Tuesday, November 29, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    የኢትዮጵያ ስም በዓለም የስንዴ አምራቾች ሠንጠረዥ ውስጥ ተካቶ ያሳየን!

    ለዛሬ ስለኑሮ ውድነት፣ ስለሸቀጦች ዋጋ መናርና የአቅርቦት እጥረት፣ ወይም ስለገበያ ሥርዓቱ መበላሸት የምንታዘባቸውን መንቀሳችንን ገታ አድርገን፣ ኢትዮጵያችን ስትደሰት እኛም እንደ ሸማች፣ ነገር ግን ሸማችነታችንን ሳንዘነጋ የተሰማንን ክብርና ሞገስ ለመግለጽና ለማመሥገን ወደናል። 

    አትሌቶቻችን በ18ኛው የዓለም አትሌቲክስ ሻምፒዮና ላይ በመሳተፍ ባስመዘገቡት ውጤት የኢትዮጵያን ሰንደቅ ዓላማ ከፍ ብሎ እንዲውለበለብ አድርገዋል፡፡ ጣፋጭ ድል በማስመዝገብም የኢትዮጵያን ስም በበጎ ጀግንነት አስጠርተዋል፣ ‹‹እናመሠግናለን!››፡፡ በተለይ ባለፉት ጥቂት ዓመታት አገራችንን ለማሳነስ የተደረገብንን ርብርብ ዛሬም ያልተሰበሰቡ የጠላቶቻችንን አንደበት አስይዘውልናል ማለት ይቻላል፡፡ በአገር ውስጥ ከምንሰማቸው እኩይ ተግባራት አላቀውን ብሩህ ነገርም እንዳለ አመላክተውናል፡፡ ኢትዮጵያውያን ተከፋፍለን የምንጠፋ አለመሆናችንን፣ ሁሌም ተባብረን የምንሠራ ከሆነ አሸናፊ መሆን የምንችል መሆኑን ጭምር ደግመን ደጋግመን ማሰብ እንዳለብን አስታውሰውናል፡፡ ኢትዮጵያውያን ለሰላማዊውም ፍልሚያ ቢሆን አሸናፊ መሆን እንደምንችል የዓለም ሕዝብ ያረጋግጥ ዘንድ ነግረውልናል፣ ለዚህም አሁንም እናመሠግናቸዋለን፡፡ በአገር ውስጥ የገጠሙን የተለያዩ ፈተናዎች በልዩነታችን የተፈጠሩ ሳይሆን፣ ጥቂቶች በፈጠሩት ሸፍጥ መሆኑንም በተግባር በማሳየት አገር ለመከፋፈል እንቅልፍ አጥተው ለሚደክሙ ጠላቶች እውነታውን አሳይተውልናል፣ ለዚህም አትሌቶቻችንን ልናመሠግን ይገባል፡፡  

    አንድ መሆን ለድል እንደሚያበቃ፣ ትብብር ከማናቸውም ችግር እንደሚያወጣንና የሚያምርብንም ኅብር ሆነን አንድነት ስንታይ ብቻ ነው። ከመለያየት አንድነት እንደሚበጅ ምስክር ሆነዋል፡፡ አዎ ለዚህም ምክንያት ስለሆኑ ምሥጋናችን ወደር የለውም፡፡ 

    የኢትዮጵያም ለዕንቁዎቿ ተገቢውን ሽልማት መስጠቷ ተገቢ ነው። ኢትዮጵያ ውዱን ስጦታ ለበረከቱላት ልጆቿ ውድ ሀብቷን መስጠቷ ተተኪ አትሌቶቿ የአሸናፊነት ባህልን እንዲወርሱና ከትውልድ ትውልድ እንዲያስተላልፉ የሚያነሳሳ ነው። ይህ ብቻ አይደለም። ውጤቱን ያመጡ አትሌቶቿ ወደፊት በሕይወት ጎዳና ወድቀው እንዳይታዩ ጥሪት ይሆናቸዋልና ሽልማቱ ሲያንስ እንጂ የሚበዛባቸው አይደለም። 

