Thursday, December 8, 2022
ሌሎች ዓምዶች

    ‹‹መንግሥትና ሕወሓት በድርድር ላይ የተመሠረተ ተኩስ አቁም ብዙ ሰዎች ከሚጠብቁት ጊዜ አስቀድሞ ይፈጽማሉ ብዬ አምናለሁ››

    - Advertisement -spot_img

    በብዛት የተነበቡ

    ኦሉሴጉን ኦባሳንጆ፣ የአፍሪካ ኅብረት ልዩ ተወካይ

    የአፍሪካ ኅብረት የአፍሪካ ቀንድ ልዩ ተወካይ ናይጄሪያዊው ኦሉሴጉን ኦባሳንጆ በፌዴራል መንግሥትና በሕወሓት ኃይሎች መካካል በስምምነት ላይ የተመሠረተ ተኩስ አቁም፣ ሰዎች ከሚጠብቁት ጊዜ አስቀድሞ ይፈጽማሉ ብለው እንደሚያምኑ ተናገሩ፡፡

    በኅብረቱ ከተሾሙ አንድ ዓመት የሆናቸው ልዩ ተወካዩ በተደጋጋሚ ወደ አዲስ አበባና መቀሌ የተጓዙ ሲሆን፣ ሰሞኑን በትግራይ ክልል ባደረጉት ጉብኝት ከሕወሓት ሊቀመንበር ደብረ ጽዮን ገብረ ሚካኤል (ዶ/ር) ጋር መነጋገራቸውን መረጃዎች ያመለክታሉ፡፡

    ኦባሰንጆ ከትግራይ ክልል መልስ ግንቦት 25 ቀን 2014 ዓ.ም. በጠቅላይ ሚኒስትር ዓብይ አህመድ (ዶ/ር) ከተመራ ከፍተኛ የመንግሥት ባለሥልጣናት ቡድን ጋር፣ በኦሮሚያ ክልል ባሌ ዞን የተለያዩ ፕሮጀክቶችን መጎብኘታቸው ይታወሳል፡፡

    ኦባሳንጆ በዚሁ ቀን ለቢቢሲ አፍሪካ በሰጡት ቃለ ምልልስ መንግሥትና ሕወሓት በዚህ ቀን በድርድር ላይ የተመሠረተ የተኩስ አቁም ስምምነት ላይ ይደርሳሉ ብሎ መናገር እንደማይቻል አስታውቀው፣ ‹‹ነገር ግን ብዙዎች ከሚጠብቁት ቀድሞ ይሳካል ብዬ አምናለሁ፤›› ብለዋል፡፡

    ልዩ ልዑኩ በኢትዮጵያ የጀመሩት የሠላም ጥረት በጣም ዘገምተኛ ቢሆንም፣ ቀስ በቀስ ለውጥ እየታየበት እንደሆነና ከስድስት ወራት በፊት ከነበረው ሁኔታ የተሻለ ነገር ስለመኖሩ ጠቁመዋል፡፡

    ለሁለቱም ወገኖች የበለጠ አቅም ለመፍጠርና  የሰብዓዊ ዕርዳታ አቅርቦት እንዲኖር ማድረግ፣ እንዲሁም በስምምነት ተኩስ ማቆም የሚቻልበት ደረጃ ላይ መድረስ የአፍሪካ ኅብረት ቁርጠኛ አቋም መሆኑን ገልጸዋል፡፡

    አሁን በድርድር ላይ የተመሠረተ የተኩስ አቁም ስምምነት ላይ  እንዲደረስ በሁለቱም ወገኖች ላይ ያሉ ጫናዎችን የማቃለል ሥራ እንደሚያከናውኑ፣ በመቀጠልም ሁለቱም ወደ ግጭት ላለመግባበት በይፋ የሚስማሙበትና የተቋረጡ መሠረተ ልማቶች ወደ ነበሩበት ተመልሰው ሥራ እንዲጀምሩ ማድረግ ላይ እንደሚያተኩሩ አክለው ገልጸዋል፡፡

