Wednesday, February 8, 2023
- Advertisement -
- Advertisement -
ዜናበኢትዮጵያ የሚገኙ ስደተኞችን የተመለከተ የኢኮኖሚና ማኅበራዊ ደኅንነት ጥናት ሊደረግ ነው

በኢትዮጵያ የሚገኙ ስደተኞችን የተመለከተ የኢኮኖሚና ማኅበራዊ ደኅንነት ጥናት ሊደረግ ነው

ቀን:

የኢትዮጵያ ስታስቲክስ አገልግሎት ከዓለም ባንክ በተደረገለት የገንዘብ ድጋፍ ለመጀመርያ ጊዜ በኢትዮጵያ የሚገኙ የውጭ ስደተኞችን የተመለከተ የኢኮኖሚና ማኅበራዊ ደኅንነት ጥናት በመጪው ወር ሊያካሄድ ነው፡፡

ከዚህ ቀደም በአገልግሎቱ ይደረጉ የነበሩ ጥናቶች ትኩረታቸው በአገር ውስጥ ተፈናቃዮች ላይ ያተኩር እንደነበር የታወቀ ሲሆን፣ በተለይም ከጎረቤት አገሮች መጥተው በስደተኞች ጣቢያ የሚገኙ ስደተኞች አኗኗራቸው በተጨባጭ ምን ይመስላል? በሚለው ዙሪያ ማስረጃ ለማግኘት አዳጋች እንደነበር ተገልጿል፡፡

የኢትዮጵያ ስታስቲክስ አገልግሎት የቤተሰብ ጥናቶችና ዋጋዎች ስታስቲክስ  ዋና ዳይሬክተር አቶ ዓለማየሁ ተፈሪ ለሪፖርተር እንደገለጹት፣ የጥናቱ ዋነኛ ዓላማ ስደተኞች ያሉበትን ዋነኛ ሁኔታ ለማወቅ ነው፡፡ በኢትዮጵያ በርካታ ስደተኛ እንደመገኘታቸው የሚደረግላቸው ዕርዳታ ለሁሉም ተደራሽ ነው ወይ? የሚለውን ለማወቅ፣ በተለይም ስደተኞቹ ከሌሎች አገር የመጡ በመሆናቸው ምንድነው ያለባቸው ችግር? የሚሉትን ጉዳዮች ጥናቱ የሚመልስ መሆኑን አቶ ዓለማየሁ አስታውቀዋል፡፡

በአገር ውስጥ የሚገኙ የውጭ ስደተኞች ያለባቸውን ችግር ለይቶ ዕርዳታም ሆነ ሌሎች ድጋፎችን (ምግብ፣ ልብስ፣ ውኃና የተመጣጠነ ምግብ) የተመለከቱ ጉዳዮች ከዚህ ቀደም በጥናት ያልተደገፈ ስለሆነ በቂ መረጃ አልነበረም የሚሉት አቶ ዓለማየሁ፣ በዚህም ውስንነት እንደነበረና ይህ ጥናት መደረጉ እነዚህን ክፍተቶች ይሞላል ብለዋል፡፡

በኢትዮጵያ ከ800 ሺሕ እስከ አንድ ሚሊዮን የሚደርስ የስደተኛ ቁጥር እንደሚገኝ የተናገሩት ዋና ዳይሬክተሩ፣ እነዚህም በአብዛኛው የጎረቤት አገሮች ከሆኑት ኤርትራ፣ ደቡብ ሱዳን፣ ሱዳን፣ ሶማሊያ ፈልሰው የመጡ መሆናቸውን ገልጸዋል፡፡

ጥናቱ በሰባት የስደተኛ ጣቢያዎች ላይ የሚደረግ ሲሆን፣ አዲስ አበባን ጨምሮ አፋር፣ ጎንደር፣ ጋምቤላ፣ ቤኒሻንጉል ጉሙዝ፣ ጅግጅጋና ነጌሌ አካባቢ የሚገኙ ናቸው፡፡ እነዚህ ጣቢያዎች አብዛኛው የውጭ ስደተኞች የሚገኙባቸው ጣቢያዎች መሆናቸው ታውቋል፡፡ የኢትዮጵያ ስታቲስቲክስ አገልግሎት የሚያካሂደው የዳሰሳ ጥናት በ288 የቆጠራ ቦታዎች የሚገኙ 3,456 ቤተሰቦችን የሚሸፍን እንደሆነ ታውቋል፡፡

ጥናቱን ለማድረግ 127 መረጃ ሰብሳቢዎችን ጨምሮ በጠቅላላው ከ200 በላይ ሠራተኞች በመስክ ላይ ይሰማራሉ የተባለ ሲሆን፣ ከኅዳር 10 ቀን 2015 ዓ.ም. ጀምሮ ለሁለት ወራት ያህል ይደረጋል ተብሎ ይጠበቃል፡፡ የስደተኞች የኢኮኖሚና ማኅበራዊ ደኅንነት ጥናቱ በዓለም ባንክ የገንዘብ ድጋፍ የሚበጅለት ሲሆን፣ እስከ 200 ሺሕ ዶላር ሊጠይቅ እንደሚችል ዋና ዳይሬክተሩ ተናግረዋል፡፡

ከጥናቱ የሚገኙ ውጤቶች በመረጃ ላይ የተመሠረተ ውሳኔ ለመስጠት፣ መንግሥት ለስደተኞች የሚያስፈልጉ መሠረታዊ የሚባሉ አገልግሎቶችን ማሟላት እንዲችል አስፈላጊ መሆኑ ተመላክቷል፡፡

አቶ ዓለማየሁ እንዳስረዱት፣ ከዚህ ጥናት የሚገኙ መረጃዎች መንግሥት ለሚያወጣቸው የልማት ዕቅዶች፣ ስደተኞችን ለማቋቋም፣ በልማት ተሳታፊ እንዲሆኑ ለማድረግና ሕይወታቸውን ለማሻሻል ጠቃሚዎች ናቸው፡፡

እንደ የተባበሩት መንግሥታት የስደተኞች ጉዳይ ከፍተኛ ኮሚሽን (UNHCR) መረጃ ከሆነ በኢትዮጵያ ከሚገኙት ስደተኞች ውስጥ ግማሽ ገደማ ያህሉ የደቡብ ሱዳን ዜግነት ያላቸው ሲሆኑ፣ ከሶማሊያና ከኤርትራ የመጡ ዜጎች ተከታዩን ድርሻ ይይዛሉ፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

ጥቁር የመልበስ ውዝግብና የእምነት ነፃነት በኢትዮጵያ

ጠቅላይ ሚኒስትር ዓብይ አህመድ (ዶ/ር) ኅዳር ወር ላይ በፓርላማ...

የኢንሹራንስ ዘርፉን የሚቆጠጠር ገለልተኛ ተቋም ለመመሥረት እንቅስቃሴ ተጀመረ

ከ70 በላይ አዳዲስ የፋይናንስ ተቋማት ዘርፉን ሊቀላቀሉ ነው የኢትዮጵያ ብሔራዊ...

እስቲ አንገፋፋ!

እነሆ መንገድ። ጊዜና ሥፍራ ተጋግዘው በውስንነት ይዘውናል። መፍጠን ያቃተው...