በኢትዮጵያ ጥራትና ደረጃዎች ባለሥልጣን የሰሜን ምሥራቅ ቅርንጫፍ ጽሕፈት ቤት ባለፉት ሦስት ወራት 14,780 ሺሕ ኩንታል የቅባትና ጥራጥሬ ምርት ጥራቱ ተጠብቆ ወደ ውጭ አገር መላኩን ኢዜአ ዘግቧል፡፡

የናይጄሪያ ወታደራዊ ኃይሎች በዚህ ወር ብቻ በኒጀር ዴልታ ታጣቂዎች ታግተው የነበሩ 19 ታጋቾችን ማስለቀቃቸውን የቢቢሲ ዘገባ አመለከተ፡፡ ከታጋቾቹ ውስጥ 12 የሚሆኑት ናይጄሪያውያን ሲሆኑ ሁለቱ አሜሪካውያን፣ ሁለቱ ፈረንሳውያን፣ ሁለቱ ኢንዶኔዥያውያንና አንድ ካናዳዊ ነበሩ፡፡

የኢትዮጵያ ብረታ ብረትና ኢንጂነሪንግ ኮርፖሬሽን በአርሶ አደር ደረጃ በተበጣጠሰ መሬት ላይ የሚሠሩ አነስተኛ የፈረስ ጉልበት ያላቸው ትራንክተሮችን በተመጣጣኝ ዋጋ ሊያመርት መሆኑን ኢዜአ ዘግቧል፡፡

ደቡብ አፍሪካ የአፓርታይድ ዘመን የኒውክሌር ጦር መሣሪያዎችን ካንሰርንና የልብ በሽታን ለመመርመር ወደሚያስችሉ መሣሪያዎች መለወጧን ኤኤፍፒ ዘግቧል፡፡

የገንዘብና የኢኮኖሚ ልማት ሚኒስቴር ከጣሊያን መንግሥት ጋር አገሪቱ በጤናው መስክ ለምታከናውናቸው ተግባራት የሚውል የ8.2 ሚሊዮን ዩሮ የዕርዳታ ስምምነት መፈራረሙን የአዲስ ዘመን ዘገባ ያስረዳል፡፡

የደቡብ ኮሪያ የጦር መርከብ ከዓሣ አጥማጅ መርከብ ጋር ተጋጭታ በመስጠሟ አንድ ሰው ሲሞት ሁለት ሰዎች ደግሞ የደረሱበት አልታወቀም፡፡

በመቃብር ሥፍራ ለሚኖሩ 60 አባወራዎች የኢትዮጵያ ካቶሊክ ቤተክርስቲያን በአምስት ሚሊዮን ብር ወጪ የኮንዶሚኒየም ቤቶችን በመግዛት የቤት ባለቤት እንዲሆኑ ማድረጓን ኢዜአ ዘግቧል፡፡

የኩባው ፕሬዚዳንት ራኦል ካስትሮ ከ14 ዓመት በኋላ የመጀመሪያውን የገዢውን ኮሚዩኒስት ፓርቲ ኮንግረንስ መጥራታቸውን የዘገበው ቢቢሲ ነው፡፡

በሩብ የበጀት ዓመት ከተለያዩ የገቢ ርዕሶች ከ10.9 ቢሊዮን ብር በላይ ገቢ መሰብሰቡን የኢትዮጵያ ገቢዎችና ጉምሩክ ባለሥልጣን ማስታወቁን ዋልታ ዘገበ፡፡

በኢንዶኔዢያ ‹‹የእሳት ተራራ›› (ማውንት ሜራፒ) በሚል ስያሜ ከሚጠራው ተራራ በተነሳ እሳተ ገሞራ ከ100 በላይ ሰዎች ሲሞቱ በርካቶች ቆሰሉ፡፡