Saturday, December 3, 2022
ሌሎች ዓምዶች
    - Advertisement -
    - Advertisement -
    ማኅበራዊዕፎይታን እያመጣ ያለው የተማሪዎች ምገባ

    ዕፎይታን እያመጣ ያለው የተማሪዎች ምገባ

    ቀን:

    በአዲስ አበባ ከተማ የሚገኘው ‹‹ማርች 8›› ቅድመ መደበኛና የመጀመርያ ደረጃ ትምህርት ቤትን እናቶች ሽንኩርት ቸርችረው፣ ጠላ ሸጠው፣ እንጀራ ጋግረው የሚያገኙትን ጥቂት ጥሪት በማጋጨትና ሐሳብ በማመንጨት እንደመሠረቱት ይነገራል፡፡

    ከአካባቢው ማኅበረሰብ ተጨማሪ ገቢ በማሰባሰብ በሰባት ሞግዚት፣ በአራት መምህራን፣ በሦስት ፅዳትና በሁለት የጥበቃ ሠራተኞች በጠቅላላ በ16 ሠራተኞች ማርች 8 ትምህርት ቤት በ1971 ዓ.ም. ነበር ወደ ሥራ የገባው፡፡

    ማርች 8 የተባለውም እነዚህ ትጉህና ጠንካራ እናቶች ይታወሱ ዘንድ እንደሆነ የትምህርት ቤቱ ነባር ሠራተኞች ነግረውናል፡፡ ከተለያዩ ሰዎች በሚገኝ ጥሪት ሲያገለግል ቆይቶ፣ በ1999 ዓ.ም. ሙሉ በሙሉ በመንግሥት አስተዳደር ሥር መግባቱንም አክለዋል፡፡

    ከቅድመ መደበኛ እስከ ስምንተኛ ክፍል ድረስ አገልግሎት እየሰጠ የሚገኘው ትምህርት ቤቱ ከ1,700 በላይ ተማሪዎችን ያስተምራል፡፡ የተማሪዎች ምገባ ፕሮግራም ከተጀመረ በኋላ ተማሪዎች ከፍተኛ ውጤት እያስመዘገቡ መሆኑም ይነገርለታል፡፡

    አቶ እሱባለው ባሴ የማርች 8 ትምህርት ቤት ርዕሰ መምህር ናቸው፡፡ በትምህርት ቤቱ መንግሥት የምገባ ፕሮግራም ከመጀመሩ በፊት የእናት ወግ በሚባል ፕሮግራም የተወሰኑ ተማሪዎች ተጠቃሚ እንደነበሩ ይገልጻሉ፡፡ ከእናት ወግ የምገባ ፕሮግራም በፊትም በተመረጡ የኢትዮጵያ ክልሎች ምገባው ይተገበር እንደነበር ያስታውሳሉ፡፡

    የነበረው የምገባ ሒደት በርካታ ክፍተቶች እንደነበረው፣ ሁሉንም ተማሪዎች ያማከለ ባለመሆኑ፣ ተመጋቢዎችን ለተለያዩ የሥነ ልቦና ጫና ያጋልጥ እንደነበር ተናግረዋል፡፡

    ከ2011 ዓ.ም. ጀምሮ በመንግሥት የምገባ ፕሮግራም የተካተተው ትምህርት ቤቱ፣ ዘንድሮ 1,726 ተማሪዎች የመዘገበ ሲሆን፣ ሁሉም ተማሪዎች በሃያ አንድ መጋቢ እናቶች አማካይነት የምገባ ፕሮግራሙ ተጠቃሚ ናቸው፡፡

    በምገባ ሒደቱ አፈጻጸም ከቦሌ ክፍለ ከተማ በጥራትና በተለያዩ ሥራዎች ተሸላሚ መሆናቸውን ርዕሰ መምህሩ ተናግረዋል፡፡

    የምገባ ፕሮግራም በማርች 8 ትምህርት ቤት

    በማርች 8 ትምህርት ቤት ሰኞ ጠዋት ለቁርስ የድንች ሳንዱች፣ ለምሳ ደግሞ ግማሽ እንጀራ በምስርና ጎመን ወጥ ይሰጣል፡፡ በምገባ ፕሮግራሙ ከሚቀርቡ የምግብ ዝርዝሮች መካከል የጥቁር ጤፍ አነባበሮ ጨጨብሳ፣ ድፎ ዳቦ፣ እንቁላል ፍርፍር፣ አልጫ ፍርፍር በሩዝ፣ ድንች ወጥ፣ ፓስታ/መኮረኒ ቅንጬ፣ አተር ክክ ሌሎችም ለተማሪዎች ይቀርባሉ፡፡

    ቅድመ መደበኛና ከአንደኛ እስከ ስምንተኛ ክፍል የሚቀርበው የምግብ ዝርዝር ተመሳሳይ መሆኑን፣ ለቅድመ መደበኛና ከዚያ በላይ የሚመገቡት ልዩነቱ የመጠን ብቻ መሆኑን ርዕሰ መምህሩ ገልጸዋል፡፡

    ትምህርት ቤቱ የተለየ የሚያደርገው የውኃ ችግር የሌለበት በመሆኑ፣ ንፅህናቸውን ለመጠበቅ ማስቻሉ ነው፡፡ ችግሮች ሲገጥሙ ደግሞ ራሱን የቻለ በምግብ ኮሚቴ አማካይነት እንዲፈታ ይደረጋል ብለዋል፡፡

    ምገባ ፕሮግራሙ የጤና ባለሙያ፣ የፋይናንስ ባለሙያና ሌሎችም ያሉበት በመሆኑ ክትትል እንደሚደረግበት ተገልጿል፡፡ በወረዳና በክፍለ ከተማ የሚመጡ ባለሙያዎችም ክትትልና ድጋፍ ያደርጋሉ፡፡

    በቀረበው ጥያቄ መሠረት ሁለት የምግብና የጤና ባለሙያ እንደተቀጠረላቸው አቶ እሱባለው ገልጸው፣ ሁሉም መምህራን ከሰኞ እስከ ዓርብ እንዲያስተባብሩ እንደሚደረግ፣ የአስተዳደር ሠራተኞች ጭምር አገልግሎት እየሰጡ እንደሚገኙ አክለዋል፡፡

    ዘጠኝ የተማሪ፣ መምህራን ኅብረት ምገባ ፕሮግራሙን እንደሚከታተሉና፣ የመመገቢያ ጠረጴዛ ወላጅ አዋጥቶ እንደገዛ ርዕሰ መምህሩ ገልጸዋል፡፡

    በ16 ትምህርት ቤቶች የተደረገ የምገባ ፕሮግራም ዳሰሳ

    አቶ እሱባለው የመመረቂያ ጽሑፋቸው ትኩረት ያደረገው በተማሪዎች ምገባ ፕሮግራም ላይ ነው፡፡ ጥናቱ በ16 ትምህርት ቤቶች ውስጥ ከምገባ በፊትና በኋላ ያለው የተማሪዎች ውጤት ላይ ያተኮረ ነበር፡፡

    በ2011 ዓ.ም.  በማርች 8፣ መለሰ ፍሬና ሌሎችም ትምህርት ቤቶች የተሠራው ጥናት እንደሚያሳየው የተማሪዎች ምገባ ከተጀመረ በኋላ የተማሪዎች ቁጥር የ11 በመቶ ዕድገት አሳይቷል፡፡

    በ2012 ዓ.ም. መጀመሪያ ከነበረበት 8,000 ገደማ ወደ 11,791 ተማሪዎች፣ 2013 ዓ.ም. 12,527 ተማሪዎች መመዝገባቸውን፣ ከምገባው በፊት ከነበረው የተማሪዎች ምዝገባ ጋር ሲነፃፀር ከ30 በመቶ በላይ ዕድገት ማሳየቱን አቶ እሱባለው ተናግረዋል፡፡

    በ2010 ዓ.ም. የነበረው የተማሪዎች ትምህርት ማቋረጥ 5.4 በመቶ እንደነበር፣ 2014 ዓ.ም. ደግሞ ወደ 4.6 በመቶ መውረዱን ርዕሰ መምህሩ የሠሩት ጥናት ያመላክታል፡፡ የተማሪዎች የመድገም ምጣኔ 2010 ዓ.ም. ላይ 24 በመቶ እንደነበር፣ በ2011 ዓ.ም. ወደ 19.3 በመቶ መቀነሱን ይገልጻሉ፡፡

    የሁለቱን ዓመት የመጠነ መድገም ሲነፃፀር፣ 4.7 በመቶ ልዩነት እንዳለው፣ በ2010 ዓ.ም. የተማሪዎች ከክፍል ወደ ክፍል የማለፍ ምጣኔ 76 በመቶ የነበረ ሲሆን፣ አሁን ላይ 90.1 በመቶ መድረሱን ገልጸዋል፡፡

    ርዕሰ መምህሩ እንደተናገሩት፣ የምገባ ፕሮግራሙ በተለይም ሴት ተማሪዎችን ያገዘና ውጤታማ ያደረገ ነው፡፡ ምገባ ፕሮግራሙ ከተጀመረ በኋላ ከትምህርት ቤት የሚቀሩ ሴት ተማሪዎች ቁጥር ቀንሷል፡፡ የክፍል ተሳተፎዋቸው ጨምሯል፡፡

    ትውልድ የሚገነባው ከሥር ጀምሮ መሆኑን የገለጹት አቶ እሱባለው፣ የምገባ ፕሮግራሙ ከቅድመ አንደኛ እስከ ስምንተኛ ክፍል መደረጉ ትክክል መሆኑንና በሌሎች የኢትዮጵያ አካባቢዎች ማስፋት እንደሚገባ ጠቁመዋል፡፡

