Wednesday, September 28, 2022
ሌሎች ዓምዶች
    - ማስታወቂያ -
    - ማስታወቂያ -

    የሞጆ ጉምሩክ ላልተወሰነ ጊዜ ለዩኒ ሞዳል ዕቃዎች አገልግሎት መስጠት አቆመ

    - ማስታወቂያ -

    ተዛማጅ ፅሁፎች

    ከዚህ ቀደም በሞጆ የጉምሩክ ኮሚሽን በኩል በዩኒ ሞዳል ተመዝግበው ወደ አገር ውስጥ ለሚገቡ ዕቃዎች ይሰጥ የነበረው አገልግሎት በመጋዘን ጥበት ምክንያት ላልተወሰነ ጊዜ መቆሙ ታወቀ፡፡

    በኢትዮጵያ ጉምሩክ ኮሚሽን የሞጆ ቅርንጫፍ ጽሕፈት ቤት በኩል ለሁሉም አስመጪዎችና የጉምሩክ አስተላላፊዎች የተገለጸው ማስታወቂያ እንደሚያስረዳው፣ በዩኒ ሞዳል ወደ አገር ውስጥ የሚገቡ ዕቃዎች መስተንግዶ ከነሐሴ 3 ቀን 2014 ዓ.ም. ጀምሮ ላልተወሰነ ጊዜ መቆሙን ያስታውቃል፡፡

    የሞጆ ጉምሩክ ቅርንጫፍ ጽሕፈት ቤት ቁጥር 05 ለጉምሩክ አስተላላፊዎችና ለአስመጪዎች እንዳስታወቀው፣ የመንግሥት መጋዘን በመጠቀም በዩኒ ሞዳል ተጓጉዞ ቅርንጫፍ ጽሕፈት ቤቱ ለደረሱ ዕቃዎች አገልግሎት ሲሰጥ ቆይቷል፡፡ ነገር ግን ከጊዜ ወደ ጊዜ በዩኒ ሞዳል የሚወጡ (የሚመጡ) ዕቃዎች መጨመር የመጋዘን ጥበት በማስከተሉ፣ እንዲሁም በሌሎች ምክንያቶች ከነሐሴ 3 ቀን 2014 ዓ.ም. ጀምሮ ላልተወሰነ ጊዜ አገልግሎት ማቆሙን ገልጿል፡፡

    በዚህ ወቅት የትራንዚት ፈቃድ ተሰጥቷቸው ዕቃዎቻቸው በቅርንጫፍ ጽሕፈት ቤት ያልደረሱትና ቀደም ብሎ ከደረሱት ውጪ፣ በዩኒ ሞዳል ለሚመጡ ባለጉዳዮች ይሰጥ የነበረው አገልግሎት ላልተወሰነ ጊዜ መቆሙን፣ ሪፖርተር ያነጋገራቸው የጉምሩክ አስተላላፊዎች አረጋግጠዋል፡፡

    የዩኒ ሞዳል የትራንስፖርት ሥርዓት የአንድን ደንበኛ ጭነት ከመነሻ ወደብ ተጭኖ በባህር ትራንስፖርት አገልግሎት እስከ ጂቡቲ ድረስ ብቻ የሚቀርብበት አገልግሎት ሲሆን፣ በዚህ የትራንስፖርት ሥርዓት አስጫኚው ወይም አስመጪው ከባህር ወደብ (ከጂቡቲ) ዕቃውን ተረክቦ በራሱ ኃላፊነት በሚፈልገው አስጫኝ ድርጅት ወይም ግለሰብ አማካይነት ዕቃውን ወደ አገር ውስጥ የደረቅ ወደቦች የሚያስመጣበት አሠራር ነው፡፡

    የሞጆ ጣቢያ በፊትም በመልቲ ሞዳል የሚመጡ ዕቃዎች የሚገቡበት ቅርንጫፍ መሆኑን ያስረዱት አንድ የዕቃ አስተላላፊዎች ማኅበር አመራር አባል፣ በቅርንጫፍ ጽሕፈት ቤቱ የወጣው ማስታወቂያ የመጋዘን ሁኔታ በልዩ ሁኔታ ይሰጥ ከነበረ አገልግሎቱን በመጋዘን ጥበት ሳቢያ በዩኒ ሞዳል ለሚመጡ ጭነቶች (ዕቃዎች) አልሰጥም የሚል አንደምታ ያለው ነው ብለዋል፡፡

    ይነስም ይብዛ የጉምሩክ አስተላላፊዎች ላይ ተፅዕኖ የለውም የሚባል ውሳኔ አለመሆኑን ሪፖርተር አስተያየታቸውን ከተቀበላቸው የዘርፉ ባለሙያዎች ያረጋገጡ ሲሆን፣ ነገር ግን ቅርንጫፍ ጽሕፈት ቤቱ የቅድሚያ ተልዕኮው የመልቲ ሞዳል አገልግሎቶችን መስጠት በመሆኑ በተጨማሪነት የሚሰጠውን አገልግሎት ላልተወሰነ ጊዜ ማቆሙ የሚጠበቅ እንደሆነ ተናግረዋል፡፡

    በሌላ በኩል የወጣው ማስታወቂያ ከዩኒ ሞዳል ይልቅ ዕቃዎች በመልቲ ሞዳል እንዲመጡ የማሪታይም ባለሥልጣን ፍላጎት ስላለው፣ በዩኒ ሞዳል የሚመጡ ዕቃዎች መጠን እንዲቀንስ ታሳቢ ተደርጎ የተወሰነ ውሳኔ ሊሆን እንደሚችል የጉምሩክ አስተላላፊዎች ጨምረው ገልጸዋል፡፡

    የመልቲ ሞዳል የትራንስፖርት ሥርዓት  ዕቃዎችን ከተጫኑበት ወደብ እስከ ደረቅ ወደቦች ድረስ በአንድ ሰነድ ማጓጓዝ የሚያስችል አሠራር መሆኑ ይታወቃል። ደንበኞች ዕቃዎቻቸውን ከጂቡቲ ወደብ ለማንሳት ዋናውን የማስጫኛ ሰነድ ማቅረብና የባህር ትራንስፖርት ዋጋ መክፈል ሳይጠበቅባቸው ዕቃዎችን በአጓጓዡ በኢትዮጵያ የባህር ትራንስፖርትና ሎጂስቲክስ አገልግሎት ድርጅት ሙሉ ኃላፊነት ወደ አገር ውስጥ በአንድ ሰነድ ብቻ ለማስገባት የሚያስችል አሠራር መሆኑ የሚታወቅ ሲሆን፣ በአንፃሩ የዩኒ ሞዳል ትራንስፖርት ሥርዓት አስመጪው ከባህር ትራንስፖርት አገልግሎት ጋር ውል ከፈጸመ በኋላ እንደገና ለየብስ ማጓጓዝ ሥራ ከየብስ አጓጓዥ ጋር ውል የሚገባበት ነው።

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች