Skip to main content
x
የአዲስ አበባ መንገዶች ባለሥልጣን የሁለት ተላላፊ መንገዶችን ዲዛይን ሥራ ማጠናቀቁን አስታወቀ

የአዲስ አበባ መንገዶች ባለሥልጣን የሁለት ተላላፊ መንገዶችን ዲዛይን ሥራ ማጠናቀቁን አስታወቀ

የአዲስ አበባ መንገዶች ባለሥልጣን ለከተማው ትራፊክ መጨናነቅ መንስዔ ናቸው በማለት ከዓምና ጀምሮ ሰባት አደባባዮችን ሲያፈርስ ቆይቶ፣ ከእነዚህ ውስጥ በሁለቱ ላይ ተላላፊ መንገዶችን ለመገንባት የሚያስችል ዝግጅት ማድረጉን አስታውቋል፡፡

ከባለሥልጣኑ የተገኘው መረጃ እንደሚጠቅሰው፣ አደባባዮቹ በፈረሱባቸው አካባቢዎች ተላላፊ መንገዶች እንዲሠራላቸው ከሚደረጉት መካከል ሁለቱ መንገዶች በቀለበት መንገዱ ውስጥ የሚገኙት የቦሌ ሚካኤልና ልኳንዳ 18 ማዞሪያ አካባቢ የነበሩት አደባባዮች ናቸው፡፡

የትራፊክ መጨናነቁን ለማቃለል ሲባል መጀመርያ አደባባዮቹን በማፍረስ በጊዜያዊነት በትራፊክ መብራት ተሽከርካሪዎች እንዲስተናገዱ መደረጉን የሚገልጸው ባለሥልጣኑ፣ ለዘለቄታው ግን አደባባዮቹ በነበሩባቸው ቦታዎች ላይ ተላላፊ መንገድ እንዲገነባ በተያዘው ዕቅድ መሠረት አሁን የሁለቱን አደባባዮች ተላላፊ መንገድ ለመገንባት የሚያስችል ዝግጅት እየተደረገ መሆኑን አስታውቋል፡፡ በዚሁ መሠረት በቅድሚያ እንደሚገነቡ ለሚጠበቁት የቦሌ ሚካኤልና የ18 ማዞሪያ ተላላፊ መንገዶች ግንባታ የሚሆን የዲዛይን ሥራ ተጠናቆ ወደ ግንባታ ለመግባት ጨረታ መውጣቱ ታውቋል፡፡ አደባባዮቹ በነበሩባቸው ቦታዎች ላይ የሚሠሩትን ተላላፊ መንገዶች የዲዛይን ሥራ ያከናወኑት ሄክና ዩኒኮን የተባሉ አማካሪ ድርጅቶች መሆናቸው ታውቋል፡፡

በሁለቱ ቦታዎች የሚገነቡት ተላላፊ መንገዶች በአራት አቅጣጫ ተሽከርካሪዎችን ከላይና ታች ማስተናገድ የሚያስችሉ ማሳለጫ መንገዶች ይሆናሉ፡፡ ይህም በእነዚህ ቦታዎች ላይ በጊዜያዊነት በመብራት እየተስተናገደ ያለውን የተሽከርካሪዎች እንቅስቃሴ በአዳዲስ ተጨማሪ መንገዶች ፍሰቱን በማስተናገድ በአሁኑ ወቅት በአካባቢዎቹ የሚታየውን መጨናነቅ እንደሚፈታ የመንገዶቹ ግንባታ ተስፋ ተጥሎበታል፡፡

ለከተማው የትራፊክ መጨናነቅ ተፅዕኖ አሳድረዋል የተባሉት አደባባዮች ከፈረሱ በኋላ በአካባቢው ተጨማሪ ግንባታ በማካሄድ በትራፊክ መብራት እንዲስተናገዱ መደረጉ መጨናነቁን ጋብ በማድረግ መጠነኛ የትራፊክ ፍሰት ዕፎይታ እንዲኖር አስችሏል፡፡ ሆኖም እንደ መካኒሳ ሚካኤል ባሉት አካባቢዎች የሚታየው መጨናነቅ ግን ብዙም እንዳልተሻሻለ እየታየ ነው፡፡ በፈረሱት አደባባዮች ምትክ የተተከሉት የትራፊክ መብራቶች ዘላቂ መፍትሔ እንደማይሆኑ ስለታመነበት፣ አደባባዮቹ በነበሩባቸው ቦታዎች ተላላፊ መንገዶች መገንባት ችግሩን ሊያቃልለው እንደሚችል ይጠበቃል፡፡

እንዲፈርሱ በተደረጉት አደባባዮች በነበሩበት ቦታ ላይ በተመሳሳይ ተላላፊ መንገዶች እንደሚገነባ ተገልጿል፡፡ ለእነዚህም ቦታዎች እንደየአካባቢው ሁኔታ ምቹ ይሆናል ተብሎ የሚታሰበው ዲዛይን እየተሠራላቸው ነው፡፡

ባለሥልጣኑ እስካሁን ያፈረሳቸው አደባባዮችና በጊዜያዊነት የትራፊክ እንቅስቃሴያቸው በመብራት እንዲስተናገድ ያደረጋቸው አደባባዮች ኢምፔሪያል፣ ካዲስኮ፣ ሳሪስ አቦ፣ ለቡ መብራት ኃይል፣ 18 ማዞሪያ በሚካኤል መካኒሳ አደባባዮች ናቸው፡፡