Skip to main content
x
ሩጫና ኢትዮጵያውያን አትሌቶች በዱባይ ማራቶን
ባለድሎቹ ሮዛ ደረጀና ሙሰነት ገረመው

ሩጫና ኢትዮጵያውያን አትሌቶች በዱባይ ማራቶን

ዓርብ ጥር 18 ቀን 2010 ዓ.ም. የተባበሩት ዓረብ ኤምሬት ዱባይ አውራ ጎዳናዎች በኢትዮጵያውያንና ከፍ ብሎ በተውለበለው ሰንደቃቸው ጎልተው የታዩበት ክስተት ዕውን ሆኗል፡፡ ዓለም አቀፍ አትሌቲክስ ፌዴሬሽኖች ማኅበር (አይኤኤፍ) በወርቅ ደረጃ ከሚመድባቸው ዓመታዊ የማራቶን ውድድሮች አንዱ እንደሆነ በሚነገርለት ዱባይ ማራቶን፣ ኢትዮጵያውያኑ አትሌቶች በሁለቱም ፆታ ለውድድሩ የተዘጋጀውን ሜዳሊያና የገንዘብ ሽልማት ጠራርገው የግላቸው በማድረግ ብቃታቸውን ለዓለም አሳይተዋል፡፡ በወንዶች ሙስነት ገረመው፣ በሴቶች ደግሞ ሮዛ ደረጀ የወርቅ ሜዳሊያውን በመውሰድ ቀዳሚዎች ሆነዋል፡፡

አሸናፊው አትሌት 200,000 የአሜሪካ ዶላር ተሸላሚ በሚሆንበት ዱባይ ማራቶን፣ ኢትዮጵያውያኑ አትሌቶች በሁለቱም ፆታ ማንንም ሳያስገቡ እስከ አሥራዎቹ ደረጃ በመያዝ እርስ በርስ የተፎካከሩበት መድረክ ሆኖ ተጠናቋል፡፡ በማራቶን ደረጃ ከዚህ ቀደም ታይቶም ሆነ ተሰምቶ በማይታወቅ በወንዶች ከአንደኛ እስከ ሰባተኛ ያለውን ደረጃ ከ2፣04 በታች በመግባት ብቸኛ እንዲሆኑ አድርጓቸዋል፡፡ በሴቶቹም ቢሆን የቦታው አዲስ ክብረ ወሰን ከመሆኑም በላይ አሸናፊዋ ሮዛ ደረጀ ያለፈውን ዓመት ሰዓት በ11 ሰከንድ በማሻሻል ርቀቱን ያጠናቀቀችው 2፡19.17 አጠናቃ ነው፡፡

በወንዶቹ ሙስነት ገረመው 2፡04.00 በመግባት አንደኛ ሲሆን፣ ልዑል ገብረ ሥላሴና ያለፈው ዓመት አሸናፊ ታምራት ቶላ 2፡04.02 እና 2፡04.06 አጠናቀው ሁለተኛና ሦስተኛ ወጥተዋል፡፡ እስከ 13ኛ ያለውን ደረጃ ይዘው ያጠናቀቁት ኢትዮጵያውያኑ አትሌቶች ናቸው፡፡ ሌላው የዱባይ ማራቶን ገጠመኝና የብቃት ጉዳይ ሆኗል፡፡ በሴቶችም ሮዛ ደረጀን ተከትለው የገቡ ፈይሴ ታደሰና የብርጓል መለሰ ሲሆኑ፣ 2፡19.30 እና 2፡19.35 በመግባት እንደ ወንዶቹ ሁሉ እንስቶቹም በትውልድ ኢትዮጵያዊት በዜግነት ባህሬናዊ አትሌት ስምንተኛ ደረጃ ላይ ጣልቃ ከመግባቷ ውጪ ቀሪውን እስከ 13ኛ ደረጃ ያለውን ይዘው ማጠናቀቅ ችለዋል፡፡ ይህ የዱባይ ማራቶን አዘጋጅ ለውድድሩ ካዘጋጀው አንድ ሚሊዮን ዶላር ውስጥ 12,000 ዶላሩን ካልሆነ የቀረው ሙሉ በሙሉ የኢትዮጵያውያኑ አትሌቶች እንዲሆን አድርጓል፡፡

የዱባይ ማራቶን ለአሸናፊ አትሌቶች 200,000 ዶላር የገንዘብ ሽልማት በማበርከት ከዓለም ቁጥር አንድ ሲሆን፣ በሁለተኛ ደረጃ እንደ ዱባይ ማራቶን ባይሆንም፣ 150,000 ዶላር በማበርከት የችካጎ ማራቶን ተጠቃሽ ነው፡፡ ይሁንና የዱባይ ማራቶን ከሌሎች ዓለም አቀፍ ማራቶኖች ልዩ የሚያደርገው ማንኛውም አትሌት መወዳደር እችላለሁ እስካለ ድረስ ምንም ዓይነት የመግቢያ ክፍያ አለመስጠቱ ነው፡፡ በዚህም ኬንያውያንና የሌሎችም አገሮች ታላላቅና ታዋቂ አትሌቶች በዱባይ ማራቶን እንደማይሳተፉ ምክንያት እንደሆነ የዘርፉ ሙያተኞች ይናገራሉ፡፡