    የሕወሓት ታጣቂዎች በኃይል ከያዟቸው የአፋርና የአማራ ክልሎች አካባቢዎች ለቀው መውጣታቸውን ሕወሓት ቢናገርም፣ በቅርቡ ምክትል ጠቅላይ ሚኒስትርና የውጭ ጉዳይ ሚኒስትር አቶ ደመቀ መኮንን የውጭ ጉዳይ ሚኒስቴርን የዘጠኝ ወራት ዕቅድ አፈጻጸም ለፓርላማ ሲያቀርቡ፣ የሕወሓት ታጣቂዎች ከአፋር ክልል የተወሰኑ ሥፍራዎች አለመውጣታቸውን አስታውቀው ነበር፡፡ በሕወሓት በኩልም ተመሳሳይ ጥያቄ ይነሳል፡፡

    የፌዴራል መንግሥትና የሕወሓት ታጣቂዎች በመሣሪያ የተደገፈ ጦርነት ካቆሙ ወራት ቢቆጠሩም፣ ወደ ሰላማዊ መንገድ በመምጣት ንግግር ለማድረግ ያላቸው ቁርጠኝነትና ዝግጁነት እምብዛም አይሰማም፡፡ ከቅርብ ጊዜ ወዲህ ደግሞ የጦርነት ነጋሪት ጉሰማ መሰማት መጀመሩ ይታወቃል፡፡

    በዚህ ሁሉ መሀል ካለፈው ዓመት ጀምሮ የአሜሪካ፣ የአውሮፓ ኅብረት፣ የቻይና፣ እንዲሁም የአፍሪካ ኅብረት ልዩ መልዕክተኞቻቸውን ሾመው ሰላማዊ መፍትሔ እንዲገኝ ጥረት እያካሄዱ መሆናቸውን ይናገራሉ፡፡

    ለአብነት የአሜሪካ መንግሥት በአንድ ዓመት ጊዜ ውስጥ ለሦስተኛ ጊዜ አዲስ የአፍሪካ ቀንድ ልዩ መልዕክተኛ ባለፈው ሳምንት መሾሙ ይታወሳል፡፡

    ግንቦት 24 ቀን 2014 ዓ.ም. ማይክ ሐመር (አምባሳደር) ከጥቂት ወራት በፊት የተሾሙትን የአሜሪካ ልዩ የአፍሪካ ቀንድ መልዕክተኛ ዴቪድ ስታተርፊልድን (አምባሳደር) ተክተው እንደሚሠሩ፣ የአሜሪካ የውጭ ጉዳይ ሚኒስትር አንቶኒ ብሊንከን በትዊተር ገጻቸው ማስታወቃቸው አይዘነጋም፡፡

    ስድስት ወራት ሳይሞላቸው በአዲስ ተሿሚ የተተኩት ዴቪድ ስታተርፊልድ (አምባሳደር)፣ የመጀመሪያውን የአሜሪካ የአፍሪካ ቀንድ ልዩ መልዕክተኛ ጄፍሪ ፊልታማንን ተክተው ሥራ የጀመሩት በጥር 2014 ዓ.ም. ነበር፡፡

    በተጠናቀቀው ሳምንት የአሜሪካ የኮንግረንስ አባል ትሬን ኬሊ በኢትዮጵያ ባደረጉት ጉብኝት ከምክትል ጠቅላይ ሚኒስትርና የውጭ ጉዳይ ሚኒስትር አቶ ደመቀ መኮንን፣ እንዲሁም ከሕዝብ ተወካዮች ምክር ቤት አፈ ጉባዔ አቶ ታገሰ ጫፎ ጋር መወያየታቸው ይታወቃል፡፡

    አቶ ደመቀ በሰሜን ኢትዮጵያ ሕወሓት ለቀጣይ ዙር ጦርነት እየተዘጋጀ መሆኑን እንደገለጹላቸው፣ አሜሪካና ዓለም አቀፉ ማኅበረሰብ ሕወሓት ፀረ ሰላም ድርጊቱን እንዲተው ጫና እንዲያደርጉ መጠየቃቸው ተሰምቷል፡፡

    በተጨማሪም በተከሰተው ግጭት ለተጎዱ ወገኖች ሰብዓዊ ዕርዳታ ስለማቅረብ፣ የሰብዓዊ መብት ጥሰት ተጠያቂነትንና የአገሪቱን ዘላቂ ሰላም ለማረጋገጥ በተወሰዱ ዕርምጃዎች ላይ ለኮንግረስ አባሉ ማብራሪያ ሰጥተዋል፡፡

    spot_img
    - Advertisement -

    ትኩስ ጽሑፎች

    ተዛማጅ ጽሑፎች

    - Advertisement -
    - Advertisement -