Saturday, December 3, 2022
ሌሎች ዓምዶች

    በሕወሓት ቁጥጥር ሥር ባሉ የአማራ ክልል አካባቢዎች ዕርዳታ እየቀረበ አለመሆኑ ተነገረ

    - Advertisement -spot_img

    በብዛት የተነበቡ

    በአማራ ክልል ሲካሄድ የነበረው ጦርነት አቆመ ቢባልም በሕወሓት ቁጥጥር ሥር ባሉ አካባቢዎች እስካሁን ዕርዳታ እየቀረበ አለመሆኑን፣ የክልሉ አደጋ ሥጋት አመራር ኮሚሽን አስታወቀ፡፡

    በሕወሓት ሥር ሆነው አንድም ዓለም አቀፍ ድርጅት ድጋፍ እያደረሰላቸው እንዳልሆነ የተገለጹት ሥፍራዎች በተለይ በሰሜን ጎንደር ዞን  አድርቃይ፣ ጠለምትና ደባርቅ፣ በሰሜን ወሎ ዞን አላማጣ፣ ቆቦ፣ ወፍላ፣ ራያ፣ እንዲሁም በዋግህምራ ዞን ደግሞ አበርገሌ፣ ሰቆጣ ዙሪያ፣ ፃግብጅና ዝቋላ ዙሪያ የተባሉት ይገኙበታል ብሏል፡፡

    በእነዚህ የተጠቀሱት አካባቢዎች ለረዥም ጊዜ ዕርዳታ ሳይቀርብላቸው መቆየታቸው በሚዲያ ቢነገርምና በተደጋጋሚ ቢጮህም፣ ዓለም አቀፍ ተቋማት ሊደርሱላቸው እንዳልቻሉ የአማራ ክልል አደጋ ሥጋት አመራር ኮሚሽነር አቶ ዘለዓለም ልጃለም ለሪፖርተር ተናግረዋል፡፡

    ኅብረተሰቡ ሕይወቱ አደጋ ውስጥ ወድቆ ምንም ዓይነት ድጋፍ አለመደረጉ፣ በዓለም አቀፍ ተቋማት ዘንድ ያለውን የገለልተኝነትና የአድሏዊነት ችግር ማሳያ እንደሆነ አቶ ዘለዓለም አመላክተዋል፡፡

    ከዓለም አቀፍ የተራድኦ ድርጅች ውጪ መንግሥት በሕወሓት ቁጥጥር ሥር ባሉ አካባቢዎች ገብቶ ድጋፍ ማድረግ ስለማይችል በመድኃኒት፣ በምግብና በንፁህ መጠጥ ውኃ ችግር በርካታ ቁጥር ያለው ሕዝብ ሥቃይ ውስጥ እንደሆነ አክለው ገልጸዋል፡፡

    በተጨማሪም በሕወሓት ሥር ባሉ አካባቢዎች ነፍሰ ጡሮች መኖራቸውን፣ እንዲሁም ለስኳር፣ ለደም ግፊት፣ ለኩላሊትና ለተለያዩ በሽታዎች መድኃኒት የሚያስፈልጋቸው ሰዎች አሉ ብለዋል፡፡ በመድኃኒት በምግብ እጥረት ወደ አጎራባች የአማራ ክልል ከተሞች በርካታ ቁጥር ያላቸው ዜጎች መፈናቀላቸውን አስረድተዋል፡፡

    በጦርነቱ ምክንያት ተፈናቅለው ዕርዳታ የሚያስፈልጋቸው ከ11 ሚሊዮን በላይ ዜጎች፣ ለከፋ የምግብና መድኃኒት ችግር መጋለጣቸውን ክልሉ በቅርቡ ባወጣው መረጃ ማስታወቁ ይታወሳል፡፡

    የዓለም ምግብ ፕሮግራም፣ የተባበሩት መንግሥታ ድርጅት የሕፃናት ድርጅት፣ ካቶሊክ ሪሊፍና መሰል ዓለም አቀፍ የዕርዳታ ድርጅቶች በአማራ ክልላዊ መንግሥት ቁጥጥር ሥር ባሉ ቦታዎች ከችግሩ ስፋት አንፃር የሚፈለገውን ያህል ዕርዳታ አደረሱ ባይባልም፣ በተወሰኑ መጠን እያቀረቡ እንደሆነ ተናግረዋል፡፡

    በአማራ ክልል ተፈናቃዮች በመጪው የክረምት ወቅት በዝናብ እንዳይጎዱ ከዕርዳታ ድርጅቶች ጋር በመተባበር መጠለያ እየተሠራ መሆኑን፣ በተወሰኑ አካባቢዎች ደግሞ ትምህርት ቤቶች ሲዘጉ እንደ መጠለያ ለመጠቀም መታሰቡን አቶ ዘለዓለም ገልጸዋል፡፡

    spot_img
    - Advertisement -

    ትኩስ ጽሑፎች

    ተዛማጅ ጽሑፎች

    - Advertisement -
    - Advertisement -