    ይህ ድል በተለይ በዚህ ወቅትና እንዲህ ባለ መንገድ መገለጹ የአንድ የስፖርታዊ ድል ተደርጎ መወሰድ የለበትም፡፡ በርካታ ትርጉም ያለው ነው፡፡ ዋናው ጉዳይ ግን እንዲህ ያለውን ድል በሌሎች ዘርፎችም ማስመዝገብ የሚቻል መሆኑን በመገንዘብ የአገርን ስም በበጎ ለማስጠራት የአትሌቶቻችንን ውጤት መማሪያ ማድረጉ ላይ ነው፡፡ ዛሬ በአገር ደረጃ የምንሰቃይባቸው በርካታ ጉዳዮች በአንድነትና በትብብር ሊቀረፉ ይችላሉ፡፡ ከተባበርን፣ በቅንነት ከሠራንና በየተሰማራንበት ዘርፍ ለአገልጋይነት ከተንበረከክን የሚገኘው ውጤት የሚሊዮኖች ይሆናል፣ አገርን ያስከብራል፡፡ ይህ ዘንድሮ የዓለም አትሌቲክስ ሻምፒዮና ውጤት የተጋረዱ ዓይኖቻችንን የምንገልጥበት ሆኖ ከመጠላለፍ ወጥተን ለአገር በጋራ የምንሠራበት አጋጣሚ አድርገን ልንወስደው መቻል አለብን፡፡  መልካም አጋጣሚ ልንጠቀምበት እንችላለን፡፡ 

    ለዚህም ኢትዮጵያን የበለጠ ለማጉላት፣ ለማስከበር፣ ሁሌም አንገታችንን ከሚያስደፉን ድህነት እንድትወጣ በሚያደርጉ ተግባራት ላይ መሰማራት አንዱ ነው፡፡ ድኅነትን ታሪክ ለማድረግ ደግሞ አሁንም መደማመጥ፣ አገርን በማስቀደም በያለንበት የሙያና የሥራ ዘርፍ መሥራት ቀዳሚው ተግባራችን ሊሆን ይገባል፡፡

    ከድህነት ለመውጣት አንዱ ቁልፍ ነገር ደግሞ ባለን ሀብት በመጠቀም፣ ቢያንስ ራሳችንን በምግብ ለመቻል መረባረብ ለነገ የማይባል ተግባራችን መሆን አለበት፡፡ ዓለም እየተለወጠ ነው፡፡ እየበዛ የመጣውን ሕዝብ ለመመገብ ፈተና እየሆነ ነው፡፡ የተፈጥሮ ሀብትን በአግባቡ ተጠቅሞ አምራች ሆኖ ለመገኘት አትሌቶቻችን ምሳሌ በማድረግ ልንሠራ ይገባል፡፡ ከዚህ የሚገኘው ውጤት ደግሞ ለራስ ብቻ ሳይሆን ለሌሎች የምንተርፍበትን ዕድል ይሰጠናል፡፡

    በአንዱ የዓለም ጥግ የሚፈጠር ቀውስ ይዞት የሚመጣው መዘዝ በልቶ ለማደር ምን ያህል ከባድ እንደሆነ የሩሲያና የዩክሬን ጦርነት ጥሩ ምስክር ነው፡፡ ይህ ጦርነት የዓለም ኢኮኖሚን በእጅጉ እየጎዳ ነው፡፡ ጦርነቱ ቢያበቃ እንኳ አሁን ዓለም ላይ የተፈጠረውን የዋጋ ንረት ለመመለስ እንዲህ ቀላል አይሆንም፡፡ ስለዚህ አሁን ካለንበት የበረታ የዋጋ ንረትና የኑሮ ውድነት ለመውጣት እንደ አትሌቶቻችን መተባበርና በእጃችን ባሉ ሀብቶቻችን ተጠቅሞ ማምረት በድህነት ላይ ድል እንድንቀዳጅ ያደርጋል፡፡ 

