Friday, April 19, 2024
- Advertisement -
- Advertisement -
ዝንቅየዘላቂ ደስታ መሠረቶች

የዘላቂ ደስታ መሠረቶች

ቀን:

የመኖሪያ ክፍላቸው በሰከነ ድባብ የተሞላ ነው። በክፍሉ ውስጥ ዘርዘር ተደርገው የተቀመጡ ቁሳቁሶች ምቹና ቀለል ያሉ ናቸው። የዕቃዎቹ አቀማመጥ ለስለስ ካለው የግድግዳ ቀለም ጋር ተዋህዶ ክፍሉን ሰፋ አድርጎታል። መጋረጃውን ዘልቆ የሚገባው ነፋሻ አየር የሆነ ዓይነት ማራኪ ጠረን ያዘለ ይመስላል። ዳላይ ላማው ከተለመደው መቀመጫቸው ላይ በፍፁም እርጋታ ተቀምጠዋል። ደስተኝነትን ርዕስ አድርገን በመወያየት ላይ ነበርን።

‹‹ደስታን በመሻት ውስጣዊ ጉዞ ውስጥ መታለፍ ያለባቸው የተለያዩ ደረጃዎች አሉ።›› በማለት አስተምህሯቸውን ጀመሩ ‹‹በቡዲዝም መንፈሳዊ ፍልስፍና ውስጥ ፍፁማዊ ደስታ ምሉዕ ይሆን ዘንድ አራት ደረጃዎች በመሠረታዊነት መታለፍ እንዳለባቸው ይታመናል። የመጀመሪያዎቹ ሁለት ደረጃዎች ዓለማዊውን ሀብትና ዓለማዊውን እርካታ ማወቅ ነው። በእነዚህ ደረጃዎች ላይ ተመሥርቶ መንፈሳዊነትን የመሻት ለውጥ ይከተላል። በቡዲዝም ፍልስፍና ደስታን መሻት የመጨረሻው እርከን ፍፁማዊውን ተገልጾና አብርሆ መሻት ነው። እነዚህ አራት ደረጃዎች ተሟልተው ሲገኙ ከስቃይ ነፃ የሆነ ምሉዕ ደስታ ይፈጠራል።››

 ዳላይ ላማው ንግግራቸውን ገታ አድርገው ራሳቸውን አደላደሉና ሻያቸውን በእርጋታ ተጎነጩ። ‹‹…ሆኖም ለጊዜው ውስብስብ የሆኑትን መንፈሳዊ ጉዳዮች ወደ ጎን አድርገን ደስተኝነትን በጥልቀት ስናጤን በደስታ የተሞላ ሕይወት ለመምራት የሚያስፈልጉ መሠረታዊ አውታሮች እንዳሉ እንረዳለን።

- Advertisement -

Video from Enat Bank Youtube Channel.

‹‹መልካም ጤንነት በደስታ የተሞላ ሕይወት ለመምራት ከሚያስፈልጉ ነገሮች ውስጥ የመጀመሪያው ነው። ከዚህ በተጨማሪም መሠረታዊ ፍላጎቶችን ለማሟላት የሚያስችል ሀብትና ቁሳቁስም ያስፈልጋል። አወንታዊ የሆነ ማኅበራዊ ሕይወትና የእርስ በርስ ግንኙነትም በደስታ የተሞላ ሕይወት ለመምራት የሚያስፈልግ ሌላኛው መሠረት ነው።››

‹‹በርግጥ እነዚህና እነዚህን የመሳሰሉ ቅድመ ሁኔታዎች አስፈላጊ የሕይወት መሠረቶች እንደሆኑ እሙን ቢሆንም፣ እነዚህን እሴቶች በአግባቡ ጥቅም ላይ ማዋልና የተሟላ ሕይወት ለመምራት ወሳኙ ነገር አዕምሮ ወይም ውስጣዊ አመለካከት ነው።››
‹‹ሀብት፣ ቁሳቁስ፣ ዝናና ሞያዊ ስኬት በእጅጉ አስፈላጊ  የሕይወት ገጽታዎች ቢሆኑም፣ ትክክለኛው የሕይወት አመለካከትና የማመዛዘን አቅም ከሌለ እንደ ውድ ሀብት የምንቆጥራቸው እሴቶች ሁሉ ዋጋ ቢስ የሕይወት ገፀ በረከቶች ይሆናሉ።››
‹‹ሁሉም ሰው እንደሚያውቀው የዚህ ዘመን ማኅበረሰብ ከመቼውም ጊዜ በላቀ በሀብትና በቴክኖሎጂ የናጠጠ ማኅበረሰብ ነው። በማኅበረሰባችን ውስጥ የሚፈጠሩ ሀብታሞች ታይቶ በማያውቅ መልኩ እየተበራከቱ ነው። ሆኖም በዚህ ሀብታም ማኅበረሰብ ውስጥ የሚፈጠሩ ደስታ ቢስ ባለፀጋዎች ቁጥርም በአስደንጋጭ መልኩ እያሻቀበ ይገኛል። በስኬት ከተሞላው የታይታ ሕይወታቸው ሥር አሳዛኝ የብስጭትና ተስፋ የመቁረጥ ስሜት በሚፈጥር ብሎም ለከባድ የመጠጥና የአደንዛዥ ዕፅ ሱሶች በሚዳርግ የአዕምሮ ሁከት የሚሰቃዩ ግለሰቦች ቁጥር ስፍር የላቸውም። ከዚህም ከከፋ በዚህ የአዕምሮ ሁከት ተሰላችተው ሕይወታቸውን የሚያጠፉ ግለሰቦች ቁጥር ከዕለት ዕለት እየተበራከተ ይገኛል።››

ዳላይ ላማው ንግግራቸው አቋርጠው ለተወሰኑ ደቂቃዎች ትክ ብለው ሲመለከቱኝ ቆዩና ሐሳባቸውን እንዲህ ሲሉ አጠናቀቁ ‹‹አእምሮን መግራት እስካልቻልክ ድረስ ማንኛውንም ዓይነት ውጫዊ ፀጋ ብትጎናፀፍ ደስታ ርቆ ከተቀመጠ መና ይሆንብሃል። አእምሮህን ገርተህ ውስጣዊ ሰላምና መረጋጋት በውስጥህ ለማስረፅ ከቻልክ ዓለማዊውን ሀብት ቢርቅህ እንኳ የደስተኝነት በር ክፍት እንደሆነ ይጠብቅሀል።››

  • የደስታ ጎዳና አዕምሮን ማሠልጠን የቡድሂዝም የሕይወት ፍልስፍና

ትርጉም በዳኜ መላኩ

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ሰላማዊ የፖለቲካ ትግልና ፈተናው

የኦሮሞ ነፃነት ግንባር (ኦነግ) የፖለቲካ ኦፊሰር የአቶ በቴ ኡርጌሳን...

አበጀህ ማንዴላ! አበጀሽ ደቡብ አፍሪካ!

በአየለ ት. የፍልስጤም ጉዳይ የዓለም አቀፍ ፖለቲካንም ሆነ የተባበሩት መንግሥታትን...

የውጭ ባለሀብቶች ለኢትዮጵያውያን ብቻ በተፈቀዱ የንግድ ዘርፎች እንዲገቡ የመወሰኑ ፋይዳና ሥጋቶች

ጠቅላይ ሚኒስትር ዓብይ አዓመድ (ዶ/ር) የውጭ ኩባንያዎች በጅምላና ችርቻሮ...