Skip to main content
x
ከኅዳር ጀምሮ 250 ሺሕ ዜጎች የምግብ ዋስትና ተጠቃሚ ይሆናሉ

ከኅዳር ጀምሮ 250 ሺሕ ዜጎች የምግብ ዋስትና ተጠቃሚ ይሆናሉ

በሁሉም ክልሎች በሚገኙ 11 ከተሞች ከ2009 ዓ.ም. ጀምሮ ተግባራዊ በተደረገው የምግብ ዋስትና ፕሮጀክት ከኅዳር 2010 ዓ.ም. ጀምሮ ተጨማሪ 250 ሺሕ ዜጎች የፕሮግራሙ ተጠቃሚ እንደሚሆኑ የከተሞች የሥራ ዕድል ፈጠራና የምግብ ዋስትና ኤጀንሲ አስታወቀ፡፡

የኤጀንሲው ዋና ዳይሬክተር አቶ ዘነበ ኩሞ ለሪፖርተር እንዳስታወቁት፣ በ2009 ዓ.ም. በብሔራዊ ደረጃ 194 ሺሕ ዜጎች በፕሮግራሙ የተካተቱ ሲሆን፣ ለ2010 ደግሞ 250 ሺሕ ተጨምረዋል፡፡ ከእነዚህ ውስጥ 200 ሺሕ ያህሉ በአዲስ አበባ የሚገኙ ተጠቃሚዎች ናቸው፡፡

ከኅዳር 2010 ዓ.ም. ጀምሮ የምግብ ዋስትና ተጠቃሚ ከሚሆኑት 250 ሺሕ ዜጎች ውስጥ 16 በመቶ ያህሉ አረጋውያን፣ ተደራራቢ የአካል ጉዳት ያለባቸውና ሠርተው መኖር የማይችሉ በመሆኑ በየወሩ 170 ብር የሚሰጣቸው ሲሆን፣ ቀሪዎቹ 84 በመቶው ግን በየአካባቢያቸው በሚገኙ የልማት ሥራዎች ተሳትፈው በቀን 60 ብር የሚታሰብላቸው ናቸው፡፡

በቀን 60 ብር የሚታሰብለት አንድ የምግብ ዋስትና ተጠቃሚ በወር ለአምስት ቀናት በቀን ለሁለት ሰዓት ያህል መሥራት ያለበት ሲሆን፣ በዚህም በወር 300 ብር ያገኛል፡፡

አቶ ዘነበ እንደሚሉት፣ አረጋውያኑና ተደራራቢ የአካል ጉዳት ያለባቸው የፕሮግራሙ ተጠቃሚዎች ከቤተሰብ ጋር ይኖራሉ ተብሎ ስለሚታሰብ በወር 170 ብር ሲታሰብላቸው፣ በአካባቢያቸው ልማት መሳተፍ ለሚችሉት ደግሞ በልማት ሥራ ተሳትፈው በወር 300 ብር ይሰጣቸዋል፡፡

በአካባቢያቸው በሚገኙ የተፋሰስ ሥራዎች፣ ጽዳት፣ አረንጓዴ ማድረግን ጨምሮ የአካባቢው ነዋሪዎች ቅድሚያ በሚሰጧቸው የተለያዩ ሥራዎች፣ ወረዳዎች ባስቀመጡት መዋቅር መሠረት በወር ለአምስት ቀናት የሚሠሩት የምግብ ዋስትና ፕሮግራም ተጠቃሚዎች፣ የፕሮግራሙ ተጠቃሚ የሚሆኑት ለሦስት ዓመታት ሲሆን፣ ጊዜያቸውን ጨርሰው ሲወጡ ደግሞ በወቅቱ በሚኖረው ምንዛሪ ከመንግሥት 500 ዶላር የሚሰጣቸው ይሆናል፡፡

በፕሮጀክቱ በአብዛኛው የታቀፉት በአንድ ቤተሰብ ውስጥ እስከ አራት የሚደርሱ ተጠቃሚዎች ሲሆኑ፣ እነዚህ በወር በድምሩ 1,200 ብር ያገኛሉ፡፡ ከዚህ ውስጥ መቆጠብ ከቻሉ ደግሞ ከፕሮግራሙ ሲወጡ በግለሰብ ደረጃ ከሚያገኙት 500 ዶላር ጋር አዳምረውና መንግሥት ባዘጋጀው የሥራ ዕድል ፈጠራ ተደራጅተው መሥራት የሚችሉበት ሁኔታ ክፍት ነው፡፡

ለዚህ ሲባል ኤጀንሲው የምግብ ዋስትና ተጠቃሚዎች እንዲቆጥቡ የሚያበረታታ መሆኑንና፣ ሦስቱን ዓመት ሲጨርሱ ወደ ሌላ ሥራ የሚሸጋገሩበትንና ወደመደበኛው የሥራ ፈጠራ ሥርዓት የሚገቡበትን እንደሚያመቻች አቶ ዘነበ ተናግረዋል፡፡

ፕሮግራሙ ሲቀረጽ የምግብ ዋስትና ተጠቃሚዎች የተረጂነት መንፈስ እንዳያሳድሩና ከፕሮግራሙ ጨርሰው ሲወጡ ወደቀደመ ኑሮዋቸው እንዳይመለሱ ለማድረግ ታስቦ መሆኑን፣ የኢትዮጵያ መንግሥት ከመደበው 150 ሚሊዮን ዶላር በተጨማሪ 300 ሚሊዮን ዶላር በ2008 ዓ.ም. ማብቂያ ላይ ያበደረው የዓለም ባንክም ፕሮጀክቱን በየስድስት ወሩ እንደሚገመግም ተናግረዋል፡፡

ለአረጋውያኑም ሆነ በቀን ሠርተው የምግብ ዋስትና ተጠቃሚ ለሚሆኑት የሚሰጠው ገንዘብ አላነሰም ወይ? በሚል ላነሳነው ጥያቄ፣ በተጠቃሚዎችም ሆነ በኤጀንሲው በኩል ይህ እንደሚነሳ፣ ፕሮጀክቱ በ2005 ዓ.ም. የተጠና ከመሆኑም አንፃር ታይቶ የዓለም ባንክ ኃላፊዎች በቀጣይ ለግምገማ በሚመጡበት ወቅት በጉዳዩ ላይ ለመነጋገርና ፕሮጀክቱም እንዲከለስ ለመምከር መታቀዱን አቶ ዘነበ ተናግረዋል፡፡

ከዓለም ባንክ በተገኘው 300 ሚሊዮን ዶላር ብድርና መንግሥት በመደበው 150 ሚሊዮን ዶላር በ2009 ዓ.ም. በተጀመረው የምግብ ዋስትና ፕሮግራም የአሁኑን ጨምሮ በሁሉም ክልሎች በሚገኙ ከተሞች የሚገኙ ከ400 ሺሕ በላይ ዜጎች ተጠቃሚ ሲሆኑ ከእነዚህ ውስጥ 68 በመቶ ያህሉ ሴቶች ናቸው፡፡