    ያለ ትብብር ውጤት የለም፡፡ አንድ ሆነን ለሁላችን አስበን ካልሠራን የትኛውንም ችግር ማሸነፍ አይቻልም፡፡ ተበታትነንና ለእኔ ብቻ ከሚል ክፉ አዙሪት ወጥተን ነገን አሻግሮ በመመልከት መሥራት ካልቻልን በአትሌቶቻችን ከፍ ያለው ሰንደቅ ዓላማችን በስፖርቱ ብቻ ተወስኖ ይቀራል፡፡ ስለዚህ እከሌ ከእከሌ ሳይል በአንድነት በመሥራት የሚገኘው ውጤት የሁሉም ነው፡፡ በኢኮኖሚያዊ ዕድገታችን የሚመዘገበው ውጤትም የአገር ስም ያስጠራል፡፡ እንደ አገር ለመቀጠልም ከእርስ በርስ ንትርክ ወጥቶ መሥራት አማራጭ የሌለው አማራጭ ነው፡፡ ድል አድራጊነት ከሕዝብ ደስታ በላይ ለአገር ክብር ነው፡፡ በየግላችን የሰሞኑ የአትሌቶቻችን ውጤት የሚያስተምረን ይህንን መሆን አለበት፡፡ 

    ወደ ዕድገት ለመጓዝ ደግሞ አገርን ያስቀደመ ዕሳቤ ትልቁን ቦታ ይይዛል፡፡ እያንዳንዱ ዕርምጃችን አገርን ከማሳደግ ዕሳቤ ጋር መቃኘት አለበት፡፡ ለብቻ ማደግ አይቻልም፡፡ አገርን ማሳደግ የሚቻለውም ከግላዊ ዕሳቤ፣ ከብሔር ምልከታና ከመራር አስተሳሰብ ወጥቶ ሲሠራ ብቻ ነው፡፡ በተለይ በተለይ አሁን ካንበት ዘርፈ ብዙ አዙሪት ለመውጣት ኢኮኖሚያዊ አቅማችንን ሊያጎለብቱና ሊያጎሉ በሚችሉ ተግባራት ላይ መታተርን ይጠይቃል፡፡  

    ኢትዮጵያን በዓለም መድረክ ቀዳሚ ሆና ልናያት የሚገባው በአትሌቲክስ ውድድር ብቻ መሆን የለበትም። ስሟ በበጎ የሚጠራው በአትሌቲክስ ብቻ መሆን የለበትም። ኢትዮጵያ ከስንዴ ልመና የወጣች ኢትዮጵያን ለማየት መመኘትና መታተር አለብን። በአትሌቲክስ የደረጃ ሰንጠረዥ ውስጥ ብቻ ሳይሆን በስንዴ አምራችነትና አቅራቢነትም ኢትዮጵያ በዓለም ደረጃ ከሚጠቀሱ አገሮች መካከል አንዷ መሆን አለባት፡፡ ይህንን ማድረግ የሚያስችል ሁሉ ነገር አለን፡፡ የምግብ ዘይት ተወደደ ተብሎ የሚማረሩ ዜጎች የሚኖሩባት ሳይሆን፣ የትም ሳንሄድ ባለን ሀብት ብቻ የምግብ ዘይት አምርተን በዚህ ምርት ቀዳሚ ከሚባሉ አገሮች አንዷ መሆን እንችላለን፡፡ በሌሎች ወሳኝ የሚባሉ የግብርና ምርቶችም በዓለም ደረጃ ሠንጠረዥ ውስጥ የምንገባበት ዕድሉ ብዙ ነው፡፡ ወደ እዚህ ለመግባት ግን አገርን ሰላም ማድረግ፣ ለሰላሙም መንግሥትን ብቻ መጠበቅ ሳይሆን፣ የሁላችንንም ትብብርና ቅንነት የሚጠይቅ መሆኑን ማመን ያስፈልጋል፡፡ ኢትዮጵያ በኢኮኖሚ ዘርፍ ስሟ የሚጠራ ለማድረግ በኅብረት እንሥራ፣ ለዚህ በጎ ምኞታችን ዳር መድረስ ደግሞ የተመቸ ፖሊሲ፣ የበቃ አመራርና ንፁህ እጅ የሚያስፈልግ መሆኑን ግን ሊሰመርበት ይገባል፡፡ እንዲህ እናደርጋለን በሚል ብቻ ከፊታችን ያሉ ችግሮችን አሁንም ከገባንበት ውጥንቅጥ የምንወጣው ተሻጋሪ ህልም ሲኖረን፣ ለዚህም ምቹ ሁኔታዎች ሲፈጠሩ ነው፡፡  

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት