Sunday, February 5, 2023
- ማስታወቂያ -
- ማስታወቂያ -

የኦሮሚያ የኅብረት ሥራ ባንክ አጠቃላይ ሀብት ከ114 ቢሊየን ብር በላይ ሆነ

- ማስታወቂያ -

ተዛማጅ ፅሁፎች

ኦሮሚያ የኅብረት ሥራ ባንክ በ2014 የሐሳብ ዓመት የባንኩን አጠቃላይ ሀብት በ2013 ዓ.ም. ከነበረበት በከፍተኛ ደረጃ በማሳደግ 114.36 ቢሊዮን ብር ማድረሱን አስታወቀ። ባንኩ ከምንጊዜውም የተሻለ እንቅስቃሴ አድርጌበታለሁ ባለው በዚህ የሒሳብ ዓመትም 3.9 ቢሊየን ብር ያልተጣራ ትርፍ ማግኘቱንም ይፋ አድርጓል።

ከሀብት መጠኑ ዕድገት ጋር በተያያዘ የተሰጠው መረጃ እንደሚያመለክተው በቀደመው በ2014 የሒሳብ ዓመት 81.54 ቢሊዮን ብር የነበረውን ጠቅላላ የባንኩ ሀብት በ2014 የሒሳብ ዓመት በ32.8 ቢሊዮን ብር በማሳደግ 114.36 ቢሊዮን ማድረስ ችሏል፡፡

የባንኩ የባንኪንግ ኦፕሬሽን ምክትል ፕሬዚዳንት ጋዲሳ ማሞ እንደገለጹት ባንኩ በተገለጸው የሒሳብ ዓመት ከፍተኛ ዕድገት የታየበት ትርፍ ማስገንዘቡን የገለጹ ሲሆን፣ ባንኩ በተጠቀሰው ዓመት ያገኘው ያልተጣራ የትርፍ መጠን ከባለፈው ዓመት ተመሳሳይ ወቅት ከተገኘው ትርፍ በ65.2 በመቶ የሚልቅ መሆኑን አስገንዝበዋል። 

በዚሁ መሠረትም ከንብረት እርጅና፣ መጠባበቂያና ከታክስ በፊት ባንኩ ያስመዘገበው የትርፍ መጠን 3.95 ቢሊዮን ብር እንደሆነ አስታውቀዋል፡፡ በዘንድሮው የሒሳብ ዓመት የተገኘው ትርፍ በቀደመው ዓመት ተመሳሳይ ወቅት አስመዝግቦት ከነበረው 2.39 ቢሊዮን ብር ጋር ሲነፃፀር በ1.56 ቢሊዮን ብር በላይ ብልጫ አለው፡፡   

ባንኩ ከፍተኛ ስኬት አግኝቼበታለሁ ብሎ የገለጸው ሌላው አፈጻጸሙ የተከፈለ ካፒታል መጠኑን በ66.26 በመቶ ማሳደግ መቻሉን ነው፡፡ ባንኩ በ2013 የሒሳብ ዓመት የነበረው የተከፈለ ካፒታል መጠን 4.65 ቢሊዮን ብር የነበረ ሲሆን፣ በዘንድሮው የሒሳብ ዓመት የባንኩ የተከፈለ ካፒታል መጠን 7.73 ቢሊየን ብር መድረሱን አስታውቋል።

በተጨማሪም የባንኩ አጠቃላይ ካፒታል (የተከፈለና የተፈረመ ካፒታል መጠን) በ2013 የሒሳብ ዓመት ከነበረበት በ4.2 ቢሊዮን ብር ወይም በ52 በመቶ በማሳደግ በ2014 የሒሳብ ዓመት መጨረሻ ላይ 12.28 ቢሊየን ብር ማድረስ መቻሉን ባንኩ አመልክቷል፡፡ 

ባንኩ ዘንድሮ ያስመዘገበው የካፒታል መጠን በግል ንግድ ባኮች የቀዳሚነት ሥፍራን ከያዙት ተርታ ያሠልፈዋል።

በኢንዱስትሪው ውስጥ ከግል ባንኮች ቀዳሚውን ደረጃ የያዘው አዋሽ ባንክ በ2013 የሒሳብ ዓመት መጨረሻ ላይ አስመዝግቦት የነበረው ጠቅላላ ሀብት (ኤልሲ ማርጅንን ጨምሮ) 107.7 ቢሊየን ብር የነበረ ሲሆን፣ በ2014 የሒሳብ ዓመት ዘጠኝ ወራት ውስጥ ዕድገት በማስመዝገብ 165 ቢሊየን ብር መድረሱን የባንኩ መረጃ ያመለክታል። አዋሽ ባንክ በተከፈለ ካፒታል መጠንም ከግል ባንኮች ቀዳሚውን ደረጃ የያዘ ሲሆን የካፒታል መጠን የያዘ ሲሆን፣ በ2014 የሒሳብ ዓመት የሦስተኛው ሩብ ላይ የነበረው የተከፈለ የካፒታል መጠኑ 10.2 ቢሊዮን ብር እንደደረሰ መረጃው ያመለክታል።

ኦሮሚያ የኅብረት ሥራ ባንክ ዘንድሮ ባደረገው ስኬታማ የሥራ እንቅስቃሴም ከፍተኛ የውጭ ምንዛሪ እንዳገኘ የገለጸ ሲሆን፣ በሒሳብ ዓመቱ ማጠናቀቂያ 432.9 ሚሊየን ዶላር ማገኘቱን አስታውቋል።

