Skip to main content
x
ለክቡር ሚኒስትሩ አንድ ደላላ ይደውልላቸዋል

ለክቡር ሚኒስትሩ አንድ ደላላ ይደውልላቸዋል

[ክቡር ሚኒስትሩ በከተማችን ትልቁ ሆቴል ውስጥ የሚስታቸውን ልደት ደግሰዋል፡፡ በልደቱ ከተገኙ እንግዶች መካከል ከአንዱ ጋር እያወሩ ነው]

  • ክቡር ሚኒስትር በጣም ነው የሚገርመው፡፡
  • ምኑ ነው የሚገርመው?
  • ከደገሱ አይቀር እንዲህ ነው እንጂ፡፡
  • እኔን ታውቀኝ አይደል እንዴ?
  • በእውነት ክቡር ሚኒስትር ኮራሁብዎት፡፡
  • በምኑ ነው የኮራህብኝ?
  • እዚህ ልደት ላይ መቼም የወጣው ወጪ አምስት መለስተኛ ሠርግ ይደግሳል፡፡
  • ሚስቴ እኮ ለእኔ ሁሉ ነገሬ ናት፡፡
  • እንዴት ክቡር ሚኒስትር?
  • አሁን ለደረስኩበት ስኬት ዋነኛውን ሚና የተጫወተችው እሷ ናት፡፡
  • ለነገሩ ስለሚስትዎ ሰምቻለሁ፡፡
  • ምንድነው የሰማኸው?
  • ሁሉም የእርስዎ ቢዝነስ በሚስትዎ ስም ነው አሉ፡፡
  • የቢዝነሶቼ ሐሳብ ሁሉ የመነጨው ከእሷ እኮ ነው፡፡
  • የሚወራውማ ብዙ ነው፡፡
  • ምንድነው የሚወራው?
  • ክቡር ሚኒስትሩ የሚዘርፉትን ገንዘብ በሚስታቸው ስም ነው የሚያንቀሳቅሱት ይባላል፡፡
  • ሰው መቼም ምቀኛ ነው፡፡
  • እንዴት ክቡር ሚኒስትር?
  • ለምን ሠራህ? ለምን ተለወጥክ? ለምን አደግህ ነው?
  • አይ ክቡር ሚኒስትር ሰው መቼም ዝም ብሎ አያወራም፡፡
  • አሁን ለሚስቴ እዚህም ደገስኩ ቀበሌ አዳራሽ ውስጥም ደገስኩ ሰው ማውራቱን አያቆምም፡፡
  • ታዲያ ሰው ከመሬት ተነስቶ ነው የሚያወራው?
  • ወዳጄ የሰውን ወሬ ትተህ በጊዜ መያዝ ያለብህን መያዝ ነው የሚያዋጣው፡፡
  • እሱስ እውነትዎትን ነው ክቡር ሚኒስትር፡፡
  • ስማ ይኼን ሁሉ ሰው ቀጥሬ በማሠራቴ ልመሰገን ነበር የሚገባኝ፡፡
  • ክቡር ሚኒስትር ግን ትንሽ ደፋር ነዎት፡፡
  • እንዴት?
  • ባለሥልጣን ሆነው እንዲህ በአደባባይ የሚስትዎትን ልደት ሲደግሱ ይገርማል፡፡
  • ሠርቼ ነዋ ያመጣሁት፡፡
  • ሠርቼ ነው ሰርቄ ያሉት?
  • ምን አልከኝ?
  • ሠርቼ ነው ያሉኝ?
  • እኔ እኮ አንድ አይሉ ሁለት ፋብሪካ ነው ያለኝ ሰው ነኝ፡፡
  • እ…
  • ከአንድ ሺሕ በላይ ሠራተኛ ቀጥሬ አሠራለሁ፡፡
  • ምን ይቀልዳሉ?
  • ቅፅል ስሜ ማን እንደሆነ ታውቃለህ?
  • ማን ነው?
  • ኢንዱስትሪ ፓርክ፡፡
  • ዋናው ጥያቄ ይኼን ሀብት ከየት አመጡት የሚለው ነው፡፡
  • ሠርቼ አልኩህ እኮ፡፡
  • እሱን ሲጠየቁ ያወራሉ፡፡
  • ማን አባቱ ነው የሚጠይቀኝ?
  • ለማንኛውም ከሰሞኑ ሊጣራ ይችላል፡፡
  • ምኑ?
  • የሀብት ምንጭዎ!

[ክቡር ሚኒስትሩን ከሆቴሉ የሺፍት ማናጀር ጋር እያወሩ ነው]

  • እንግዶቹን በደንብ እያዝናናችኋቸው ነው?
  • በሚገባ እንጂ ክቡር ሚኒስትር፡፡
  • በየጠረጴዛው የምትጠየቁትን ሁሉ አቅርቡ፡፡
  • አያስቡ ክቡር ሚኒስትር፡፡
  • ድግሱ ሲያልቅ እንደተለመደው አምጥተህልኝ እፈርማለሁ፡፡
  • ምኑን ነው የሚፈርሙት?
  • ቢሉን ነዋ፡፡
  • አልሰሙም እንዴ ክቡር ሚኒስትር?
  • ምኑን?
  • አሠራራችንን ቀይረናል፡፡
  • ለምን?
  • ባለቤቱ ገቢ ስለተደረጉ  ነዋ፡፡
  • እና ፈርሞ መጠቀም ቀረ?
  • በፊርማ መጠቀም ቀርቷል፡፡
  • ታዲያ በምንድነው መጠቀም የሚቻለው?
  • በክፍያ!

[በክቡር ሚኒስትሩ ሚስት ልደት ማግሥት የፋብሪካቸው ሠራተኞች በማመፃቸው ፋብሪካ በፍጥነት ይሄዳሉ]

  • ፀጥታ፣ ፀጥታ ተወካይ አላችሁ?
  • እኔ ተወካያቸው ነኝ፡፡
  • ስለዚህ ከአንተ ጋር እንነጋገር፡፡
  • ይቻላል ክቡር ሚኒስትር፡፡
  • ለምንድነው በጠዋት ፋብሪካውን የምትበጠብጡት?
  • ጥያቄና ቅሬት አለን ክቡር ሚኒስትር፡፡
  • የምን ጥያቄ ነው ያለህ?
  • መቼም እኛ የማንሰማው ነገር እንደሌለ ያውቃሉ?
  • ጥያቄህን አቅርብ እኮ ነው የተባልከው?
  • ክቡር ሚኒስትር እኛ የደመወዝ ጭማሪ ጠይቀን ነበር፡፡
  • ታዲያ ምን ተባላችሁ?
  • ድርጅቱ አሁን የደመወዝ ጭማሪ ማድረግ አይችልም ተባልን፡፡
  • የገንዘብ አቅም ስለሌለን እኮ ነው፡፡
  • እርስዎ ግን ትናንትና ለሚስትዎ ልደት በሚሊዮን የሚቆጠር ገንዘብ ማውጣትዎን ሰምተናል፡፡
  • ምን?
  • ክቡር ሚኒስትር አሁን የደመወዝ ጭማሪ ካልተደረገልን አመፃችንን እንቀጥልበታለን፡፡
  • እኔ በገዛ ብሬ የፈለግኩትን ባደርግበት ምን አገባችሁ?
  • ገንዘቡ የራሴ ነው የሚሉ ከሆነማ ሥራውን ራስዎ ይሥሩት?
  • አንተ ግን ከእኔ ጋር እንዴት ብትናናቅ ነው እንደዚህ የምታወራው?
  • ክቡር ሚኒስትር እየጠየቅን ያለነው መብታችንን ነው፡፡
  • አንተ ለመሆኑ ትክክለኛው የሠራተኛ ማኅበር  ተወካይ ነህ?
  • እርስዎማ የሠራተኛ ማኅበር እንዳይቋቋም ይፈልጉ ነበር፡፡
  • አሁን ምንድነው የምትፈልጉት?
  • እንዲጨመርልን ነዋ ክቡር ሚኒስትር፡፡
  • ምኑ ነው የሚጨመረው?
  • ደመወዛችን ይጨመርልን፣ ካልተጨመረልን ምንም ሥራ አንሠራም፡፡
  • እንደዚያ ከሆነማ ሁላችሁንም አባርራችኋለሁ፡፡
  • እሱንማ ማድረግ አይችሉም፡፡
  • እንዴት?
  • ቋሚ ሠራተኞች እኮ ነን፡፡
  • ብትሆኑስ?
  • እንደዚያ ካደረጉ ለእኛ የሚከፍሉት ካሳ ፋብሪካውን ያሸጥዎታል፡፡
  • ምን ይደረግ ነው ታዲያ የምትሉት?
  • ደመወዛችን ከፍ ይበል፡፡
  • የእናንተ ደመወዝ ከፍ ሲል ሌላ ነገሬ ከፍ ይልብኛል፡፡
  • ሌላ ምን?
  • ደሜ!

[ክቡር ሚኒስትሩ ከፋብሪካቸው ወደ መሥሪያ ቤታቸው እንደገቡ ግቢው ወስጥ ጫጫታ ይሰማሉ፡፡ ጸሐፊያቸውን ወዲያው ጠሯት]

  • የምን ጫጫታ ነው?
  • ክቡር ሚኒስትር ችግር ተፈጥሯል፡፡
  • የምን ችግር?
  • ሠራተኞቹ አምፀው ሥራ አንገባም እያሉ ነው፡፡
  • ምን ማለት ነው ሥራ አንገባም ማለት?
  • ክቡር ሚኒስትሩ ካላናገሩን ወደ ሥራ አንመለስም እያሉ ነው፡፡
  • አማካሪዬ ለምን አያናግራቸውም?
  • ሞክሯል ግን አልቻለም፡፡
  • አንቺስ አላናገርሻቸውም?
  • እኔም ሞክሬ አልቻልኩም፡፡
  • ምንድነው ችግራቸው?
  • ጉዳዩን አላወቅኩትም፡፡
  • ተወካይ አላቸው?
  • አንድ ተወካይ አላቸው፡፡
  • እሱን አስጠሪው፡፡

