Thursday, May 30, 2024
- ማስታወቂያ -
- ማስታወቂያ -

መንግሥት ኢኮኖሚው ውስጥ የሚለቀቀውን ገንዘብ እንዲቆጣጠር ተጠየቀ

spot_img

ተዛማጅ ፅሁፎች

የዋጋ ግሽበትን ለመቆጣጠር መንግሥት ኢኮኖሚው ውስጥ የሚለቀቀውን ገንዘብ እንዲቆጣጠር የኢትዮጵያ ኢኮኖሚክስ አሶሴሽን አሳሰበ፡፡

ማኅበሩ ያሳሰበው፣ በ19ኛውን ዓለም አቀፍ ኮንፈረንስ ዓርብ ነሐሴ 15 ቀን 2014 ዓ.ም. በጀመረበት ወቅት ሲሆን፣ የዋጋ ግሽበት ምክንያት ያላቸው ችግሮች በተከታታይ ሁለት ቀናት በጥናት እንደሚቀርቡ አስታውቋል፡፡

የኢትዮጵያ ኢኮኖሚክስ አሶሴሽን የጥናትና የፖሊሲ ዳሰሳ ዳይሬክተር ደግዬ ጎሹ (ዶ/ር) እንደተናገሩት፣ ለዋጋ ግሽበት ተብለው የሚወሰዱ ዕርምጃዎችን በጥናትና በጥልቀት ማየት ያስፈልጋል፡፡

ባለፉት ሦስት አሥርት ዓመታት የኢትዮጵያ ኢኮኖሚ ውስጥ የሚለቀቀው የገንዘብ መጠን፣ የኢኮኖሚ የዕድገት ደረጃን ግንዛቤ ውስጥ ያላስገባ እንደነበር አስታውሰዋል፡፡

የኑሮ ውድነትን ያረጋጋሉ የተባሉ መፍትሔዎች ላይ መንግሥት ትኩረት ማድረግ እንዳለበት፣ ኃላፊነት የሚሰማው የፖሊሲ መፍትሔ ማመንጨት እንደሚገባ ዳይሬክተሩ ተናግረዋል፡፡

መንግሥት ኢኮኖሚው ውስጥ የሚለቀቀውን ገንዘብ እንዲቆጣጠር ተጠየቀ | Ethiopian Reporter | ሪፖርተር
የኢትዮጵያ ኢኮኖሚክስ አሶሴሽን የጥናትና የፖሊሲ ዳሰሳ ዳይሬክተር ደግዬ ጎሹ (ዶ/ር)

በእነዚህ ዓመታት ውስጥ የኢትዮጵያን ኢኮኖሚ እስከ 44.4 በመቶ የሚያህል ገንዘብ ወደ ገበያ ሲገባ መቆየቱን የገለጹት ደግዬ (ዶ/ር)፣ ኃላፊነት የሚሰማው መንግሥት ያደርገዋል ተብሎ የማይጠበቅ ነው ብለዋል፡፡

አሁን ባለው ሁኔታ የብር የመግዛት አቅምን ማዳከም የሚሰጠው ጥቅም እስከተወሰነ ጊዜ መሆኑን መረጋገጡን በመግለጽ፣ ምርቶች ዓለም አቀፍ ተወዳዳሪ እንዲሆኑ ያደርጋል በሚል የተወሰደ ዕርምጃ ቢሆንም፣ ተመልሶ ሌላ ችግር ሊፈጥር እንደሚችል ጠቁመዋል፡፡

ዳይሬክተሩ እንደተናገሩት፣ የብር የመግዛት አቅምን መቀነስ የውጭ ቀጥተኛ ኢንቨስትመንት የሚሸረሽር ነው፡፡

በሌለ በኩል በጥናቱ ከቀረቡ የዋጋ ግሽበትና የኢኮኖሚ ዕድገት ማነቆዎች አንዱ ሙስና መሆኑን፣ ከአሥር ዓመታት በፊት ኢትዮጵያ ዝቅተኛ ሙስና ካሉባቸው አገሮች ተርታ እንደነበረች ተናግረዋል፡፡ ከ1997 ዓ.ም. በኋላ ግን ሁሉም አገልግሎቶች ልኬት ተዘጋጅቶላቸው ሙስና የሚፈጸምባቸው እንደሆኑ በጥናት አረጋግጠናል ብለዋል፡፡

የሙስና ችግር በተዘዋዋሪም ቢሆንም ኢፍትሐዊነትና ዘርፈ ብዙ የኢኮኖሚ ቀውሶችን የሚፈጥር በመሆኑ ቁጥጥር ሊደረግበት እንደሚገባ አሳስበዋል፡፡ ዳይሬክተሩ እንደገለጹት፣ በኢትዮጵያ ሙስና የተስፋፋባቸው 15 ዘርፎች ተለይተዋል፡፡

በሌላ በኩል መንግሥት የዋጋ ግሽበትን ለማረጋጋት የሚወስዳቸውን ዕርምጃዎች ማጤንና የሚሰጠውን ውጤት መለካት እንደሚገባ አክለዋል፡፡

የኢትዮጵያ ኢኮኖሚክስ አሶሴሽን ምክትል ፕሬዚዳንት ለማ ጉዲሳ (ዶ/ር) እንደተናገሩት፣ በሁለቱ ቀናት በኢትዮጵያ ኢኮኖሚ ላይ በማተኮር  19ኛውን ዓለም አቀፍ ኮንፈረንሱን ያካሂዳል።

የገንዘብ ሚኒስትሩ አህመድ ሺዴ በበኩላቸው፣ ሳይንሳዊ ትንታኔዎችን የተከተሉ የኢኮኖሚ ፖሊሲ ማሻሻያዎችን ለመቀበል፣ የገንዘብ ሚኒስቴር ዝግጁ ነው ብለዋል።  የልማት ግቦችን ለማሳካትም የዕዳ ጫናዎችን ለመቀነስ እየተሠራ መሆኑን፣ ይህም የፊሲካል አቅምን እንደሚያሳድግ ገልጸዋል።

‹‹ድርቅ፣ ኮሮና፣ ጦርነት፣ የሩሲያና የዩክሬን ግጭት በኢኮኖሚው ላይ ትልቅ ጫና አሳድሯል። ጫናውን ለመቅረፍ የሚያስችሉ ማስረጃና መረጃ ላይ የተመሠረቱ የኢኮኖሚ ፖሊሲ ማሻሻያዎች ያስፈልጋል፤›› ሲሉ ተናግረዋል። 

የኢኮኖሚ ፖሊሲ ማሻሻያ ለማድረግ የሚያስችሉ የፖሊሲ ግብዓቶችን ዳግም ከአሶሴሽኑ ለመቀበል ዝግጁ መሆናቸውን ተናግረዋል።

የብሔራዊ ባንክ ገዥ ይናገር ደሴ (ዶ/ር)፣ መንግሥት የፋይናንስ ዘርፉ ለአገር ኢኮኖሚ ዕድገት ወሳኝ መሆኑን፣ የዋጋ ግሽበትን ለመቀነስ ዘርፈ ብዙ ሥራዎችን እያከናወነ ነው ብለዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች