዊነት ላይ ወጥረን እየሠራን ነው፡፡
  • በፊት እሱን ስንመክራችሁ መቼ ሰማችሁ?
  • ይኸው አንድነትን እየሰበክን እኮ ነው፡፡
  • መቼም ገበሬ ስንዴ ዘርቶ ብርቱካን አይጠብቅም?
  • እንዴት ሆኖ ጋሼ?
  • እናንተስ እንዴት አንድነት ይመጣል ብላችሁ ትጠብቃላችሁ?
  • ለምን አይመጣም?
  • ክፍፍል ዘርታችሁ…
  • እ…
  • አንድነት ሊመጣ?

 

[ለክቡር ሚኒስትሩ አንድ ዲፕሎማት ደወለላቸው]

  • በአገር አሉ እንዴ ክቡር ሚኒስትር?
  • ከአገሬ ወዴት እሄዳለሁ ብለህ ነው?
  • ክቡር ሚኒስትር በየቦታው ግጭትና ረብሻ በዛ እኮ፡፡
  • የምን ግጭት ነው?
  • አስቸኳይ ጊዜው በድጋሚ ታውጇል እንዴ?
  • ከተነሳ መቆየቱን አታውቅም?
  • ይኸው ለሥራ ከከተማ መውጣት አልቻልኩም ብዬ ነዋ፡፡
  • ምን ነካህ አገሪቷ በጣም የተረጋጋች ናት?
  • ክቡር ሚኒስትር እኔ እኮ መረጃ ላይ ተመሥርቼ ነው የማወራዎት፡፡
  • ቢሆንም መረጃህን ማጣራት አለብህ፡፡
  • ይኼ አካሄድ ለማንም የሚያዋጣ አይመስለኝም፡፡
  • ምን እያልክ ነው?
  • ክቡር ሚኒስትር ከሕዝቡ ጋር ቁጭ ብላችሁ ለምን አታወሩም?
  •  ምን ብለን ነው የምናወራው?
  • ጥያቄውን መስማት አለባችሁ፡፡
  • እኛ ሁሌም የሕዝብ ጥያቄ እንደሰማን ነው፡፡
  • ለማንኛውም ክቡር ሚኒስትር ይህቺ አገር ባለፉት ዓመታት ከፍተኛ ዕድገት አስመዝግባለች፡፡
  • ዕድገታችንማ ተጧጡፎ ይቀጥላል፡፡
  • ዕድገቱ የመጣው ዳግም አገሪቷ ሰላም በመሆኗ ነው፡፡
  • እሱስ ልክ ነህ፡፡
  • የአገሪቷ ሰላም መሆን በርካታ የውጭ ኢንቨስተሮች ወደዚህ እንዲመጡ ያደርጋል፡፡
  • አንተም የአገርህን ኢንቨስተሮች መጋበዝህን አትርሳ፡፡
  • በዚህ ሁኔታማ እንኳን ሌላ ሊመጣ ያለውም ሊለቅ ይችላል፡፡
  • ለምን ሲባል?
  • ክቡር ሚኒስትር የአገሪቷ ሰላም ይታሰብበት፡፡
  • ምን እያልክ ነው?
  • ችግራችሁን ፍቱ፤ ያበለዚያ…
  • እ…
  • የ11 በመቶ ዕድገት ይቀለበሳል፡፡
  • ወደ ምን?
  • ወደ ኔጌቴቭ 11!