የኦሮሚያ ኅብረት ሥራ ባንክ ስኬታማ አፈጻጸም ማስመዝገቡን የገለፀበት ሌላው ዘርፍ ከወለድ ነፃ የባንክ አገልግሎት ሲሆን፣ ባንኩ በዚህ የአገልግሎት መስኮት ካሰባሰበው የተቀማጭ ገንዘብ መጠን ከ83 በመቶ በላይ ወይም ከ13.5 ቢሊዮን ብር በላይ የሚሆነውን መልሶ ለብድር ማዋሉን አመልክቷል፡፡

ይህ ከወለድ ነፃ ተቀማጭና ለብድር ያዋለው የገንዘብ መጠን ከሌሎች የግል ባንኮች አንፃር ሲታይ ከፍተኛ የሚባል እንደሆነ የሚያመለክተው የባንኩ መረጃ እስከ ሒሳብ ዓመቱ መጨረሻ ድረስ ከወለድ ነፃ የባንክ አገልግሎት ከተሰበሰበው 16 ሚሊዮን ብር ተቀማጭ ገንዘብ ውስጥ በብድር የሰጠው ወይም ፋይናንስ ያደረገው 13.5 ቢሊዮን ብር ደርሷል፡፡ 

ባንኩ ዘንድሮ ከወለድ ነፃ የባንክ አገልግሎት የብድር መጠን በ63 በመቶ ዕድገት የታየበት እንደሆነ የገለጹት ምክትል ፕሬዚዳንቱ፣ ከወለድ ነፃ የባንክ አገልግሎት አስቀማጭ ደንበኞቹንም ቁጥር በ24 በመቶ ማሳደግ ችለናል ብለዋል፡፡ 

ከወለድ ነፃ ባንክ አገልግሎት ባንኩ በ2013 የሒሳብ ዓመት በአስቀማጭነት መዝግቧቸው የነበሩ ደንበኞች ቁጥር 1.86 ሚሊየን የነበረ ሲሆን፣ ዘንድሮ ግን ይህንን  ቁጥር ወደ 2.29 ሚሊየን ማድረስ ችሏል፡፡ 

ይህ ባንኩ ከወለድ ነፃ የባንክ አገልግሎት  ያሰባሰበውን የገንዘብ መጠን በከፍተኛ ሁኔታ መልሶ ፋይናንስ በማድረግ በኢንዱስትሪው በቀዳሚነት እንዲቀመጥ አድርጎታል።

በአገሪቱ በአሁኑ ወቅት 13 ባንኮች ከወለድ ነፃ የባንክ አገልግሎት የሚሰጡ ሲሆን፣ ካሰባሰቡት ከወለድ ነፃ የተቀማጭ ገንዘብ ውስጥ መልሰው ፋይናንስ ያደረጉት ከ30 በመቶ ያነሰ መሆኑን መረጃዎች ያሳያሉ፡፡

በሒሳብ ዓመቱ የባንኩ አጠቃላይ የአስቀማጮች ቁጥር በ17.4 በመቶ ያደገ ሲሆን፣ በአነድ ዓመት 1.35 ሚሊዮን አዳዲስ ቆጣቢዎችን ማፍራት ችሏል፡፡ ይህ የኦሮሚያ የኅብረት ሥራ ባንክ የአስቀማጮች ቁጥር አሁንም ከግል ባንኮች የመጀመርያውን ደረጃ የያዘ ስለመሆኑ የባንኩ ምክትል ፕሬዚዳንት ተናግረዋል፡፡ 

በ2013 ባንኩ የነበረው የባንክ ደብተር የከፈቱ ደንበኞች ቁጥር 7.73 ሚሊየን እንደነበር ምክትል ፕሬዚዳንቱ አስታውሰዋል፡፡ በዚህም አጠቃላይ የባንኩ ተቀማጭ ገንዘብ መጠን በ31 መቶ በማደግ 96.77 ሚሊየን ብር ማድረሱን አስታውቀዋል፡፡

ባንኩ በሒሳብ ዓመቱ የሰጠውን የብድር መጠን በ52 በመቶ ማደግ መቻሉን የገለጹት ምክትል ፕሬዚዳንቱ ይህም እስከ ሒሳብ ዓመቱ መጨረሻ ድረስ የሰጠው ብድር ክምችት 84.26 ቢሊዮን ብር ደርሷል፡፡ በ2013 መጨረሻ ላይ የነበረው የብድር ክምችት 55.27 ቢሊዮን ብር እንደነበር ያስታወሱት አቶ ጋዲሳ በብድር አመላለስ ረገድ በሒሳብ ዓመቱ ጥሩ አፈጻጸም እንደነበረው ጠቅሰዋል፡፡ ከብድር አመላለስ ጋር በተያያዘ ብዙ ተግዳሮቶች ቢኖሩም የተያዘውን ዕቅድ ማሳካት ስለመቻሉ ጠቅሰዋል፡፡ ባንኩ አሁንም የተበላሸ የብድር መጠኑ ከሁለት በመቶ በታች በመሆኑ ብድሩ ጤናማ ሆኖ ስለመቀጠሉ አስታውሰዋል፡፡

እንደ ምክትል ፕሬዚዳንቱ ገለጻ ዓመታዊ የባንኩ ገቢም በ47.7 በመቶ ዕድገት በማሳየት 11.9 ቢሊዮን ብር የደረሰ ሲሆን፣ ወጪው ደግሞ 40.25  በመቶ አድጎ 7.98 ቢሊዮን ብር ሆኗል፡፡ 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች