Saturday, October 1, 2022
ሌሎች ዓምዶች

    ከ246 ሺሕ በላይ የሰላም ሠራዊት አደረጃጀት የሚመራበት ረቂቅ ደንብ ተዘጋጀ

    - Advertisement -spot_img

    በብዛት የተነበቡ

    የአዲስ አበባ ከተማ አስተዳደር የከተማዋን ሰላምና ፀጥታ በዘላቂነት ለማስቀጠል አስተዋጽኦ አድርጓል ያለውን የሰላም ሠራዊት አደረጃጀት የሚመራበት ረቂቅ ደንብ አዘጋጀ፡፡

    የተዘጋጀው ረቂቅ በአዲስ አበባ 11ዱም ክፍላተ ከተማ የሚገኙ ከ246 ሺሕ በላይ የሰላም ሠራዊት አባላት ከፖሊስ ጋር በቅንጅት የሚሠሩበትን የአሠራር ደንብ የተመለከተ መሆኑ ታውቋል።

    የሠላምና ፀጥታ አስተዳደር ቢሮው የሠላም እሴት ዘርፍ ምክትል ቢሮ ኃላፊ ወይዘሮ ሊዲያ ግርማ በሰጡት ማብራሪያ ከህልውና ዘመቻው ጊዜ አንስቶ የሰላም ሠራዊት አባላት የከተማውን ሠላምና ደኅንነት ለማረጋገጥና የሽብር ቡድኖችን አፍራሽ እንቅስቃሴ ለመግታት ከፖሊስ ጋር በቅንጅት በርካታ ተግባራትን ፈጽመዋል ብለዋል።

    ወ/ሮ ሊዲያ በሰጡት ማብራሪያ እንዳስገነዘቡት፣ የሰላም ሠራዊት አደረጃጀት ረቂቅ ደንብ ማዘጋጀት ያስፈለገበት ዋነኛ ምክንያት አገልግሎቱን በዘላቂነት አጠናክሮ ለማስቀጠል በማሰብ ነው።

    አዲስ የተዘጋጀው የሰላም ሠራዊት ረቂቅ ደንብና መመሪያ የራሱ የዕዝ ሰንሰለት እንዲኖረው ተደርጎ መዘጋጀቱ የተገለጸ ሲሆን፣ ከዚህ በተጨማሪም የተጠያቂነት ጉዳዮችን የሚያካትት መሆኑም ታውቋል።

    በሁሉም ክፍላተ ከተሞች የተደራጁትና ቁጥራቸው በርካታ የሆኑት እነዚህ የሰላም ሠራዊት አባላት ከፖሊስ ጋር በቅንጅት ሕገወጥ ጦር መሣሪያዎችን በቁጥጥር ሥር በማዋል፣ ለሽብር ተግባር የተዘጋጁ የክልል ፖሊስ የደንብ ልብሶችን በመያዝ፣ በሕገ ወጥ መንገድ ለተለያየ ዓላማ የተከማቹ የልዩ ልዩ አገሮች የገንዘብ ኖቶች ለሽብር እንቅስቃሴ የተዘጋጁ የሐሰት መታወቂያዎችን ጨምሮ በርካታ የተደራጁ ወንጀለኞችንና የሽብር ድርጊቶችን ከፀጥታ ተቋማት ጋር በቅንጅት ሲከላከሉ መቆየታቸውን የሰላምና ፀጥታ አስተዳደር ቢሮው አስታውቋል፡፡

    በፀጥታና ሰላም ግንባታ ፖሊሲና ስትራቴጂ እንዲሁም የሰላም ሠራዊት ረቂቅ ደንብ ላይ የከተማዋ ሰላምና ፀጥታ አስተዳደር ቢሮ ባለፉት ሳምንታት ከባለድርሻ አካላትና ከምሁራን ጋር ውይይት ማካሄዱ ይታወሳል።

    በተደረገው ውይይት የተገኙት የአዲስ አበባ ከተማ ሰላምና ፀጥታ አስተዳደር ቢሮ ኃላፊ ቀነአ ያደታ (ዶ/ር) የተዘጋጀው ፖሊሲና ስትራቴጂ በከተማዋ ሊፈጸሙ የሚችሉ የወንጀል ድርጊቶች፣ ደንብ መተላለፎችና የፀጥታ ሥጋቶችን ቀድሞ ምንጫቸውን በመለየትና በመተንተን እኩይ ድርጊቶች ከመፈጸማቸው በፊት ፈጣን ምላሽ መስጠት የሚያስችል መሆኑን ገልጸው ነበር፡፡

    ሕገወጥ የመሬት ወረራ፣ የጎዳና ላይ ንግድ፣ የንግድ አሻጥርና መሰል ሕገወጥ ተግባራት በአዲስ አበባ መበራከታቸው ኢኮኖሚው ላይ ከሚያሳድረው ጫና በተጨማሪ የፀጥታ ሥራውን በዘመናዊ መንገድ ለመምራት አስቸጋሪ ሁኔታ መፍጠሩ በተደረጉት ውይይቶች ላይ መነሳቱ ይታወሳል፡፡

    - Advertisement -

    ትኩስ ጽሑፎች