Friday, December 2, 2022
ሌሎች ዓምዶች

    የአማራ ክልል ቱሪዝም ከጦርነት በኋላም አለማገገሙ ተገለጸ

    - Advertisement -spot_img

    በብዛት የተነበቡ

    ዘርፉ መልሶ ማቋቋሚያ 11 ቢሊዮን ብር ተመድቧል

    ከሕወሓት ጋር በነበረው ጦርነት ምክንያት በከፍተኛ ሁኔታ የተጎዳው የአማራ ክልል ቱሪዝም፣ ከጦርነቱ በኋላም ማገገም አለመቻሉን የክልሉ ቱሪዝም ቢሮ አስታወቀ።

    በኮሮና ምክንያት በቱሪዝም ዘርፉ መቀዛቀዝ ከታየ በኋላ እየተሻሻለ የነበረ ቢሆንም፣ በሰሜኑ ክፍል በነበረውና ወደ አማራና አፋር ክልሎች በተስፋፋው ጦርነት ምክንያት ሙሉ ለሙሉ በሚባል ደረጃ ቆሞ ነበር።

    ሆኖም በተለይ ጦርነቱ ካበቃና ክልሉ ወደ ቀደመው ሰላም ከተመለሰ በኋላም የቱሪዝም ዘርፉ መነቃቃት አለማሳየቱን፣ በአማራ ክልል ቱሪዝም ቢሮ የቱሪዝም አገልግሎቶችና ምርቶች ባለሙያ አቶ ጥላሁን መዝገቡ ገልጸዋል።

    በጦርነቱ ምክንያት የነበረው የፀጥታ ሥጋት አሁንም በጎብኚዎች ዘንድ እምነት እንዳይኖር አድርጓል ያሉት ባለሙያው፣ በዚህም ምክንያት በክልሉ የቱሪዝም ፍሰቱ እንደተቀዛቀዘ መቀጠሉን አብራርተዋል።

    ‹‹ከጎብኚዎቻችን መካከል 90 በመቶ የሚሆኑት ከውጭ በተለይም ከምዕራቡ ዓለም የሚመጡ ነበሩ፣ በጦርነቱ ምክንያት የነበረው ተፅዕኖ ምክንያት በርካታ አገሮች ዜጎቻቸውን ወደ ኢትዮጵያ እንዳትሄዱ በማለት ጭምር ሲያስጠነቅቁ ነበር፣ በዚህም ምክንያት አሁንም ድረስ ሥጋቱ አልተቀረፈም፤›› ብለዋል።

    ነገር ግን በክልሉ በአብዛኛው የፀጥታ ሥጋት የተቀረፈ ቢሆንም፣ በተለይም በመጪው ነሐሴ ወር የሚከበሩት የሻደይ፣ አሸንድዬና ሶለል በዓላት የሚከበሩባቸው አንዳንድ ቦታዎች አሁንም በሕወሓት ሥር ስላሉ የፀጥታ ሥጋትም ያለባቸው ናቸው ሲሉ አስረድተዋል።

    ነሐሴ 13 ቀን የሚከበረው የደብረ ታቦር በዓል፣ እንዲሁም የሻደይና የአሸንድዬ በዓላትን በድምቀት ለማክበርና የቱሪዝሙን እንቅስቃሴ ለማሻሻል እየተሞከረ ነው ያሉት አቶ ጥላሁን፣ እነዚህም በዓላት በዋናነት ከሚከበሩባቸው ቦታዎች በተጨማሪ በባህርዳርና አዲስ አበባም ለማክበር መታቀዱን ገልጸዋል። ይህም የክልሉን ሰላም ወደ ነበረበት መመለሱንና በ2015 ዓ.ም. ለሚኖረው የቱሪዝም እንቅስቃሴ የማስተዋወቅ ሥራ አንዱ አካል ነው ብለዋል።

    በጦርነቱ ምክንያት በርካታ ሠራተኞች እንደተፈናቀሉና እነሱንም መተካት አስፈላጊ መሆኑን ገልጸው፣ የመልሶ ማቋቋም መርሐ ግብር ውስጥ ዘርፉ መካተቱን አስረድተዋል። በሆቴሎች፣ በመዝናኛዎችና በሌሎችም በበርካታ የቱሪዝም መሠረተ ልማቶች ላይ በጦርነቱ ምክንያት ጉዳት በመድረሱም በድጋሚ መገንባትና ወደ ሥራ እንዲመለሱ የማድረግ ሥራ እንደሚጠበቅም ተናግረዋል። ለዚህም ለቱሪዝም ዘርፉ መልሶ ማቋቋሚያ የሚሆን 11 ቢሊዮን ብር መመደቡን አቶ ጥላሁን አስረድተዋል፡፡  

    spot_img
    - Advertisement -

    ትኩስ ጽሑፎች

    ተዛማጅ ጽሑፎች

    - Advertisement -
    - Advertisement -