Wednesday, December 7, 2022
ሌሎች ዓምዶች
    - Advertisment -
    - Advertisment -

    ኢትዮጵያን ተባብሮ መታደግ ላይ ይተኮር!

    ማንም አገሩን የሚወድ ዜጋ የወቅቱን አስጨናቂ ጉዳዮች በሚገባ መገንዘብ ይጠበቅበታል፡፡ የኢትዮጵያን ህልውና የሚፈታተኑ ድርጊቶች ገጽታቸውንና አቅጣጫቸውን እየቀያየሩ መሆናቸውን ብቻ ሳይሆን፣ ከድርጊቶቹ በስተጀርባ ያሉትን የሩቅና የቅርብ ኃይሎች ፍላጎትም መረዳት ያስፈልጋል፡፡ በኢትዮጵያ የተሟላ ሰላም እንዲሰፍን ለማድረግ የሚቻለው፣ ኢትዮጵያ ያለችበትን ነባራዊ ሁኔታ ከተለያዩ ፍላጎቶች አኳያ በመረዳት የበኩልን ለመወጣት ጥረት ሲደረግ ነው፡፡ በመንግሥትና በሕዝብ፣ እንዲሁም በተለያዩ የፖለቲካ ተዋንያን መካከል ሊኖር የሚገባው ጤነኛ ግንኙነት መታሰብ ይኖርበታል፡፡ መንግሥት የሕዝብን ደኅንነት የመጠበቅ ኃላፊነቱን እንዴት መወጣት እንዳለበት፣ ሕዝብም ይህ እንዲሳካ ምን ዓይነት ድጋፍ ማድረግ እንደሚኖርበት፣ ተፎካካሪ የፖለቲካ ድርጅቶች ከመንግሥት ጋር ሊኖራቸው የሚገባው በመርህ ላይ የተመሠረተ ግንኙነት፣ ያኮረፉ የፖለቲካ ኃይሎች ጭምር በሰላማዊ መንገድ የፖለቲካ ምኅዳሩ ተሳታፊ የሚሆኑበት ማዕቀፍ፣ በአጠቃላይ ለሰላማዊና ለሥልጡን መንግሥታዊ አስተዳደር መፈጠር አስተዋጽኦ ያስፈልጋል፡፡ ከዚህ ውጪ በሴራና በክፋት ላይ የተመሠረተ ግንኙነት አገርን ቀውስ ውስጥ እንደሚከት ለማንም የተሰወረ አይደለም፡፡ ከዚህ ቀደም በተደጋጋሚ ከስህተት ጎዳና ለመውጣት የሚያግዙ ምክሮች ቢሰጡም፣ ሰሚ ባለመኖሩ ምክንያት ሕዝብም አገርም ተጎድተዋል፡፡  

    ‹‹የማይሳሳት የሞተ ብቻ ነው›› የሚል ዕድሜ ጠገብ አባባል አለ፡፡ ከግለሰብ ጀምሮ አገርን እስከሚመሩ ሰዎች ድረስ ሲሠሩ ይሳሳታሉ፡፡ ዋናው ቁም ነገር ግን ስህተትን አለመደጋገም ነው፡፡ በአሁኗ ኢትዮጵያ በየቀኑ የሚከናወኑ ድርጊቶች ከመብዛታቸው የተነሳ፣ ለስህተት የሚዳርጉ በርካታ አጋጣሚዎች አሉ፡፡ ስህተትን እያነፈነፉ በተለያዩ ገጽታዎች ለአደባባይ የሚያበቁም እየበዙ ነው፡፡ መንግሥት በበርካታ ችግሮች የተከበበች አገርን ሲመራ በየቀኑ ከበርካታ ስህተቶች ጋር ይገናኛል፡፡ ገና ለገና ለትችት እዳረጋለሁ በማለት፣ ከስህተት ለመሸሽ ሲል ሥራ መፍታት ግን አይቻለውም፡፡ የሆኖ ሆኖ በጥናት ላይ የተመሠረተ ሥራ ሲያከናውን መሳሳት ቢኖርም፣ ስህተቱ ከፍተኛ ጉዳት ስለማያደርስ ያን ያህል የሚያስቸግር አጣብቂኝ ውስጥ አይገባም፡፡ ጥናት የጎደላቸውና የባለሙያ ዕገዛ የሌላቸው ‹‹የትም ፍጪው ዱቄቱን አምጪው›› ዓይነት ሥራዎች ግን፣ ከወቀሳ ባለፈ ውግዘት ያስከትላሉ፡፡ ስህተት ተፈርቶ ሥራ መቆም የለበትም ሲባል፣ የሚከናወነው ሥራ በሚገባ የታቀደና ውጤታማነቱ አስተማማኝ ሊሆን ይገባዋል ማለት ነው፡፡ በዚህ መሠረት አንዳንድ ጉዳዮችን ማንሳት ተገቢ ነው፡፡

    በፖለቲካው መስክ በኢትዮጵያ ከተወሰዱ ዕርምጃዎች መካከል አንዱና ዋነኛው፣ በተለያዩ ምክንያቶች በሥርዓቱ በመገፋታቸው ከአገር ውጪ ሆነው ትጥቅ ያነሱና በስደት የነበሩ ግለሰቦችና ቡድኖች ወደ አገር ቤት መመለሳቸው ነው፡፡ ይህ የፖለቲካ ምኅዳሩን ለመክፈት የሚረዳ በጎ ዕርምጃ በሥርዓት ሊከናወን ባለመቻሉ ግን፣ ኢትዮጵያ ውስጥ ደም አፋሳሽ ጥቃቶችና ጭፍጨፋዎች እንዲከሰቱ ምክንያት ሆኗል፡፡ በዚህም ሳቢያ በርካቶች ሕይወታቸውን ሲያጡ፣ ሚሊዮኖች ከቀዬአቸው ተፈናቅለዋል፡፡ መጠኑ የማይታወቅ ሀብት ወድሟል፡፡ የአገሪቱ አንፃራዊ ሰላም ደፍርሶ የዜጎች በነፃነት የመዘዋወር፣ የመሥራትና ሀብት የማፍራት መብት ከመገደቡም በላይ ከፍተኛ ሥጋት ደቅኗል፡፡ ትጥቅ አልፈታም ያለ ኃይል ጥቃትን የፖለቲካ ትግል መሣሪያ በማድረግ በተደጋጋሚ ንፁኃንን ጨፍጭፏል፡፡ ምንም እንኳ በለውጥ ውስጥ በምትገኝ አገር የሚጠበቁ ችግሮች ቢኖሩም፣ እንዲህ ዓይነቱን ዓይን ያወጣ ሥርዓተ አልበኝነት አደብ የማስገዛት ኃላፊነት ያለበት መንግሥት ነው፡፡ አሁንም ቢሆን መንግሥት በሕግ በተሰጠው ኃላፊነት የዜጎችን ሕይወት መታደግ አለበት፡፡

    አሮጌው የበጀት ዓመት ተጠናቆ አዲሱ ሊጀመር አንድ ሳምንት ቀርቶታል፡፡ በአሮጌው በጀት ዓመት ከታቀደው ምን ያህሉ ተሳካ? ምን ያህሉስ ሳይሳካ ቀረ? ታቅዶ ከእነ ጭራሹ ያልተከናወነውስ ምን ያህል ነው? ለመጪው በጀት ዓመት የሚተላለፈውና አዲሱ ዕቅድስ? ማለት ተገቢ ነው፡፡ ከግለሰብ ጀምሮ እስከ አገር ድረስ የተጠናቀቀው በጀት ዓመት ስንክሳሮች ሲመዘዙ፣ በየቦታው ከሚያጋጥሙ ሰቆቃዎችና ከኑሮ ውድነቱ ጋር የሚያያዙ በርካታ ውጣ ውረዶች ታልፈዋል፡፡ ወደፊትም ሊቀጥሉ የሚችሉ ስለመኖራቸው ጥርጥር አይኖርም፡፡ ከወዲሁ ግን መንግሥት የሚዘጋጅባቸው በርካታ ዕቅዶች ሲኖሩ፣ አፈጻጸማቸውና ውጤታቸው ካለፈው የማይሻል ከሆነ ግን ስህተትን መደጋገም ነው የሚሆነው፡፡ በዜጎች ደረጃም ከግላዊ ሕይወታቸው እስከ አገራቸው ድረስ በሚኖራቸው የሥራ ድርሻ፣ ስህተትን ላለመደጋገም ጥረት ካልተደረገ ውጤት ‹‹ታጥቦ ጭቃ›› ነው የሚሆነው፡፡ መንግሥት የአገርንና የሕዝብን ደኅንነት የሚከላከልበት አሠራር ብቁና ቀልጣፋ መሆን ይጠበቅበታል፡፡ የዋጋ ግሽበትን የሚከላከልበት፣ አቅርቦትና ፍላጎትን የሚያጣጥምበትና ኢኮኖሚውን ከማነከስ ወደ ማንሰራራት የሚቀይርበት በተግባር የተፈተነ ብልኃት ሊኖረው ይገባል፡፡ በሰንካላ ምክንያቶች ስህተት ውስጥ መዘፈቅ ተገቢ አይደለም፡፡

