Skip to main content
x
ኢዴፓ የከፍተኛ ትምህርት ተቋማት ማኅበረሰቡ አንድነታቸውን እንዲያጠናክሩ ጥሪ አቀረበ

ኢዴፓ የከፍተኛ ትምህርት ተቋማት ማኅበረሰቡ አንድነታቸውን እንዲያጠናክሩ ጥሪ አቀረበ

በተለያዩ የከፍተኛ ትምህርት ተቋማት የሚገኙ ተማሪዎች፣ መምህራንና ሠራተኞች አንድነታቸውን ከምንጊዜውም በላይ በማጠናከር አብሮነትን፣ መከባበርንና መቻቻልን የሚንዱ እኩይ ድርጊቶችን በጋራ እንዲከላከሉ የኢትዮጵያውያን  ዴሞክራሲያዊ ፓርቲ (ኢዴፓ) ጥሪውን አስተላለፈ፡፡

ፓርቲው ይህን ጥሪ ያስተላለፈው፣ ‹‹የወቅቱ ጥያቄ አገርን ከመፍረስ አደጋ የማዳን ነው›› በሚል ርዕስ ዓርብ ታኅሳስ 6 ቀን 2010 ዓ.ም. ባወጣው መግለጫ ነው፡፡

ከዚህ በተጨማሪም በስፖርት ማዘውተሪያ ሥፍራዎች የዘር ልዩነት በመፍጠር ግጭት የሚቆሰቁሱ አካላትን ስፖርት ወዳድ የሆነው ዜጋ ሁሉ፣ አደጋው የአገር አንድነትና ህልውና ላይ ሊያስከትል የሚችለውን ቀውስ በመረዳት ዙሪያውን በንቃት በመጠበቅ፣ ከምንጊዜውም በላይ ዘረኝነትን በአንድነት እንዲያወግዝ የፓርቲው ሥራ አስፈጻሚ ጥሪውን አስተላልፏል፡፡

ኢዴፓ በአገሪቱ ሕዝቦች መካከል ባለፉት 26 ዓመታት ከአንድነት ይልቅ ልዩነት ቦታ ተሰጥቶት ሲሰበክ መቆየቱ ውሎ አድሮ ዋጋ እንደሚያስከፍል በተደጋጋሚ ሲገልጽ መቆየቱን አስታውሶ፣ ይህ በአገር ላይ የተጋረጠው አደጋ ዋነኛ መነሻ ምክንያቱ መንግሥት እየተከተለ ያለው ቋንቋንና ብሔረሰባዊ ማንነትን መሠረት ያደረገ የፌዴራል አደረጃጀት በመሆኑ፣ ይህን የአደረጃጀት መመዘኛ እንዲፈተሽ ሲወተውት መቆየቱንም አውስቷል፡፡

በመሆኑም መንግሥት ባለው መዋቅር ተጠቅሞ ይህ ችግር ተባብሶ እንደ አገርም እንደ ሕዝብም ዋጋ እንዳያስከፍል፣ የማረጋጋት ሥራ በአስቸኳይ እንዲያከናውን ጥሪውን ለመንግሥት አቅርቧል፡፡

በተጨማሪም በዚህ አስነዋሪ ድርጊት ላይ በመሠማራት ጉዳዩን ያባባሱና በግጭቱ ተሳታፊ የሆኑ አካላትን አጣርቶ ለሕግ እንዲያቀርብ ኢዴፓ የጠየቀ ሲሆን፣ ለዘለቄታው ግን ለግጭቶችና ለልዩነቶች በር የከፈተውን የቋንቋና ብሔረሰባዊ ማንነትን መሠረት ያደረገውን የፌዴራል ሥርዓቱን በጥልቀት ፈትሾ፣ ኢትዮጵያንና ሕዝቧን የሚመጥን ፌዴራላዊ አደረጃጀት እንዲኖር የሚያስችል ሁኔታ በአስቸኳይ እንዲፈጠር፣ በአጠቃላይም የሕዝቡን ሰብዓዊና ዴሞክራሲያዊ መብቶች በተሟላ ሁኔታ በማክበር ዘለቄታዊ የፖለቲካ መረጋጋት የሚፈጠርበት ምኅዳር በአስቸኳይ እንዲያመቻች ጥሪውን አቅርቧል፡፡

‹‹የአገሬ ጉዳይ ያገባኛል፣ ያስጨንቀኛል የሚሉ ሁሉም ወገኖች ወደ ማንወጣበት አዘቅት ውስጥ ከመግባታችን በፊት የሚጠበቅባቸውን ኃላፊነት እንዲወጡ፤›› ሲልም ኢዴፓ ጥሪውን አስተላልፏል፡፡