Tuesday, July 23, 2024

የአካባቢ ምርጫ ለማድረግ ያቀደው ምርጫ ቦርድ ከጠየቀው በጀት 3.5 በመቶው ብቻ ተፈቀደለት

- Advertisement -spot_img

በብዛት የተነበቡ

በቀጣዩ በጀት ዓመት የአካባቢ ምርጫ ለማድረግ በማሰብ ከአጠቃላይ 6.94 ቢሊዮን ብር በጀት ውስጥ መንግሥት 6.02 ቢሊዮን ብሩን እንዲበጅትለት የጠየቀው የኢትዮጵያ ብሔራዊ ምርጫ ቦርድ 212 ሚሊዮን ብር ብቻ ተፈቀደለት፡፡ ገንዘብ ሚኒስቴር ለቦርዱ የፈቀደለት ይኼ የበጀት ድጋፍ ቦርዱ ከጠየቀው በጀት 3.52 በመቶውን ብቻ የሚሸፍን ነው፡፡

ቦርዱ ከሦስት ሳምንት በፊት ግንቦት 17 ቀን 2014 ዓ.ም. የቀጣይ ዓመት በጀቱን ለሕዝብ ተወካዮች ምክር ቤት የፕላን፣ በጀትና ፋይናንስ ጉዳዮች ቋሚ ኮሚቴ ሲያቀርብ 6.94 ቢሊዮን ብር እንደሚያስፈልገው መግለጹን ቦርዱ ለሪፖርተር አስታውቆ ነበር፡፡ ቦርዱ ካቀረበው አጠቃላይ በጀት ውስጥ 918.4 ሚሊዮን ብር ከአጋር አካላት እንደሚያገኝ ገልጾ ቀሪውን 6.02 ቢሊዮን ብር ከመንግሥት ጠይቆ ነበር፡፡

ቦርዱ የጠየቀው በጀት ለ2015 በጀት ዓመት ከተቀመጠለት 72 ሚሊዮን ብር በ8,262 በመቶ የሚበልጥ ነው፡፡ ቦርዱ በጀቱ ከፍ ያለው በቀጣዩ በጀት ዓመት የአካባቢ ምርጫን ለማድረግ በማቀዱ መሆኑንና ከበጀቱ ውስጥ ትልቁ ድርሻ ለዚሁ ምርጫ እንደሚውል ገልጾ ነበር፡፡

ቦርዱ ጠቅላላ አገራዊ ምርጫን ተከትሎ የሚደረገውን የአካባቢ ምርጫ ማከናወን ያሰበው 847 ወረዳዎች፣ 172 ከተሞች፣ 11 ክፍላተ ከተሞች፣ አንድ የብሔረሰብ ምክር ቤት፣ 75 ዞኖችና 56,373 ምርጫ ጣቢያዎች ነው፡፡ በዚህ ምርጫ 44.4 ሚሊዮን መራጮች ይሳተፋሉ የሚል ግምቱንም አስቀምጦ ነበር፡፡

ከዚህም በተጨማሪ ቦርዱ ስድስተኛው አጠቃላይ ምርጫ ባልተደረገባቸው አካባቢዎች ምርጫ ማድረግ፣ ተቋማዊ የሰው ኃይልን መገንባትና የመረጃ አያያዝን ማዘመን ቦርዱ ከቀጣይ ዓመት ዕቅዶቹ መካከል እንደሆኑ አስታውቋል፡፡

ይሁንና ገንዘብ ሚኒስቴር ማክሰኞ ግንቦት 30 ቀን 2014 ዓ.ም. ለሕዝብ ተወካዮች ምክር ቤት ያቀረበው የመንግሥት መሥሪያ ቤቶች በጀት ዝርዝር እንደሚያሳየው ቦርዱ የተፈቀደለት በጀት 212 ሚሊዮን ብር ብቻ ነው፡፡ እንደ ገንዘብ ሚኒስቴር ገለጻ ለቦርዱ የተፈቀደው በጀት ከተቀመጠው ጣርያ በ139.99 ሚሊዮን ብር ወይም 194.41 በመቶ የሚበልጥ ነው፡፡

