Skip to main content
x
ዓቃቤ ሕግ በዶ/ር መረራ ጉዲና ላይ ምስክሮቹን ማሰማት ጀመረ

ዓቃቤ ሕግ በዶ/ር መረራ ጉዲና ላይ ምስክሮቹን ማሰማት ጀመረ

ሕገ መንግሥቱን በኃይል እናስወግዳለን በማለት ከሚንቀሳቀሱት የአርበኞች ግንቦት 7 ቡድን ጋር የሁከትና የብጥብጥ ጥሪ በማስተላለፍ፣ የአስቸኳይ ጊዜ አዋጅን በመተላለፍና የሐሰት ወሬዎችን በማውራት ተጠርጥረው ሦስት ክሶች በተመሠረተባቸው ዶ/ር መረራ ጉዲና ላይ ዓቃቤ ሕግ ምስክሮችን ማሰማት ተጀመረ፡፡

የፌዴራል ጠቅላይ ዓቃቤ ሕግ አራት የደረጃ ምስክሮች (ዶ/ር መረራ በፌዴራል ፖሊስ ወንጀል ምርመራ ማዕከል የይለፍ ቃለ በመስጠት ሰነዶች ከላፕቶፕ፣ ከኢሜልና ከሐርድ ዲስክ እየታተሙ ሲወጡ (ማዕከላዊ) በመገኘት ታዛቢ የሆኑ) በፌዴራል ከፍተኛ ፍርድ ቤት 19ኛ ወንጀል ችሎት ማሰማት ጀምሯል፡፡

ዓቃቤ ሕግ ጥቅምት 24 ቀን 2010 ዓ.ም. ያሰማቸው የደረጃ ምስክሮች ሁለት ሲሆኑ፣ ሁለቱ በአድራሻቸው ሊገኙ አለመቻላቸውን በመግለጽ በቀጣይ ቀጠሮ እንደሚያሰማ ለፍርድ ቤቱ አስረድቷል፡፡

የመጀመርያው የዓቃቤ ሕግ የደረጃ ምስክር ማንነቱን ለፍርድ ቤቱ ከገለጸ በኋላ በሰጠው ምስክርነት፣ ታኅሳስ 14 ቀን 2009 ዓ.ም. የታሰረ ጓደኛውን ለመጠየቅ ወደ ፌዴራል ፖሊስ ወንጀል ምርመራ ማዕከል ሄዶ እንደነበር አስረድቷል፡፡ ወደ ወንጀል ምርመራ ማዕከሉ ያመራው ከሥራ ባልደረባው ጋር መሆኑንና ምክንያቱም የእሱን ጓደኛ ለመጠየቅ መሆኑን አክሏል፡፡

ጉዳዩን ጨርሶ ሲወጣ የወንጀል ምርመራ ክፍል ኃላፊው በታዛቢነት እንዲተባበሩ  ሲጠይቁ፣ መስማማቱንና ከአምስት እስከ ዘጠኝ ሰዓት ድረስ መቆየታቸውን አስረድቷል፡፡

የደረጃ ምስክሮቹ ታዛቢ የሆኑት ዶ/ር መረራ በወንጀል ምርምራ ማዕከል ቀርበው ከላፕቶፕ፣ ከኢሜላቸው፣ ኮምፒውተርና ከሐርድ ዲስክ በአማርኛ፣ በእንግሊዝኛና በኦሮሚኛ የተጻፉ መጣጥፎች እየታተሙላቸው ሲፈርሙ መመልከታቸውንና እነሱም በታተመው ሰነድ ላይ መፈረማቸውን ተናግረዋል፡፡ ዶ/ር መረራ ያለምንም ተቃውሞ የይለፍ ቃላቸውን (Pass Word) በመስጠት እንዲከፍቱ ማድረጋቸውንና መጣጥፎቹ የእሳቸው መሆናቸውን በማረጋገጥ መፈረማቸውን፣ እነሱም በእማኝነት መፈረማቸውን መስክረዋል፡፡

ሁለተኛው ምስክርም በተመሳሳይ ሁኔታ የመሰከረ ቢሆንም፣ ከመጀመርያው ምስክር ጋር እንዴት እንደሚተዋወቅና ለምን ወደ ወንጀል ምርመራ ማዕከል እንደሄደ የሰጠው ቃል የተለያየ ነው፡፡

ሁለተኛው የደረጃ ምስክር ወደ ወንጀል ምርመራ ማዕከል የሄደው መሥሪያ ቤቱ  የታሸገ ፖስታ ለወንጀል ምርመራ ማዕከሉ ኃላፊ እንዲያደርስ ተልኮ መሆኑን፣ አንደኛውን የደረጃ ምስክር ያገኘው እዚያው እንደሆነ ተናግሯል፡፡ የመጀመርያው ምስክር አንድ መሥሪያ ቤት እንደሚሠሩ የገለጸ ቢሆንም፣ ሁለተኛው ግን የተለያዩ ቦታዎች እንደሚሠሩና በሥራ አጋጣሚ እንደሚተዋወቁ አስረድቷል፡፡

ፍርድ ቤቱ ሁለቱን የዓቃቤ ሕግ የደረጃ ምስክሮች ካዳመጠ በኋላ ቀሪ ሁለት የደረጃ ምስክሮች ለመስማት ተቀያሪ ቀጠሮ ለኅዳር 21 ቀን 2010 ዓ.ም. ቀጠሮ ሰጥቷል፡፡