Skip to main content
x
ኤጀንሲው በስድስት ወራት 182 ሚሊዮን ብር ገቢ መሰብሰቡን ገለጸ

ኤጀንሲው በስድስት ወራት 182 ሚሊዮን ብር ገቢ መሰብሰቡን ገለጸ

የፌዴራል ሰነዶች ማረጋገጫና ምዝገባ ኤጀንሲ በበጀት ዓመቱ የመጀመርያ ስድስት ወራት ሊሰበስበው አቅዶት ከነበረው የ190 ሚሊዮን ብር ገቢ፣ 182 ሚሊዮን ብር ገቢ መሰብሰቡን ገለጸ፡፡

ኤጀንሲው እንዳስታወቀው በ2010 የበጀት ዓመቱ አጋማሽ አገልግሎት በቁጥር እስከ 410‚925 የሚደርሱ ጉዳዮችን ለማስተናገድ ያቀደ ቢሆንም፣ ማስተናገድ የቻለው ግን 392‚244 ጉዳዮችን ነው፡፡ ባለጉዳዮችን በተመለከተ 902‚315 የሚደርሱ በግልና በድርጅት የሚመጡለትን ተገልጋዮች ለማስተናገድ አቅዶ፣ 884‚824 የሚሆኑ ባለጉዳዮችን ማስተናገዱን ለሪፖርተር ገልጿል፡፡ አፈጻጸሙም በጉዳዮችና በባለጉዳዮች ረገድ በቅደም ተከተል 95 እና 98 በመቶ መሆኑንም ኤጀንሲው አሳውቋል፡፡

በአጠቃላይ የስድስት ወራት በቴምብር ሽያጩ ያስመዘገበው የ182 ሚሊዮን ገቢ አፈጻጸሙ፣ የዕቅዱን 96 በመቶና “የላቀ” ውጤት ያስመዘገበበት እንደሆነ ጨምሮ ገልጿል፡፡ በተጠቀሰው ጊዜም በተፈቀደለት በጀት ወጪውን ተጠቅሞ ለመንግሥት ፈሰስ ለማድረግ አቅዶት ከነበረው 137 ሚሊዮን ብር ውስጥ የዕቅዱን 89.4 በመቶውን በማሳካት የ122.5 ሚሊዮን ብር ገቢ ለመንግሥት ፈሰስ መደረጉንም የኤጀንሲው ኃላፊዎች ለሪፖርተር አስረድተዋል፡፡

የዘንድሮው ስድስት ወራት ዕቅድ አምና ከነበረው ተመሳሳይ ወራት ዕቅድ አንፃር ሲታይ በጉዳይ 41‚333፣ በተገልጋይ ቁጥር 41‚520 እንዲሁም ከአገልግሎቱና ከቴምብር ቀረጥ ሽያጭ የ28 ሚሊዮን ብር ብልጫ ማሳየቱም ተጠቁሟል፡፡ በተመሳሳይም ለመንግሥት ፈሰስ ከተደረገው ገቢ ረገድም የዘንደሮው አፈጻጸም ከአምናው የ22.2 ሚሊዮን ብር አብላጫ እንዳስመዘገበም ለማወቅ ተችሏል፡፡

ይኼም ኤጀንሲው በዓመቱ የመጀመርያ አጋማሽ ዕቅዱ “የላቀ አፈጻጸሙ የተመዘገበበት መሆኑን ከማሳየቱ ባሻገር የተገልጋዮችን እርካታ 91 ከመቶ ማድረሱን ተቋሙ ባደረገው ጥናት አረጋግጧል፤” ሲልም ገልጿል፡፡

ለክንውኖቹ ሰኬት አስተዋፅኦ አድርገዋል ከተባሉ መሻሻሎች ውስጥ ዋና ዋናዎቹ በዘመናዊ ቴክኖሎጂ በማስደገፍ አገልግሎቱን ተደራሽ ማድረግ፣ የሰው ኃይል ሥልጠና፣ የአሠራር ማኑዋል እንዲሻሻል መደረጉና ወጥ አሠራር በሁሉም ቅርንጫፎች እንዲኖር መደረጉን ኤጀንሲው አስታውቋል፡፡

በተጨማሪም ለደንበኞች በድረ ገጹ የተሟላ መረጃ በመስጠት፣ በ888 ነፃ የስልክ ጥሪ መረጃ እንዲያገኙ በማድረግና በማኅበራዊ ድረ ገጽ መረጃዎችን በመለዋወጥ የተገልጋዮቹን እርካታ ለማሳደግ ጥረት በማድረግ ላይ መሆኑንም አመልክቷል፡፡