የገንዘብ ሚኒስቴር በፈቀደለት የበጀት መጠን ያሰበውን የአካባቢ ምርጫ ለማካሄድ ያስችለው እንደሆነ ከሪፖርተር ጥያቄ የቀረበለት ቦርዱ፣ ስለተፈቀደለት በጀት የደረሰው መረጃ ባለመኖሩ አስተያየት ለመስጠት እንደሚቸገርና በጀቱ ይፋ ሲሆን አስተያየት እንደሚሰጥ አስታውቋል፡፡

ቦርዱ ከሁለት ወራት በፊት ሚያዝያ 22 ቀን 2014 ዓ.ም. የስድስተኛው አጠቃላይ ምርጫ የአፈጻጸም ሪፖርቱን ለሕዝብ ተወካዮች ምክር ቤት የሕግ፣ ፍትሕና ዴሞክራሲ ጉዳዮች ቋሚ ምክር ቤት ባቀረበበት ጊዜ የአካባቢ ምርጫ ለማድረግ እያደረገ ስላለው ዝግጅት ከቋሚ ኮሚቴው ጥያቄ ቀርቦ ነበር፡፡ ለዚህ ጥያቄ መልስ የሰጡት የቦርዱ ሰብሳቢ ወ/ሪት ብርቱካን ሚዴቅሳ፣ የአካባቢ ምርጫ ሳይደረግ ‹‹በጣም እንደዘገየ›› ጠቅሰው ቦርዱ ዝግጅት እያደረገ መሆኑን አስታውቀው ነበር፡፡

ሰብሳቢዋ የአካባቢ ምርጫ ማድረግ ከፍተኛ ወጪ እንደሚጠይቅ ለቋሚ ኮሚቴው ሲያስረዱ ‹‹አሁን ባለው ሁኔታ ስናይ ለአጠቃላይ [ምርጫ] ካወጣነው ወጪና ከጠየቀን የሰው ኃይል እጥፍ እጥፍ የሚጠይቅ ነው የአካባቢ ምርጫ፣ በተለይ በቀበሌ ደረጃ ምክር ቤቶቹ ሰፊ ስለሆኑና ብዙ አባላት ስለላላቸው፣ በዚህ ቁጥር ምርጫ እናደርጋለን ብንል በኦፕሬሽን በኩል ለማሳካት እንቸገራለን ብለን እናስባለን፤›› ብለው ነበር፡፡

በተለይም የአካባቢ ምርጫ በወረዳ ደረጃ ጭምር የሚካሄድ በመሆኑ ከፍተኛ የሰው ኃይል እንደሚጠይቅ የገለጹት ወ/ሪት ብርቱካን፣ ቦርዱ በስድስተኛው አጠቃላይ ምርጫ ለተሳተፉ ምርጫ አስፈጻሚዎች ብቻ ከአንድ ቢሊዮን ብር በላይ ወጪ እንዳደረገ በዚሁ ስብሰባ ላይ አስታውቀዋል፡፡

ምርጫ ቦርድ ስደስተኛው አጠቃላይ ምርጫ በ2012 ዓ.ም. ለማካሄድ 3.7 ቢሊዮን ብር እንደሚያስፈልገው ገልጾ ጥያቄ አቅርቦ የነበረ ሲሆን፣ በበጀት ዓመቱ የተፈቀደለት 2.7 ቢሊዮን ብሩ ነበር፡፡ ምርጫው ተራዝሞ በ2013 ዓ.ም. ሊካሄድ ሲታሰብ ደግሞ ለኮቪድ-19 ጥንቃቄዎች ማስተግበሪያ ተጨማሪ 1.1 ቢሊዮን ብር ጠይቆ ነበር፡፡ ቦርዱ ለምርጫው ማስኬጃ ከመንግሥት ተፈቀደለት በጀት በተጨማሪ በተባበሩት መንግሥታት ድርጅት የልማት ድርጅት አማካይነት 1.8 ቢሊዮን ብር የዓይነት ድጋፍ አግኝቶ ነበር፡፡ በኢትዮጵያ ለመጨረሻ ጊዜ የአካባቢ ምርጫ የተካሄደው በ2005 ዓ.ም. ነበር፡፡

spot_img
- Advertisement -

ትኩስ ጽሑፎች

ተዛማጅ ጽሑፎች

- Advertisement -
- Advertisement -