Skip to main content
x
ሦስተኛው የዓለም የቤት ውስጥ ውድድር ተጀመረ

ሦስተኛው የዓለም የቤት ውስጥ ውድድር ተጀመረ

  • ገንዘቤ ዲባባና ሐጎስ ገብረ ሕይወት ድል ቀንቷቸዋል

የዓለም አቀፍ አትሌቲክስ ፌዴሬሽኖች ማኅበር (አይኤኤኤፍ) በተለያዩ የአውሮፓና የአሜሪካ ከተሞች የሚያከናወነውንና ዘንድሮ ለሦስተኛ ጊዜ በሚካሄደው የቤት ውስጥ የአትሌቲክስ ውድድር ኢትዮጵያውያኑ ገንዘቤ ዲባባና ሐጎስ ገብረ ሕይወት በ1,500 ሜትርና በ3,000 ሜትር አሸናፊዎች ሆነዋል፡፡

አይኤኤኤፍ በስድስት የተለያዩ ከተሞች የሚያከናውነው የቤት ውስጥ የአትሌቲክስ ውድድር ባለፈው ቅዳሜ በጀርመኗ ካርልሰሩህ ከተማ ተጀምሯል፡፡ በዚሁ መሠረት በ1,500 ሜትር የተወዳደረችው ገንዘቤ ዲባባ ርቀቱን 3፡57.45 በሆነ ጊዜ አጠናቃ አሸንፋለች፡፡

በ3,000 ሜትር ወንዶች የተወዳደሩት ሐጎስ ገብረ ሕይወትና ዮሚፍ ቀልጀልቻ ርቀቱን 7፡37.91 እና 7፡38.67 በማጠናቀቅ አንደኛና ሁለተኛ በመሆን አጠናቀዋል፡፡ በኅትመት ምክንያት ሪፖርተር ውጤቱን ባያካትትም ውድድሩ ማክሰኞ ጥር 29 ቀን 2010 ዓ.ም. በሌላኛዋ የጀርመን ከተማ ዱሶልዶርፍ ተደርጓል፡፡ ሦስተኛው ውድድር ደግሞ ሐሙስ የካቲት 1 ቀን በስፔን ማድሪድ ይካሄዳል፡፡ የካቲት 3 ቀን  በአሜሪካ፣ በቀጣይ ደግሞ በእንግሊዝና በሌሎችም ከተሞች እንደሚቀጥል ታውቋል፡፡