Skip to main content
x

ከፍተኛው ፍርድ ቤት በእነ በቀለ ገርባ ክስ ላይ ተጠርተው ሳይገኙ በቀሩ ምስክሮች ላይ ትዕዛዝ ሳይሰጥ ተበተነ

የፌዴራል ከፍተኛ ፍርድ ቤት የልደታ አራተኛ የወንጀል ምድብ ችሎች ጠቅላይ ሚኒስትር ኃይለማርያም ደሳለኝን ጨምሮ ሌሎች በእነ አቶ በቀለ ገርባ መዝገብ ለተከሰሱ ታሳሪዎች ለምስክርነት ተጠርተው ባልቀረቡ ምስክሮች ላይ ትዕዛዝ ያስተላልፋል ተብሎ ቢጠበቅም፣ ትዕዛዝ ሳይሰጥ ለሌላ ጊዜ በቀጠሮ ተበተነ፡፡

ፍርድ ቤቱ በእነ አቶ በቀለ ገርባ የክስ መዝገብ ለተከሰሱ 22 ታሳሪዎች ምስክር እንዲሆኑ የተጠሩት ጠቅላይ ሚኒስትሩን ጨምሮ የኦሮሚያ ክልል ፕሬዚዳንት አቶ ለማ መገርሳ፣ የኦሮሞ ሕዝቦች ዴሞክራሲያዊ ድርጅት (ኦሕዴድ) ጽሕፈት ቤት ኃላፊ አቢይ አህመድ (ዶ/ር)፣ የለገዳዲ ከንቲባ ወ/ሮ ጫልቱ ሳኒንና የዕድሜ ልክ እስር ተፈርዶባቸው በማረሚያ ቤት የሚገኙት የቀድሞ የአንድነት ለፍትሕና ለዴሞክራሲ ፓርቲ አመራር የነበሩት አቶ አንዷለም አራጌ ምስክርነት ለመስማት ከታህሳስ 17 ቀን 2010 ዓ.ም. እስከ ታሀሳስ 19 ቀን 2010 ዓ.ም. ቀጠሮ ይዞ ነበር፡፡

ነገር ግን ከትናንት ወዲያ የጠቅላይ ሚኒስትሩ ጽሕፈት ቤት ለፍርድ ቤቱ በአክብሮት በላከው ደብዳቤ ጠቅላይ ሚኒስትሩ በሥራ መደራረብ ምክንያት ለምስክርነት መቅረብ እንዳልቻሉ ጠቅሶ ተለዋጭ ቀን ጠይቆ ነበር፡፡ ዛሬ ደግሞ በተመሳሳይ የኦሕዴድ ጽሕፈት ቤት ከኦሮሚያ ክልል ለምስክርነት የተጠሩ የሥራ ኃላፊዎች በአገራዊ ጉዳዮች ላይ ውይይት እያደረጉ በመሆኑ መገኘት ስለማይችሉ ተለዋጭ ቀን እንዲሰጣቸው ፍርድ ቤቱን በአክብሮት ጠይቀው ነበር፡፡ አቶ አንዷለምም መቅረብ ሳይችሉ ቀርተዋል፡፡

ፍርድ ቤቱ ለምስክርነት የተጠሩት የሥራ ኃላፊዎች የተቀጠሩበት ቀን እስከዛሬ ታህሳስ 19 ቀን 2010 ዓ.ም. ድረስ ስለሆነ ቀኑ እስከሚጠናቀቅ ድረስ ጠብቆ ትዕዛዝ እንደሚያሳልፍ ገልጾ ነበር፡፡ ይህ ቀን ዛሬ ላይ ቢጠናቀቅም ፍርድ ቤቱ ትዕዛዝ ለመስጠት ለታህሳስ 27 ቀን 2010 ዓ.ም. ቀጠሮ ሰጥቶ ተበትኗል፡፡

በተለምዶ ፍርድ ቤቱ ለእንደዚህ ዓይነት ጉዳዮች ወዲያውኑ ነበር ትዕዛዝ እየሰጠ የሚያልፈው፡፡  

ፍርድ ቤቱ ሌሎች ቀሪ ምስክሮችን ለመስማት ከየካቲት 5 ቀን 2010 ዓ.ም. እስከ የካቲት 9 ቀን 2010 ዓ.ም. ቀጠሮ ይዞ ተበትኗል፡፡