[የሠራተኞቹ ተወካይ የክቡር ሚኒስትሩ ቢሮ ገባ]

  • ምን ተፈጥሮ ነው?
  • ቅሬታ አለን ክቡር ሚኒስትር፡፡
  • ምንድነው ቅሬታችሁ?
  • ዋነኛው ኪራይ ሰብሳቢ እዚሁ እኛ ውስጥ ነው ያለው፡፡
  • ምን?
  • እኛ ኪራይ ሰብሳቢነትና ሙስናን እንዋጋለን ስንል ዋናው ሙሰኛ ለካ በመካከላችን ነበር፡፡
  • ይኼንንማ በድንጋይ መውገር ነው፡፡
  • የዚሁ መሥሪያ ቤት ሠራተኛ ሆኖ የከተማችን ሀብታም ተርታ ውስጥ ገብቷል፡፡
  • ምን ትቀልዳለህ?
  • ክቡር ሚኒስትር አንድ አይሉ ሁለት ፋብሪካ አለው አሉ፡፡
  • እ…
  • መርከብ ሳይቀር አለው አሉ፡፡
  • አገሪቷ ወደብ የላትም እኮ?
  • ለነገሩ የመዝናኛ መርከብ ነው ያለው፣ ግን ወደፊት በዚሁ ከቀጠለ የንግድ መርከብም ይኖረዋል፡፡
  • እ…
  • ሰሞኑን ለሚስቱ ልደት ድግስ ያወጣው ወጪ በሚሊዮን ብር የሚቆጠር ነው፡፡
  • ይኼን ሰውዬ አውቀዋለሁ ልበል?
  • ሊያውቁት ይችላሉ?
  • ታዲያ ምሕረት ቢደረግለት አይሻልም?
  • ለምን ሲባል?
  • ያው መንግሥት ራሱ ሰሞኑን ለታሰሩ ፖለቲከኞች ምሕረት አድርጓል አይደል?
  • ይኼ ግን ምሕረት አይገባውም፡፡
  • ወይም ይምከራ?
  • ለእሱ የሚያስፈልገው ምክር አይደለም፡፡
  • ታዲያ ምንድነው የሚያስፈልገው?
  • መወገር!

[ለክቡር ሚኒስትሩ አንድ ደላላ ይደውልላቸዋል]

  • ክቡር ሚኒስትር ስልክዎ እኮ በጣም አስቸገረኝ?
  • ዛሬ ስንት ጣጣ ውስጥ ገብቼ ነበር፡፡
  • ምነው?
  • ሲያቀብጠኝ የሚስቴን ልደት አክብሬ ሠራተኞቼ አመፁብኝ፡፡
  • በዚህ ወቅት እንዲህ በግልጽ ድግስ ማድረግ ምን አስፈለገ?
  • እኔማ ትልቅ ትምህርት ነው የተማርኩት፡፡
  • አሁን የደወልኩት አንድ ነገር ላማክርዎት ነው፡፡
  • ምንድነው እሱ?
  • አንድ ሁለት ሰው ደውሎ ሲጠይቀኝ ለምን ወደ ቢዝነስ አንቀይረውም ብዬ ነው፡፡
  • ጉዳዩ ምንድነው?
  • መንግሥት ምሕረት አደርጋለሁ ብሏል አይደል?
  • አዎ ብሏል፡፡
  • ታዲያ ይኼን ለምን ወደ ቢዝነስ አንቀይረውም?
  • እንዴት አድርገን?
  • እንዲፈቱላቸው የሚፈልጉ ሰዎች አናግረውኝ ነበር፡፡
  • እሺ?
  • አንዱ ደውሎ የሚደረገውን ነገር አደርጋለሁ ብቻ ወንድሜን አስፈቱልኝ ብሏል፡፡
  • ኧረ እባክህ? ሁሉን ነገር ማድረግ ይችላል?
  • ስለእሱ አያስቡ ስልዎት? ከእኛ የሚጠበቀው ሊስት ውስጥ ወንድሙ እንዲገባ ማድረግ ነው፡፡
  • የምኑ ሊስት?
  • የሚፈቱት ሊስት ውስጥ ነዋ፡፡
  • ይቺ አሪፍ ሐሳብ ናት፡፡
  • አሁን ወደ ሥራ መግባት ነው፡፡
  • ምንድነው የምናደርገው?
  • ካስፈለገ ማስታወቂያ ማስነገር ነው፡፡
  • ምን ብለን?
  • የታሰሩ እናስፈታለን!