Skip to main content
x
የአዲስ አበባ አስተዳደር በስድስት ወራት 60 ሔክታር መሬት ለጨረታ ለማቅረብ የያዘው ዕቅድ ሳይሳካ ቀረ

የአዲስ አበባ አስተዳደር በስድስት ወራት 60 ሔክታር መሬት ለጨረታ ለማቅረብ የያዘው ዕቅድ ሳይሳካ ቀረ

የአዲስ አበባ ከተማ አስተዳደር የከተማ ቦታ በሊዝ ስለመያዝ የወጣው አዋጅ ቁጥር 721/2004 ካወጣ በኋላ ለአገልግሎት መስጫ ግንባታዎች መሬት የሚቀርበው በጨረታ ብቻ መሆን ቢደነግግም፣ ባለፉት ስድስት ወራት ምንም ዓይነት መሬት አላቀረበም፡፡

የአዲስ አበባ ከተማ አስተዳደር ነሐሴ 18 ቀን 2009 ዓ.ም. ካወጣው 28ኛ ዙር ሊዝ ጨረታ ውጪ ባለፉት ስድስት ወራት በጨረታ መሬት አልቀረበም፡፡

ነገር ግን በ2010 በጀት ዓመት የመጀመሪያዎቹ ስድስት ወራት 50 ሔክታር መሬት በመደበኛ ሊዝ ጨረታ፣ አሥር ሔክታር መሬት ደግሞ በልዩ ሊዝ ጨረታ መሬት የማቅረብ ዕቅድ ነበረው፡፡

ነገር ግን ነሐሴ 18 ቀን 2009 ዓ.ም. ጨረታው ወጥቶ መስከረም 4 ቀን 2010 ዓ.ም. በተከፈተው ጨረታ 2.2 ሔክታር መሬት በተለያዩ ክፍላተ ከተሞች ከመቅረቡ ውጪ፣ በቀጣዩ ዓመት ስድስት ወራት የሊዝ ጨረታ አልነበረም፡፡

ነገር ግን አስተዳደሩ ባለፉት ስድስት ወራት በአጠቃላይ 50 ሔክታር መሬት በመደበኛ ሊዝ ጨረታ መሬት ለፈላጊዎች የማቅረብ ዕቅድ ነበረው፡፡ በ2009 ዓ.ም. የቀረበው 2.2 ሔክታር መሬት ወደ 2010 በጀት ዓመት ዞሮ በመሰላቱ አፈጻጸሙ 4.4 በመቶ ሆኖ ተመዘግቧል፡፡

ከዚሁ ጋር ብዙ የተባለለት የልዩ ሊዝ ጨረታም እንዲሁ የውኃ ሽታ ሆኖ መቅረቱን መረጃዎች ይጠቁማሉ፡፡ የሊዝ አዋጅ በተለይ የአገልግሎት መስጫ ግዙፍ ግንባታዎች በከተማ አስተዳደር ከንቲባዎች አገራዊ ፋይዳ አላቸው ተብለው በድርድር እስካላለፉ ድረስ የሚስተናገዱት በልዩ ጨረታ እንደሚሆን ያስረዳል፡፡

ነገር ግን የአዲስ አበባ አስተዳደር አንድ ወይም ሁለት ጊዜ ልዩ ጨረታ ከማውጣቱ ባሻገር፣ እስካሁን በዕቅዱ መሠረት በሚፈለገው ደረጃ መሬት አለማቅረቡ ተገልጿል፡፡

ባለፉት ስድስት ወራትም አስተዳደሩ አሥር ሔክታር መሬት በልዩ ጨረታ ለባለ ኮከብ ሆቴሎች፣ ለሆስፒታሎችና ለትምህርት ተቋማት ግንባታ የማቅረብ ዕቅድ ቢኖረውም ዕቅዱ ሳይሳካ ጊዜው ተጠናቋል፡፡

አስተዳደሩ መሬት ከማቅረብ አኳያ በ200 ፐርሰንት የሠራለት ለመንግሥታዊና መንግሥታዊ ላልሆኑ ተቋማት በምደባ ቦታ ለማቅረብ የያዘው ዕቅዱ ነው፡፡

በስድስት ወራት ለእነዚህ አካላት 20 ሔክታር መሬት ለማቅረብ አቅዶ 40 ሔክታር መሬት በማቅረብ፣ ዕቅዱን በ200 ፐርሰንት ማሳካት መቻሉን በሪፖርቱ አመልክቷል፡፡