Skip to main content
x
በሶማሌና በኦሮሚያ ክልሎች ግጭት ምክንያት 103 ሰዎች ታሰሩ

በሶማሌና በኦሮሚያ ክልሎች ግጭት የተሳተፉ 103 ተጠርጣሪዎች ታሰሩ

በሶማሌና በኦሮሚያ ክልሎች በተከሰተው ግጭት የተሳተፉ 103 ተጠርጣሪዎች በቁጥጥር ሥር እንደዋሉ የመንግሥት ኮሙዩኒኬሽን ጉዳዮች ሚኒስትሩ ነገሪ ሌንጮ (ዶ/ር) ዛሬ ኅዳር 16 ቀን 2010 ዓ.ም. በጽሕፈት ቤታቸው በሰጡት ጋዜጣዊ መግለጫ ተናገሩ፡፡

ከኦሮሚያ ክልል 98 ተጠርጣሪዎች የተያዙ ሲሆን፣ የክልሉ ፀጥታ ኃይሎች 54 ያህሉን በቁጥጥር ሥር ሲያውሏቸው የተቀሩት በፌዴራል ፖሊስ ነው የተያዙት፡፡

ከሶማሌ ክልል በግጭቱ የተሳተፉ 29 ተጠርጣሪዎች ቢኖሩም፣ እስካሁን የተያዙት ግን አምስት ብቻ እንደሆኑ ሚኒስትሩ በመግለጫቸው ተናግረዋል፡፡ አምስቱን ተጠርጣሪዎች በቁጥጥር ሥር ያዋላቸው የፌዴራል ፖሊስ እንደሆነ ሚኒስትሩ ገልጸዋል፡፡

በ2010 ዓ.ም. በሶማሌና በኦሮሚያ ክልሎች የተከሰተው ግጭት ከሞላ ጎደል ተረጋግቷል ሲሉ ሚኒስትሩ ተናግረዋል፡፡ ሚኒስትሩ ግጭቱ የተረጋጋ ቢሆንም ግን መቶ በመቶ ቆሟል ለማለት ግን እንደማይቻልም አስረድተዋል፡፡

በባሌ፣ ቦረናና ጉጂ አካባቢዎች ግጭቶች ተከስተው እንደነበር የገለጹት ሚኒስትሩ፣ የሰው ሕይወት እንደጠፋና ንብረትም እንደወደመ ተናግረዋል፡፡