Saturday, November 26, 2022
ሌሎች ዓምዶች

    አብን የሕዝብ ተወካዮች ምክር ቤት በአማራ ተወላጆች ላይ በደረሰው የዘር ማጥፋት ወንጀል ላይ ተሳልቋል አለ

    - Advertisement -spot_img

    በብዛት የተነበቡ

    – ምክር ቤቱ አስቸኳይ ውይይት አድርጎ አቋም እንዲይዝ ጠየቀ

    የሕዝብ ተወካዮች ምክር ቤት በኦሮሚያ ክልል በምዕራብ ወለጋ ዞን ጊምቢ ወረዳ በቶሌ ቀበሌና አጎራባች ቀበሌዎች በአማራ ተወላጆች ላይ የተፈጸመውን የዘር ማጥፋት ወንጀል አስመልክቶ የወሰደው አቋም የተጣለበትን ኃላፊነት የማይመጥን መሳለቅም በመሆኑ ሊታረም የሚገባው ነው ሲል የአማራ ብሔራዊ ንቅናቄ(አብን) አሳሰበ፡፡

    አብን እንደገለጸው፣ . ሰኔ 11 ቀን 2014 ዓ.ም በኦሮሚያ ክልል በምዕራብ ወለጋ ዞን ጊምቢ ወረዳ ቶሌ ቀበሌና አጎራባች ቀበሌዎች ነዋሪ በሆኑ የአማራ ተወላጆች ላይ የተፈጸመውን የዘር ማጥፋት ወንጀል ተከትሎ የፓርቲው አመራርና የሕዝብ ተወካዮች ምክር ቤት አባል የሆኑት የተከበሩ ደሳለኝ ጫኔ (ዶ/ር)፣ ምክር ቤቱ የተፈጸመውን የዘር ማጥፋት ወንጀል በአስቸኳይ አጀንዳነት ይዞ ውይይት እንዲያደረግ ጥያቄ ቢያቀርቡም፣ የምክር ቤቱ አፈ ጉባኤ የተከበሩ አቶ ታገሰ ጫፎ ጥያቄውን ውድቅ ማድረጋቸው ይታወቃል፡፡ ነገር ግን ምክር ቤቱ በአጀንዳነት ከተያዙ ጉዳዮች ውጭ ያሉ አሰቸኳይ ጉዳዮችን ለማስተናገድ የሚያስችል አሰራር በሕግ ተፈቅዶለታል። አስቸኳይ ጉዳዮችን በተመለከተ በሕግ ያልተገደበና ሙሉ ሥልጣን የተሰጠው የምክር ቤቱ አፈጉባኤ ሲፈቅድ ጥያቄውን ማስተናገድ እንደሚቻልም በግልጽ ተደንግጓል፡፡
    በክቡር ደሳለኝ (ዶር) እና በክቡር አቶ ታገሰ ጫፎ መካከል የተደረገው የንግግር ምልልስ ቪዲዮ ላይ በግልጽ እንደሚታየው፣ የተከበሩ አቶ ታገሰ ጫፎ የምክር ቤቱን መተዳደሪያ ደንብ ጥሰው “በአጀንዳ ባልተያዘ ጉዳይ ላይ አንወያየም” በማለት፣ በአስቸኳይ ጉዳይነት እንዲያዝ የተጠየቀውን የዘር ማጥፋት ወንጀል ጉዳይ ውድቅ አድርገውታል፡፡

    በደሳለኝ (ዶ/ር) የቀረበው ጥያቄ፣ ምክር ቤቱ የሚመራበትን ደንብና ሥርአት መሰረት አድርጎ የቀረበ አስቸኳይ ጉዳይ ቢሆንም ፣ ምክር ቤቱ ግን በይፋዊ ማኅበራዊ ድረገጹ ባወጣው አጭር መግለጫ ግን “ምክር ቤቱ የውይይትና የምክክር እንጅ የፖለቲካ ነጥብ ማስቆጠሪያ መሆን የለበትም” በማለት የዘር ማጥፋት ወንጀልን በሚመለከት የቀረበን አጀንዳ ተራ የፖለቲካ ነጥብ ማስቆጠሪያ ነው ሲል መሳለቁን ጠቅሷል፡፡

     አፈጉባኤው በአጀንዳነት ያልተያዘ አስቸኳይ ጉዳይን የማስተናገድ በሕግ የተፈቀደና ያልተገደበ ሙሉ ሥልጣን እያላቸው ፣ ጥያቄውን ውድቅ ማድረጋቸው ፣ ምክር ቤቱ ባወጣው አጭር መግለጫ፣ የብሔራዊ ደኅንነት ከፍተኛ ስጋት የሆነውንና ኢትዮጵያንና ሕዝቦቿን ወደ ለየለት ቀውስ ውስጥ የሚከትን የዘር ማጥፋት ወንጀልን የሚመለከት ጉዳይ “ተራ የፖለቲካ ነጥብ ማስቆጠሪያ” ሲል መሳለቁ ፣ (አብን)ን ፣ የአማራን ሕዝብና መላው አገር ወዳድ ኢትዮጵያውንን ያሳዘነ፣ የተጣለበትን አደራ ያጎደለ ተግባር ሆኖ እንዳገኘው አብን በመግለጫው አስታውቋል፡፡
     
    አፈጉባኤ ታገሰ ጫፎ ሰኔ 16 ቀን 2014 ዓ.ም በጻፉት ደብዳቤ፣ እጅግ አንገብጋቢና ጊዜ የማይሰጠውን የዘር ማጥፋት የወንጀል ጉዳይ፣ መንግስት እየወስድኩት ነው ከሚለው የሕግ ማስከበር ዘመቻ ጋር ተያይዞ እየቀረቡ ካሉ ቅሬታዎች ጋር ተዳብሎ የጤና ፣ ማኅበራዊ ፣ ባህልና ስፖርት ጉዳዮች ቋሚ ኮሚቴ አጣርቶ እንዲቀርብ የሰጡት ቀን ያልተቆረጠለት ትዕዛዝ ለተፈጸመው የዘር ማጥፋት ወንጀል የማይመጥንና እጅግ የዘገየ ከመሆኑም በላይ ፤ ሰኔ 11 ቀን 2014 ዓ.ም በቶሌ ቀበሌና አጎራባች ቀበሌዎች ነዋሪ በሆኑ የአማራ ተወላጆች ላይ የደረሰውን እልቂት አስመልክቶ የኦሮሚያ ክልል መንግስትም ሆነ የፌዴራሉ መንግስት ባለስልጣናት ባልካዱበት ሁኔታ፣ በሕግ ማስከበር ዘመቻው ከሚነሱ ቅሬታዎች እኩል ተጣርቶ እንዲቀርብ ማዘዛቸው፣ አፈጉባኤውና የተከበረው ምክር ቤት ጉዳዩን የያዘበትን አግባብ ጥያቄ ላይ የሚጥል መሆኑንም አብን አብራርቷል፡፡

     በቶሌ ቀበሌና አጎራባች ቀበሌዎች የደረሰው የዘር ማጥፋት ወንጀል አስመልክቶ የሰጠው የይጣራ ትዕዛዝ ቀን ያልተቆረጠለትና ብዙ ውስንነት እያለበትም ቢሆን ጥረቱን የሚያበረታታ ሲሆን ፣ አፈጉባኤውና ምክር ቤቱ እስካሁን አገር ባወቀው ጉዳት ልክ የሚመጥን ተገቢውን እርምጃ ለመውሰድ ዳተኛ መሆናቸው አብንን እንዳሳሰበው ገልጿል፡፡ በበርካታ የአገር ውስጥና ዓለም ዓቀፍ ሚዲያዎች ዘገባ መሰረትና ከታመኑ ምንጮች በተገኝ መረጃ እስካሁን ድረስ ቢያንስ 600 መቶ የቶሌ ቀበሌና አጎራባች ቀበሌዎች ነዋሪ የሆኑ የአማራ ተወላጆች ተገድለው በጅምላ ቀብራቸው የተፈጽሟል። ሌሎች በርካታ ተጠቂዎች ቀብራቸው ተፈጽሞ ያላለቀ ስለመሆኑና በአስር ሽህዎች የሚቆጠሩ ተፈናቃዮች ተገቢውን እርዳታና ድጋፍ አጥተው እየተንገላቱ ስለመሆናቸው የተረጋገጠ መሆኑንም ጠቁሟል። ነገር ግን ምክርቤቱ እስካሁን በታወቀው ጉዳት ልክ ተመጣጣኝ እርምጃ ሊወስድ በተገባው ነበር፡፡ ስለሆነም አብን ለአፈጉባኤውና ለሕዝብ ተወካዮች ምክር ቤቱ ባስተላለፈው ጥሪ ፣
     
     አፈ ጉባኤው በምክር ቤቱ አባል ደሳለኝ (ዶ/ር) የቀረበላቸውን አስቸኳይ ጉዳይ በአጀንዳነት እንዲቀበሉና ምክር ቤቱ በቶሌ ቀበሌና አጎራባች ቀበሌዎች የተፈጸመውን የዘር ማጥፋት ወንጀል አስመልክቶ ውይይት እንዲያደረግና በጉዳዩ ላይ ተገቢውን አቋም እንዲያዝ፣ ጠቅላይ ሚኒስትሩና የሚመሩት መንግስታቸው የአገሪቱንና ሕዝቦቿን ደኅንነት ለማረጋገጥ የሚያስችል አቅምና በቂ የጸጥታ ኃይል የገነቡ ለመሆኑ በተደጋጋሚ ማረጋገጫ እየሰጡ ባለበት ወቅት ፣ በአማራ ሕዝብ ላይ ሳያቋርጥ እያሰለሰ የቀጠለውን የዘር ፍጅት ወንጀል ለማስቆም ያልቻሉበትንና የጥቃቱ ሰለባ ለሆኑ ተፈናቃዮች ተገቢውን ድጋፍ ለማድረስ ያልቻሉበተን ምክንያት ለምክር ቤቱ ቀርበው እንዲያስረዱ እንዲታዘዙ ጠይቋል።
       
     በኢትዮጵያ በተለይም በአማራ ሕዝብ ላይ በተከታታይና በመደበኛ ሁኔታ እየተፈጸመ ያለው የዘር ፍጅትና የዘር ማጥፋት ወንጀል ተጨባጭ ፣ ግልጽና ተገማች አደጋ /Clear and Present Danger/ በመሆኑ ፣ የችግሩ ምንጭ የሆኑ የሕግ ፣ የመዋቅርና የሥርአት-አቀፍ ችግሮች እስኪፈቱ ድረስ፣ ችግሩ ወደለየለትና አጠቃላይ የዘር ፍጅት /Full-Scale Genocide/ ከመድረሱ በፊት አደጋውን መከላከል የሚቻለው በዘር ማጥፋትና በሰብዓዊነት ላይ የሚፈጸሙ ወንጀሎችን መከላከል የሚያስችል ብሔራዊ ፖሊሲ ፣ ስትራቴጂ ፣ ሕግና አሰራር /National Mechanism for the Prevention of Genocide and other Atrocious Crimes/ ሥራ ላይ በማዋል በመሆኑ ፣ ምክር ቤቱ ፖሊሲውንና አሰራሩን ሥራ ላይ በማዋል ታሪካዊ ኃላፊነቱን እንዲወጣም አብን በመግለጫው አሳስቧል።

    spot_img
    - Advertisement -

    ትኩስ ጽሑፎች

    ተዛማጅ ጽሑፎች

    - Advertisement -
    - Advertisement -