Skip to main content
x
አዋሽ ባንክ በ22.3 ሚሊዮን ብር ዕዳ ተከሰሰ

አዋሽ ባንክ በ22.3 ሚሊዮን ብር ዕዳ ተከሰሰ

አዋሽ ባንክ በልደታ ክፍለ ከተማ ውስጥ ላስገነባውና ‹‹ባልቻ አባ ነፍሶ ቅርንጫፍ›› የሚል ስያሜ የሰጠውን ሕንፃ ለገነባለት ኮንትራክተር ከ22.3 ሚሊዮን ብር በላይ ክፍያ ባለመፈጸሙ፣ በፌዴራል ከፍተኛ ፍርድ ቤት ክስ ተመሠረተበት፡፡

ኮንትራክተሩ ጊጋ ኮንስትራክሽን ኃላፊነቱ የተወሰነ የግል ማኅበር ሁለት መሠረት ያለው ባለ አሥር ፎቅ ሕንፃ ለመገንባት፣ ከአዋሽ ባንክ ጋር ሰኔ 14 ቀን 2004 ዓ.ም. ውል ተፈራርመዋል፡፡

በውላቸው መሠረት ስለሥራው አካሄድ፣ ሥራው በአግባቡ መሠራቱን ማን እንደሚያረጋግጥ፣ ክፍያ እንዴትና በማን አረጋጋጭነት እንደሚፈጸምና ሌሎች ግዴታዎች በግልጽ መቀመጣቸውን ጊጋ ኮንስትራክሽን ኩባንያ በክሱ ዘርዝሮ አቅርቧል፡፡

ዘለቀ በላይ አርክቴክት ኃላፊነቱ የተወሰነ የግል ማኅበር የሕንፃው ግንባታ በአግባቡ መካሄዱን በየምዕራፉ ማረጋገጫ እየሰጠ ክፍያው በ21 ቀናት ውስጥ እንዲከፈል በውሉ የተገለጸ ቢሆንም፣ አዋሽ ባንክ 22,341,142 ብር ሳይከፍለው 100 ቀናት እንዳለፉት በክሱ ገልጿል፡፡

አዋሽ ባንክ በጊዜያዊ መረካከቢያ ሰነድ ሕንፃውን ኅዳር 13 ቀን 2009 ዓ.ም. የሕንፃ ግንባታው አፈጻጸም አርኪ መሆኑን የሚገልጽ ማረጋገጫ ሰርተፊኬት አዘጋጅቶ መረከቡንም አክሏል፡፡ ሕንፃውን ከተረከበው ከአንድ ዓመት በላይ እንዳለፈውም ጠቁሟል፡፡

ጊጋ ኮንስትራከሽን ኩባንያ እንዳስረዳው፣ አዋሽ ባንክ ክፍያውን በወቅቱ ስላልከፈለው ጉዳት ደርሶበታል፡፡ በመሆኑም ባንኩ ዋና ሥራው ለደንበኞች ገንዘብ በማበደር ከፍተኛ ወለድ ማግኘት ከመሆኑ አንፃር፣ ክፍያውን ባዘገየ ቁጥር የኮንትራክተሩን ገንዘብ በማበደር የወለድ ጥቅም እያገኘ መሆኑን ጠቁሞ፣ ባንኩ ተበዳሪዎችን በሚያስከፍለው ከፍተኛ የወለድ መጠን በመጨመር ክፍያውን እንዲፈጽምለት ለፍርድ ቤት ያቀረበው ክስ ያስረዳል፡፡