Tuesday, September 27, 2022
ሌሎች ዓምዶች

    የጋዜጠኞች እስራት እንደሚያሳስበው ትራንስፓረንሲ ኢንተርናሽናል አስታወቀ

    - Advertisement -spot_img

    በብዛት የተነበቡ

    ከቅርብ ጊዜ ወዲህ በኢትዮጵያ እየተባባሰ የመጣው የጋዜጠኞች እስራትና አፈና እንደሚያሳስበው፣ የትራንስፓረንሲ ኢንተርናሽናል የኢትዮጵያ ቅርንጫፍ አስታወቀ፡፡ ከ16 ያላነሱ ጋዜጠኞችን ጨምሮ ሌሎች ሲቪሎችና ፖለቲከኞች፣ ከሕግ ውጪ በጅምላ መታሰራቸው እጅግ አሳሳቢ ድርጊት መሆኑን ገልጿል፡፡

    በዋናነት የዓለም አገሮችንና ተቋማትን የሙስና ተጋላጭነት ሪፖርት በየዓመቱ በማውጣት የሚታወቀው ትራንስፓረንሲ ኢንተርናሽናል፣ በሚዲያና በጋዜጠኞች ላይ የሚፈጸም አፈና፣ አገሮችን ለሙስናና ምዝበራ የሚያጋልጥ መሆኑን በመግለጫው አመልክቷል፡፡

    ባለሥልጣናትና አመራሮች ለሕዝብ ለገቡት ቃል እንዲገዙ፣ ተጠያቂ የሚያደርጋቸው ነፃ ሚዲያና ጋዜጠኛ በአንድ አገር ያስፈልጋል ብሏል፡፡ ከሰብዓዊ መብት ተቋማትና ለጋዜጠኞች መብቶች ከቆሙ ድርጅቶች ሪፖርት በኢትዮጵያ በጋዜጠኞች ላይ አፈናና እስራት እየተፈጸመ መሆኑን ተረድቻለሁ የሚለው የትራንስፓረንሲ መግለጫ፣ ሁኔታው አሳሳቢ ሆኖ እንዳገኘው አስታውቋል፡፡

    ጋዜጠኞችና ሚዲያዎች የምርመራ ዘገባዎችን በመሥራት ባለሥልጣናትን ተጠያቂ በማድረግ፣ የሕዝብ ሀብትና ንብረትን ከምዝበራና ሙስና ተጋላጭነት የሚከላከሉ ወሳኝ የዲሞክራሲ ተቋማት ናቸው ይላል መግለጫው፡፡ ‹‹በመሆኑም መንግሥት ሕግ አስከብራለሁ ብሎ ሲነሳ የእነዚህን ወሳኝ የዲሞክራሲ ተቋማት መብቶች ላለመጉዳት ጥንቃቄ ማድረግ እንዳለበት ማሳሰብ እንወዳለን፤›› ሲል ነው የትራንስፓረንሲ ኢንተርናሽናል የኢትዮጵያ ቅርንጫፍ በመግለጫው የገለጸው፡፡

    በተያያዘ ዜና የኢትዮጵያ ሰብዓዊ መብቶች ጉባዔ (ኢሰመጉ) ባወጣው መግለጫ፣ በጋዜጠኞችና በተፎካካሪ ፓርቲዎች ላይ እየተካሄደ ነው ያለው የእስር ዘመቻ እንዲቆም ጠይቋል፡፡

    በፖለቲከኞች፣ በጋዜጠኞችና በማኅበረሰብ አንቂዎች ላይ እየተፈጸሙ ያሉ እስራቶችና ዕገታዎች ሐሳብን በነፃነት የመግለጽ መብትና የመናገር መብትን፣ የፕሬስ ነፃነትን የሚጋፉ በመሆናቸው መንግሥት ከእነዚህ ዕርምጃዎች እንዲቆጠብ እናሳስባለን ይላል የኢሰመጉ መግለጫ፡፡

    ኢሰመጉ ግንቦት 29 ቀን 2014 ዓ.ም. ባወጣው መግለጫው በተለይ በእስር ቤት ድብደባ ደርሶበታል ስለላው ስለጋዜጠኛ ተመስገን ደሳለኝ ጉዳይ በትኩረት አውስቷል፡፡ የፍትሕ መጽሔት ባለቤት ጋዜጠኛ ተመስገን፣ ግንቦት 18 ቀን 2014 ዓ.ም. በታሰረበት ፖሊስ ጣቢያ በፖሊሶች ድብደባ ደረሰበት የሚል ሪፖርት እንደደረሰውና ጉዳዩን ለማጣራት ጥረት እንዳደረገ ኢሰመጉ በመግለጫው አትቷል፡፡

    ይሁን እንጂ ጋዜጠኛውን በአካል ለማግኘት ጥረት ቢደረግም፣ የፖሊስ ጣቢያው ፖሊሶች እንቅፋት በመሆናቸው ሊሳካለት አለመቻሉን ነው ያስታወቀው፡፡

    ‹‹መንግሥት ለጋዜጠኛ ተመስገን ሕክምና እንዲያገኝ ምቹ ሁኔታ እንዲፈጥር ጥሪ እናደርጋለን፤›› የሚለው የኢሰመጉ መግለጫ፣ በእስር ላይ ለሚገኙ ጋዜጠኞች፣ ፖለቲከኞችም ሆነ ሌሎች ግለሰቦች ሕጋዊ ጥበቃ እንዲደረግ እንጠይቃለን ይላል፡፡

    - Advertisement -

    ትኩስ ጽሑፎች

    ተዛማጅ ጽሑፎች

    - Advertisement -
    - Advertisement -