Skip to main content
x
የፌዴራል የፀጥታ ኮማንድ ፖስት በአዲስ አበባና በሌሎች አካባቢዎች  ጥንቃቄ እንዲደረግ አሳሰበ

የፌዴራል የፀጥታ ኮማንድ ፖስት በአዲስ አበባና በሌሎች አካባቢዎች  ጥንቃቄ እንዲደረግ አሳሰበ

  • በአዲስ አበባ የፕሪሚየር ሊግ ውድድር ለአንድ ሳምንት ይቋረጣል

የፌዴራል መደበኛ የፀጥታ ኮማንድ ፖስት በጥምቀት በዓልና በአፍሪካ ኅብረት የመሪዎች ጉባዔ ወቅት፣ የፀጥታ ችግር ሊፈጠር እንደሚችል በመግለጽ ጥንቃቄ እንዲደረግ አሳሰበ፡፡

የፀጥታ ኮማንድ ፖስቱ ባወጣው መግለጫ፣ የጥምቀት በዓልም ሆነ የኅብረቱ የመሪዎች  ጉባዔ በየዓመቱ ያለምንም ችግር ሲከበር እንደቆየ በማስታወስ፣ ዘንድሮ ግን ሁነቶቹ በሰላም እንዳይከናወኑ ለማድረግ በአዲስ አበባና በሌሎች ከተሞች እንቅስቃሴ መኖሩን ጠቁሟል፡፡

ይህንኑ አስመልክቶም ለፌዴራል ፖሊስ መደበኛ የፀጥታ ኮማንድ ፖስት የሚደርሱ መረጃዎች፣ የፀጥታ ችግር ለመፍጠር የሚደረግ እንቅስቃሴ መኖሩን ያመለከቱ መሆኑን አስታውቋል፡፡

ኮማንድ ፖስቱ መረጃዎቹን መሠረት በማድረግ የሥራ ሥምሪት ላይ እንደሚገኝም ገልጿል፡፡ ኅብረተሰቡም ከፀጥታ አስከባሪ አባላት ጋር ተቀናጅቶ በዓሉና ጉባዔው እስኪጠናቀቅ ድረስ እንዲተባበር ጥሪ አድርጓል፡፡

ከዚህ ባለፈ በማንኛውም ሁኔታ ሰላም ለማደፍረስ በሚንቀሳቀሱ ኃይሎች ላይ ተገቢና ሕጋዊ ዕርምጃ የሚወሰድ መሆኑን አስጠንቅቋል፡፡ እስካሁን ከተደረጉ የጥንቃቄ ዕርምጃዎች መካከል፣ በአዲስ አበባ ከተማ የሚካሄዱ የኢትዮጵያ ፕሪሚየር ሊግ ጨዋታዎች ለአንድ ሳምንት እንዲገፉ መወሰኑን ሪፖርተር ያገኛቸው መረጃዎች ያመለክታሉ፡፡