Saturday, November 26, 2022
ሌሎች ዓምዶች
    - Advertisement -
    - Advertisement -
    ዜናየፌደራል መንግሥትና ሕወሓት ድርድሩን ሊያናጋ ከሚችል ንግግር እንዲቆጠቡ አሜሪካ አሳሰበች

    የፌደራል መንግሥትና ሕወሓት ድርድሩን ሊያናጋ ከሚችል ንግግር እንዲቆጠቡ አሜሪካ አሳሰበች

    ቀን:

    የፌደራል መንግሥትና ሕወሓት በቅርቡ የሚጀምሩትን የድርድር ሒደት ሊያሰናክል ከሚችል ጠበኛና ሐሰተኛ ንግግር እንዲቆጠቡ፣ የአሜሪካ መንግሥት አሳሰበ፡፡

    የአሜሪካ መንግሥት የአፍሪካ ቀንድ ልዩ መልዕክተኛ ማይክ ሐመር (አምባሳደር)፣ ከኢትዮጵያ መንግሥት ከፍተኛ ባለሥልጣናትና ከሕወሓት አመራሮች ጋር በቅርቡ ውይይት ማድረጋቸው ይታወሳል፡፡

    ልዩ ልዑኩና በኢትዮጵያ የአሜሪካ ኤምባሲ ጉዳይ ፈጻሚ ትሬሲ ጃኮብሰን ጠቅሶ በአዲስ አበባ የሚገኘው የአሜሪካ ኤምባሲ ማክሰኞ ነሐሴ 3 ቀን 2014 ዓ.ም. ባወጣው መግለጫ፣ በአፍሪካ ኅብረት አደራደሪነት በፌደራል መንግሥትና በሕወሓት ታጣቂዎች የተጀመረውን የድርድር ሒደት አሜሪካ እንደምትደግፍ፣ ነገር ግን ሁለቱ አካላት ሒደቱን ከሚያውክ የጠብ አጫሪና የሐሰተኛ ንግግር እንዲቆጠቡ አሳስቧል፡፡

    ወደ መቀሌ የተጓዙ የተባበሩት መንግሥታት ድርጅት፣ የአውሮፓ ኅብረት፣ የአሜሪካ፣ የካናዳና የጣሊያን ዲፕሎማቶች ከሕወሓት አመራሮች ጋር ተገናኝተው ስለሰላም ድርድሩ ከመነጋገር ይልቅ እነሱን መለማመጥ ላይ ያተኮረ እንደነበር፣ የጠቅላይ ሚኒስትሩ ብሔራዊ ደኅንነት አማካሪ ሬድዋን ሁሴን (አምባሳደር) ሰሞኑን በትዊተር ገጻቸው መግለጻቸው ይታወሳል፡፡ የሕወሓት አመራሮች በተደጋጋሚ ለድርድሩ የተለያዩ ቅደመ ሁኔታዎችንና የመደራደሪያ ነጥቦችን ያስቀመጡ ሲሆን፣ በተቃራኒው የፌደራል መንግሥቱ ድርደሩ ያለ ምንም ቅድመ ሁኔታ እንዲጀመር እንደሚፈልግ አስታውቋል፡፡

    የአሜሪካ መንግሥት ባለሥልጣናት ጉብኝትን ተከትሎ ኤምባሲው በላከው መግለጫ በትግራይ፣ በአማራና በአፋር ክልሎች እየተከናወነ ያለው የሰብዓዊ ዕርዳታ አቅርቦት በጥሩ ሁኔታ ላይ መሆኑን አብራርቷል፡፡

    በተጠናቀቀው እ.ኤ.አ. 2021 ብቻ ለጤና ለልማትና ለሰብዓዊ ዕርዳታ አቅርቦት  የሚያግዝ ከ68 ቢሊዮን ብር በላይ ከአሜሪካ መንግሥት መላኩ በመግለጫው ተጠቁሞ፣ በቅርቡ ለሰብዓዊ ዕርዳታና የድርቅ ማገገሚያ የሚሆን የ448 ሚሊዮን ዶላር ለኢትዮጵያ መሰጠቱ ተነግሯል፡፡

    የአሜሪካ መንግሥት ኢትዮጵያውያን በቸገራቸው ወቅት ከጎናቸው በመሆን እንደሚሠራ በመግለጫው የተገለጸ ሲሆን፣ ማይክ ሐመር (አምባሳደር) ባደረጉት የመጀመሪያ ጉብኝት፣ አሜሪካ የኢትዮጵያን ሉዓላዊነትና የድንበር ደኅንነት በመጠበቅ ዕገዛ እንደምታደርግ መናገራቸው ተመልክቷል፡፡

    ‹‹የታላቁ ህዳሴ ግድብ ግንባታ ሒደትንና የኢትዮጵያን በኢኮኖሚ የማደግ ዕቅድ በሚገባ ተረድቻለሁ፤›› ሲሉ ቋሚ መልዕክተኛው መናገራቸው ተገልጾ፣ የህዳሴ ግድቡ ድርድር ላይ በአፍሪካ ኅብረት የዲፕሎማቲክ ጥረት ሁሉንም የዓባይ (ናይል) ወንዝ ተጋሪ አገሮች በሚያግዝ መንገድ ስምምነት ይደረሳል ብለው እንደሚያስቡ ማስታወቃቸውም በመግለጫው ተብራርቷል፡፡

    በመግለጫው ጉዳይ ፈጻሚዋ ጃኮብሰን ከምክትል ጠቅላይ ሚኒስትርና የውጭ ጉዳይ ሚኒስትር አቶ ደመቀ መኰንን ጋር መነጋገራቸውን፣በ ታኅሳስ 2015 ዓ.ም. የሚካሄደው የአሜሪካና የአፍሪካ መሪዎች ስብሰባ ላይ ኢትዮጵያ እንድትሳተፍ ከአሜሪካ መንግሥት የቀረበውን ግብዣ ማስተላለፋቸውን፣ የኢትዮጵያ በዚህ ጉባዔ መሳተፍ የአሜሪካና የኢትዮጵያ ብሎም የአሜሪካና የአፍሪካ ግንኙነት እንደሚያጠናክርና የዓለምን ችግር በጋራ ለመፍታት እንደሚያግዝ መናገራቸው ተገልጿል፡፡

    spot_img
    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    የትርፍ መጠኑን በ127 በመቶ ያሳደገው አቢሲኒያ ባንክ ካፒታሉን በ2.5 ቢሊዮን ብር እንዲያድግ ወሰነ

    የአቢሲኒያ ባንክ ዳይሬክተሮች ቦርድ የባንኩ  ካፒታል በ2.5 ቢሊዮን ብር...

    አዋሽ ባንክ ካፒታሉን 55 ቢሊዮን ብር ለማድረስ ወሰነ

    የአዋሽ ባንክ ዳይሬክተሮች ቦርድ ዛሬ ህዳር 17 ቀን 2015...

    ከብሔራዊ ባንክ እውቅና ያገኘው ፔይሊንክ አክሲዮን ማህበር ምሥረታውን አካሄደ

    ከገንዘብ ንክኪ ነፃ የሆነ የዲጂታል ክፍያ ሥርዓት ለመተግበር ያቀደው...