    በኢኮኖሚው መስክ የተወሳሰቡ ችግሮች ይታያሉ፡፡ ጠንክሮ መሥራት ከተቻለ ግን የሚያቅት አንዳችም ነገር የለም፡፡ የኢኮኖሚ ፖሊሲውንና ስትራቴጂዎችን ከአንድ ወንዝ በመቅዳት ሳይሆን፣ አዋጭና ጠቃሚ የሆኑ ልምዶችንና ተሞክሮዎችን ከአገሪቱ ተጨባጭ ሁኔታ አኳያ አቀናብሮ ሥራ ላይ ማዋል የግድ ይሆናል፡፡ የአሜሪካ፣ የአውሮፓ፣ የእስያና የተሳካላቸው የአፍሪካ አገሮችን ልምድ መቅሰም ተገቢ ነው፡፡ ሰፊ ለም መሬት፣ ከፍተኛ የውኃ ሀብት፣ በርካታ የቱሪስት መስህቦች፣ ብዛት ያላቸው ማዕድናትና የመሳሰሉት ፀጋዎች ያሏትና በወጣት በተሞላች አገር የውጭ ምንዛሪ እጥረት፣ የብድር ጫና፣ የሥራ ፈጠራ ችግር፣ ረሃብ፣ ጠኔ፣ አስቸኳይ ዕርዳታ፣ ወዘተ እያሉ ምክንያት መደርደር የስህተቶች ሁሉ ስህተት ነው፡፡ ሀብት ላይ ተቀምጦ ሳይሠሩ መራብ ነውር ነው፡፡ በኢኮኖሚው መስክ ከፍተኛ ባለሙያዎችና ብቃት ያላቸው ስትራቴጂስቶች አሉ በሚባልባት አገር ውስጥ ስንዴ፣ ዘይትና የመሳሰሉትን ከውጭ መለመንም ሆነ መሸመት አሳፋሪ ነው፡፡ ኢትዮጵያን የልማትና የዕድገት አውራ ማድረግ እየተቻለ፣ በየዓመቱ የልመና ከረጢት ይዞ መዞር ትልቅ ውርደት ነው፡፡ ይህንን የመሳሰሉ ስህተቶች ማስወገድ ይገባል፡፡ የድህነት አረንቋ ውስጥ ሆኖ መዘባነን ያስገምታል፡፡

    ችግሮችን ማወቅ ለመፍትሔ ቅርብ እንደሚያደርግ ሁሉ፣ ያሉ የሌሉ ችግሮችን  እየነቀሱና ስህተቶች ብቻ እያነፈነፉ ጥላሸት መቀባት ትልቅ ስህተት ነው፡፡ በተለይ በማኅበራዊ የትስስር ገጾች አገሪቱ ያበቃላት ይመስል ነጋ ጠባ ማላዘን የተለመደ ሆኗል፡፡ ኢትዮጵያ የታቀፈቻቸው ችግሮች ትናንት የተፈጠሩ ብቻ ሳይሆኑ ዘመናትን የተሻገሩም አሉ፡፡ የተለያዩ ፍላጎቶች ባሏቸው ኃይሎች የተደራጁ ወገኖች፣ ሕዝብ በአገሩ ላይ ያለው እምነት እንዲሸረሸርና መንግሥት ደግሞ ከመቼውም ጊዜ በላይ እንዲሽመደመድ ብርቱ ትግል ያደርጋሉ፡፡ በዚህ ላይ ሐሰተኛ ወሬዎች በስፋት እየተሠራጩ በማኅበረሰቦች መካከል ግጭት እንዲቀሰቀስ ያደርጋሉ፡፡ በአሁኑ ጊዜ ማንነትን መሠረት ያደረጉ ጥቃቶችና ግድያዎች እየበዙ ነው፡፡ ዜጎችን በማንነታቸው ምክንያት በጭካኔ በመጨፍጨፍ የአገሪቱ ሰላም ከፍተኛ ቀውስ ውስጥ እየገባ እንደሆነ ለማሳየት ጥረቱ ቀጥሏል፡፡ በዚህ መሀል ክቡር የሆነው የሰው ሕይወት ለአደጋ ይጋለጣል፡፡ የአገር ህልውና ፈተና ውስጥ ይወድቃል፡፡ ይህንን የአገር ደዌ በጊዜ ፈውሶ ኢትዮጵያን መስመር ማስያዝ ይገባል፡፡ ዘወትር ከስህተት ጋር ተቃቅፎ መኖር አይቻልም፡፡ የስህተት መንገድ መድረሻው ውድቀት ስለሆነ፣ ኢትዮጵያን ተባብሮ መታደግ ላይ ይተኮር!

    በብዛት የተነበቡ ፅሁፎች

    በሰባት የመንግሥት ተቋማት ላይ ሰፊ የወንጀል ምርመራ እየተካሄደ መሆኑ ተሰማ

    በስምንት የመንግሥት ዩኒቨርሲቲዎች ላይ የወንጀል ምርመራ እንዲጀመር ተወስኗል ከ1.4 ቢሊዮን...

    ጎህ ቤቶች ባንክ ወደ ቤት ልማት ለመግባት ብሔራዊ ባንክን ፈቃድ ጠየቀ

    በስምንት ወራት ውስጥ 7.9 ሚሊዮን ብር ማትረፉን አስታውቋል ኢትዮጵያ ውስጥ...

    ሒጂራ ባንክ የ143 ሚሊዮን ብር ኪሳራ አስመዘገበ

    በኢትዮጵያ ሙሉ ለሙሉ ከወለድ ነፃ ባንክ አገልግሎት ለመስጠት ወደ...

    ወጋገን ባንክ ከገጠመው ቀውስ በማገገም በ2014 የሒሳብ ዓመት የተሻለ ትርፍ አገኘ

    ለሁለት ዓመታት የዘለቀው የሰሜን ኢትዮጵያ ጦርነት የቢዝነስ እንቅስቃሴያቸው ከተስተጓጎለባቸው...
    - Advertisment -

    ትኩስ ፅሁፎች

    በኦሮሚያ ክልል የተፈጸመው ጭፍጨፋና ሥጋቱ

    ኦሮሚያ ክልል ከቀውስ አዙሪት መላቀቅ ያቃተው ይመስላል፡፡ ከ200 በላይ...

    እናት ባንክ ካፒታሉን ወደ አምስት ቢሊዮን ብር ለማሳደግ ወሰነ

    መጠባበቂያን ሳይጨምር የባንኩ የተጣራ ትረፍ 182 ሚሊዮን ብር ሆኗል እናት...

    ቡና ባንክ ዓመታዊ ትርፉን ከአንድ ቢሊዮን ብር በላይ ማሻገር ቻለ

    ቡና ባንክ በ2014 የሒሳብ ዓመት ዓመታዊ የትርፍ ምጣኔውን ለመጀመርያ...

    ወጋገን ባንክ ከገጠመው ቀውስ በማገገም በ2014 የሒሳብ ዓመት የተሻለ ትርፍ አገኘ

    ለሁለት ዓመታት የዘለቀው የሰሜን ኢትዮጵያ ጦርነት የቢዝነስ እንቅስቃሴያቸው ከተስተጓጎለባቸው...
    spot_img

    ተዛማጅ ፅሁፎች

    የመንግሥት ተቀዳሚ ኃላፊነት ንፁኃንን ከአጥቂዎች መከላከል ነው!

    በኦሮሚያ ክልል ውስጥ ንፁኃን ያለ ኃጢያታቸው የሚጨፈጨፉበት ምክንያት ብዙዎችን ግራ ከማጋባት አልፎ፣ የአገርና የጠቅላላው ሕዝብ ዕጣ ፈንታ ጉዳይ ከመቼውም ጊዜ በላይ እያሳሰበ ነው፡፡ መንግሥት...

    ምሁራንና ልሂቃን ከአስተዋዩ ሕዝብ ታሪክ ተማሩ!

    አገራዊ ምክክሩን ለመጀመር ዝግጅት እየተደረገ ባለበት በዚህ ታሪካዊ ወቅት፣ የኢትዮጵያን የትናንት ትውልዶችና የዛሬውን ይዘት መመርመር አስፈላጊ ነው፡፡ ያለፉት ዘመናት ትውልዶች ለአገራቸው የነበራቸው ቀናዒነት የፈለቀበት...

    ለዘመኑ የማይመጥን አስተሳሰብ ዋጋ ያስከፍላል!

    በኳታር እየተከናወነ ያለው የዓለም ዋንጫ በእግር ኳስ ጨዋታ ውስጥ ያልተጠበቁ ማራኪ ቴክኒኮችንና ታክቲኮችን ከአስገራሚ ውጤቶች ጋር እያስኮመኮመ፣ ከዚህ ቀደም በነበረ ችሎታና ዝና ላይ ተመሥርቶ...