[ክቡር ሚኒስትሩ የዋጋ ንረቱን አስመልክቶ የሚያቀርቡትን ሪፖርት ለማዘጋጀት ከአማካሪያቸው ጋር ውይይት እያደረጉ ነው] 

• በአገሪቱ የተከሰተውን ኢንፍሌሽንና ተስፋ ሰጪ ተግባራት አስመልክቶ ለምናቀርቀበው ሪፖርት ምን ቢካተት ጥሩ ይመስልሃል?
• ክቡር ሚኒስትር ተሰፋ ሰጪ ተግባራት የሚለው እንኳ የሚያስኬድ አይመስለኝም።
• ለምን? 
• ክቡር ሚኒስትር ችግሩ ኢንፍሌሽን ብቻ ተብሎ የሚገለጽ አይመስለኝም፣ ከዚያም በላይ እየሄደ ነው። 
• በግጭቶች የሚፈጠረውን ኢንፍሌሽን ተወውና በኢኮኖሚያዊ ምክንያት የተከሰተው ኢንፍሌሽን አሁን ያለበት ደረጃና ተስፋ ሰጪ ተግባሮቻችን ላይ እናተኩር። 
• የገጠመን አስቸጋሪ ኢንፍሌሽን መሠረታዊ ምክንያት ግጭት አይደለም ክቡር ሚኒስትር። 
• ስለእሱ አልጠየኩህም፣ ኢንፍሌሽኑ አሁን ያለበት ደረጃና ተስፋ ሰጪ ተግባሮቻችን ላይ እንድታተኩር ነው የጠየኩህ፡፡
• እኔም እሱን ነው ለማንሳት የሞከርኩት ክቡር ሚኒስትር። 
• ወደ ግጭት ሳትገባ ቀጥል። 
• ክቡር ሚኒስትር የገጠመን ኢንፍሌሽን ወደ ስታግፍሌሽን (stagflation) ደረጃ እየተሸጋገረ እንደሆነ ግልጽ ነው።
• ምንድነው ደግሞ እሱ?
• ስታግፍሌሽን?
• እ…
• የኢኮኖሚ ዕድገት ማሽቆልቆል፣ የሥራ አጥነት መስፋፋትና ኢንፍሌሽን በአንድ ላይ አንድ ኢኮኖሚ ውስጥ መከሰታቸውን የሚያመለክት ነው። 
• ጤነኛ አይደለህም? 
• አጠፋሁ ክቡር ሚኒስትር?
• በጎ በጎውን ጠየቅኩህ እንጂ እንጥቀስ ከተባለማ ብዙ መጥቀስ ይቻላል። 
• ኢኮኖሚው ውስጥ የተከሰተው ይኼ ነው፣ ከዚህ ሌላ ምን ልንጠቅስ እንችላለን?
• ሸኔስ? እሱ ችግር አይደለም? ስታግፍሌሽን ያልከው ላይ ሸኔ ቢጨመርበት ምን ሊባል ነው? 
• እሱ ኢኮኖሚያዊ ምክንያት አይደለም ብዬ ነው ክቡር ሚኒስትር፡፡
• ለዚህ እኮ ነው በጎ በጎውን፣ ተስፋ ሰጪውን እናንሳ የምልህ፡፡ 
• ተስፋ ሰጪ ለማለት የሚያስችለን ነገር ያለ አይመስለኝም ክቡር ሚኒስትር፡፡
• አማካሪ ስትባሉ ጨለማ ብቻ ነው እንጂ የሚታያችሁ፣ የእንትን ዋጋ እንዳሽቆለቆለ መጥቀስ አይቻልም?
• የምን?
• የእንቁላል… 
• እሱማ የዶሮ በሽታ በመከሰቱ የተፈጠረ የዋጋ ቅናሽ ነው። 
• ቢሆንስ? በእንቁላል ዋጋ ላይ ቅናሽ አልታየም?
• እሱማ ከፍተኛ የዋጋ ቅናሽ ታይቷል።
• በል ተስፋ ሰጪ ተግባራት በልና ያዝልኝ። 

[የአረንጓዴ አሻራ ፕሮግራም ላይ የዋሉት ክቡር ሚኒስትሩ ወደ መኖሪያ ቤታቸው ሲገቡ በጭቃ የተለወሰ ጫማቸውን የተመለከቱት ባለቤታቸው ግራ ተጋብተው ምን እንደተፈጠረ መጠየቅ ጀመሩ]

• ምን ገጥሞህ ነው? ምንድነው?
• ምኑ? 
• ጫማህን አላየኸውም? 
• ምን ሆነ?
• እንዴ ሱሪህም እኮ በጭካ ተለውሷል፡፡
• እ… ስንበረከክ የነካኝ… 
• ለምንድነው የምትንበረከከው? 
• ዛሬ የካቢኔ አባላት በሙሉ በአለቃ ፕሮግራም ላይ ነበር የዋልነው።
• ፕሮግራሙ የመንበርከክ ነው? 
• የአለቃችን የአረንጓዴ አሻራ ፕሮግራም ዛሬ ነበር እኮ።
• ነው እንዴ?
• አዎ፣ ምነው በቴሌቪዥን አልተላለፈም እንዴ? 
• ገና ችግኝ ማሳየት ሲጀምር ተናድጄ ዘጋሁት።
• ምነው?
• ሕዝቡ በስንት ነገር እየተማረረ እናንተም ቴሌቪዥኑም ቅድሚያ የምትሰጡትን ነገር ማየት ሕመሜን ይቀሰቅስብኛል።
• እንዴት?
• ምን እንዴት አለው? ንፁኃን ዜጎች በየከተማውና በየመንደሩ ሲገደሉ ዝም ያለ ቴሌቪዥን በሙሉ፣ እናንተ ችግኝ ስትተክሉ ተዓምር ይመስል በቀጥታ ያስተላልፋል። 
• ገብቶኛል፣ ግን ምን ይደረግ በቅድሚያ የተያዘ ፕሮግራም ነው። 
• ቢሆንስ? ከ400 በላይ ንፁኃን በግፍ ተገድለው ምንም እንዳልተፈጠረ እንዴት ዝም ይባላል? 
• ምን ማድረግ ነበረብን? መንግሥት በደረሰው ጉዳት ሐዘን እንደተሰማው ወዲያውኑ ገልጿል። 
• አልገለጸም፣ የት ነው የገለጸው? 
• አለቃም ሆኑ ሌሎቻችን በማኅበራዊ ትስስር ገጾቻችን የተሰማንን ሐዘን ገልጸናል። 
• በማኅበራዊ ትስስር ገጽ? ብሔራዊ ቴሌቪዥን ጣቢያ እያለ?
• ዋናው ተደራሽነት ነው።
• እንዴት? ምን ማለትህ ነው?
• የእኛን ያህል በተለይም የአለቃን የሚያህል ተከታይ ያለው የማኅበራዊ ትስስር ገጽ በኢትዮጵያ የለም።
• ይሁን… ግን እንዴት ፓርላማው እንኳን ለአንድ ቀን ብሔራዊ ሐዘን አያውጅም?
• ተቃዋሚ ፓርቲዎች ሞክረው እንደነበር ሰምቻለሁ፡፡ 
• ምንድነው የሞከሩት?
• ፓርላማው የሐዘን ቀን እንዲያውጅ መሰለኝ፡፡ 
• እንዴት ሰማህ? ችግኝ ተከላ ላይ ነበርኩ አላልክም እንዴ?
• ቢሆንም የሚፈጠረውን እንሰማለን።
• እሺ… እና የሐዘን ቀን ታወጀ? 
• እንዴት ይታወጃል? አልታወጀም፣ ጭራሽ የመጠየቅ ዕድል አልተሰጣቸውም። 
• ዕድል እንዳያገኙ ትዕዛዙን ያስተላለፋችሁት እናንተ ናችሁ ማለት ነዋ?
• ችግኝ ተከላ ላይ ነበርን እያልኩሽ? በየት በኩል እናስተላልፋለን?
• እኛን የሚያህል የማኅበራዊ ሚዲያ ተከታይ ያለው የለም ስትል አልነበር እንዴ?
• ብልስ… እንዴት አድርገን ትዕዛዝ እናስተላልፋለን?
• በኢንቦክስ ነዋ፡፡
• አንቺ ደግሞ… እስኪ ተይኝ፡፡
• ሳስበው ግን ትክክል ነው።
• ምኑ?
• ፓርላማው የሐዘን ቀን አለማወጁ ትክክል ይመስለኛል። 
• እንዴት እንደዚያ አልሽ?
• አንዴ ከጀመረ በየሳምንቱ የሐዘን ቀን ማወጅ ሊሆን ነዋ ሥራው።
• ለምን እንዲህ እንደምትብከነከኚ ሳልረዳ ቀርቼ መስሎሽ ነው? እረዳሻለሁ፡፡
• አይመስለኝም፡፡
• እረዳሻለሁ፣ የንፁኃን ዜጎች ሕይወት በየጊዜው መቀጠፉ እንዳሳሰበሽ እረዳለሁ። ግን እመኚኝ፣ አረጋግጥልሻለሁ፡፡
• ምኑን? 
• ምንም ቢሆን ኢትዮጵያ አትፈርስም፣ ይህንን አረጋግጥልሻለሁ!