Skip to main content
x
የስ ውኃ በደመወዝ ጭማሪ ምክንያት በተደረገ የሥራ ማቆም አድማ 89 ሠራተኞቹን አሰናበተ

የስ ውኃ በደመወዝ ጭማሪ ምክንያት በተደረገ የሥራ ማቆም አድማ 89 ሠራተኞቹን አሰናበተ

የደመወዝ ጭማሪን ምክንያት በማድረግ በተፈጠረ አለመግባባት የስ ፉድና ቤቨሬጅ ኃላፊነቱ የተወሰነ የግል ማኅበር፣ 89 የሚሆኑ ሠራተኞቹን ከሥራ መሰናበቱን አስታወቀ፡፡ በዚህም ሳቢያ ኩባንያው በከፊል ማምረት ማቆሙን ማወቅ ተችሏል፡፡

      በኩባንያውና በሠራተኞቹ መካከል የተፈጠረው አለመግባባት ከገና በዓል ቀደም ባሉት ቀናት ጀምሮ የተከሰተ ሲሆን፣ ለዚህም በዋነኛነት ኩባንያው ያደረገው የደመወዝ ማስተካከያ ወይም ጭማሪ እንደ ምክንያት ተገልጿል፡፡

      ኩባንያው ከገና በዓል ቀደም ብሎ ባሉት ቀናት ለሠራተኞች እስከ 15 በመቶ የደመወዝ ጭማሪ ማድረጉ፣ እንዲሁም ለበዓሉ ለሁሉም ሠራተኞች አምስት አምስት እሽግ ውኃ ማበርከቱን መግለጹና ይህም ሠራተኞችን አለማስደሰቱን ለጉዳዩ ቅርበት ያላቸው ሠራተኞች ለሪፖርተር አስረድተዋል፡፡

በስምምነታቸው መሠረት የደመወዝ ማስተካከያም ሆነ ጭማሪ መደረግ የነበረበት የኩባንያው ሒሳብ በውጭ ኦዲተር ኦዲት ከተደረገ በኋላና የተጣራ ትርፍ ከታወቀ በኋላ ቢሆንም፣ ነገር ግን ይህ ሳይደረግ ነው ኩባንያው የደመወዝ ጭማሪ ያደረገው ሲሉ የኩባንያው ሠራተኞች ጠቁመዋል፡፡

ከዚህ ቀደም በዓመት ሦስቴ ማለትም ለአዲሱ ዓመት፣ ለገና፣ እንዲሁም ለፋሲካ በዓል ለሁሉም ሠራተኞች አምስት በመቶ ብር ይሰጥ የነበረ ቢሆንም፣ አሁን ግን ይህ ቀርቶ ወደ ውኃ መቀየሩ ተቃውሞ ማስነሳቱ ተገልጿል፡፡

በተጨማሪም ሠራተኞች ከሥራ ደኅንነት ጋር የተያያዙ ችግሮች መኖራቸውን ይናገራሉ፡፡

ኩባንያው ግን ታኅሳስ 26 ቀን 2010 ዓ.ም. 89 ሠራተኞች ሕገወጥ የሆነ የሥራ ማቆም አድማ በማድረግ ኩባንያውን ለኪሳራ ዳርገዋል በማለት ከሥራ አሰናብቷቸዋል፡፡

‹‹ይህ ተቀባይነት የሌለው ድርጊት ነው፣ ኩባንያችንንም ችግር ውስጥ ከቶታል፤›› ሲሉ የኩባንያው ምክትል ዋና ሥራ አስኪያጅ አቶ ወንድወሰን ረጋሳ ለሪፖርተር ተናግረዋል፡፡

‹‹የደመወዝ ጭማሪው በቂ ከመሆኑም በላይ፣ ኩባንያው ኪሳራ ላይ ሆኖ እንኳን ሠራተኞችን ለመርዳት ስንል ያደረግነው ነው፤›› በማለት አቶ ወንድወሰን አስረድተዋል፡፡

በአሁኑ ጊዜ ኩባንያው ዓለም ገና ካሉት ሦስት ፋብሪካዎች ሁለቱ ሥራ ማቆማቸውን፣ አንዱ ብቻ እየሠራ እንደሚገኝ ጠቁመዋል፡፡ ‹‹ሁለቱ ኩባንያዎች ሥራ ካቆሙ ስምንት ቀናት በማስቆጠራቸው ለእኛ ይኼ ትልቅ ኪሳራ ነው፤›› ብለዋል፡፡

የስ ውኃ 500 ያህል ሠራተኞች ሲኖሩት፣ ውኃ አሽጎ በመሸጥ ትልቅ ድርሻ እንዳለው ይታወቃል፡፡

በሠራተኞቻቸውና በኩባንያው የተፈጠረውን ችግር ለመፍታት የኦሮሚያ ክልል ሠራተኛና ማኅበራዊ ጉዳይ ቢሮ ጣልቃ መግባቱን ለማወቅ ተችሏል፡፡

‹‹አሁን ጉዳዩን ገና እያጣራን ነው፤›› ሲሉ የቢሮው ኃላፊ ወ/ሮ ፈትያ መሐመድ ለሪፖርተር ተናግረዋል፡፡