     ተማሪዎች በትምህርት ላይ ያላቸው ትኩረት፣ የማለፍ ምጣኔ እንዲያድግ፣ የመድገም ምጣኔ እንዲቀንስ፣ ከትምህርት የመቅረትና ሌሎችም የትምህርት ቤት እንቅስቃሴዎች ላይ የምገባ ፕሮግራሙ ከፍተኛ ውጤት አምጥቷል፡፡ ፕሮግራሙ ከተጀመረ በኋላ ከግል ትምህርት ቤቶች ጭምር ወደ መንግሥት ትምህርት ቤት የሚገቡ ተማሪዎች እንዳሉም አስረድተዋል፡፡

    የቦሌ ክፍለ ከተማ አስተዳደር የትምህርት ጽሕፈት ቤት ኃላፊ ወ/ሮ ታጋይቱ አባቡ እንደተናገሩት፣ በቦሌ ክፍለ ከተማ በምገባ ሥርዓቱ ተጠቃሚ የሆኑት 17 ቅድመ አንደኛና ከአንድ እስከ ስምንተኛ የሚያስተምሩ ትምህርት ቤቶች ናቸው፡፡

    የምገባ ፕሮግራምን የሚቆጣጠሩ 29 ባለሙያዎች እንዳሉ፣ ለአንድ ሺሕ ተማሪ አንድ ባለሙያ ተመድቦ እየተሠራ እንደሚገኝ፣ ከከተማ አስተዳደር በወረደው የምግብ ዝርዝር አማካይነት ሁሉም ትምህርት ቤቶች አገልግሎት እየሰጡ እንደሚገኙና ይህም በመማር ማስተማር ሒደቱ ላይ አዎንታዊ ለውጥ እያስመዘገበ መሆኑን አክለዋል፡፡

    በክፍለ ከተማው የምገባ ፕሮግራም ተጠቃሚ የሆኑ ተማሪዎች ውጤት መሻሻል አሳይቷል፡፡ ከምገባ በፊት በክፍለ ከተማው ስምንተኛ ክፍልን ያልፉ የነበሩ ተማሪዎች ቁጥር ከነበረበት 54.6 በመቶ ከምገባ በኋላ ወደ 71.5 በመቶ ማደጉን ጠቁመዋል፡፡ አጠቃላይ የተማሪዎች ምገባ ፕሮግራም ማሻሻል የሚጠበቅበት

    እስካሁን ያለው በጀት ለአንድ ተማሪ በቀን 20 ብር ነው፡፡ ይህ ከኑሮ ውድነቱ ጋር ተያይዞ አዋጭ ባለመሆኑ መጋቢ እናቶች ጥያቄ እያቀረቡ ይገኛሉ፡፡ ይህን ጥያቄ ማርች 8 ትምህርት ቤትም ይጋራዋል፡፡

    ችግሩን ለማቃለል ከሸማቾችና ከኅብረት ሥራ ማኅበራት ጋር በማስተሳሰር  ቢሠራም፣ በጀቱ ቢስተካከል የሚል ጥያቄ ከመጋቢ እናቶች እየደረሳቸው መሆኑን ኃላፊዋ ወ/ሮ ታጋይቱ ገልጸዋል፡፡

    ከማኅበረሰቡ የሚቀርቡ አስተያየቶች ደግሞ በርካታ ቤተሰብ የኢኮኖሚ ችግር ውስጥ በመሆኑ ተማሪዎች ወደ ሁለተኛ ደረጃ ትምህርት ቤት ሲሸጋገሩም ምገባው ይቀጥል የሚል መሆኑንም አክለዋል፡፡

    የምገባ ፕሮግራሙ መጀመሩ ለትምህርት ማኅበረሰቡና ለመምህራን ዕፎይታ በመፍጠሩ፣ ተማሪዎችን ውጤታማ በማድረግ እንዲሁም ለወላጆች ወጪያቸውን በመጋራት ትልቅ አስተዋጽኦ እያበረከተ መሆኑን ሳይገልጹ አላለፉም፡፡

    spot_img
    - Advertisement -

    ይመዝገቡ

    spot_img

    ተዛማጅ ጽሑፎች
    ተዛማጅ

    [በተቋሙ ሠራተኞች የተወከሉ አንድ ባልደረባ ሚኒስትሩን ለማነጋገር ቀጠሮ ይዘው ወደ ቢሯቸው ገቡ]

    ጤና ይስጥልኝ ክቡር ሚኒስትር? ሰላም ሰላም ... ተቀመጥ! አመሠግናለሁ ክቡር ሚኒስትር!...

    የጉራጌ ዞን ጥያቄና የክላስተር አደረጃጀት የገጠመው ተቃውሞ

    መንግሥት የደቡብ ብሔር ብሔረሰቦችና ሕዝቦች ክልል አካል የነበሩ ዞኖችንና...

    አዋሽ ባንክ ካፒታሉን ወደ 55 ቢሊዮን ብር ለማሳደግ ያስገደደው ምክንያት ምንድን ነው?

    ባለፈው ቅዳሜ ጠቅላላ ጉባዔውን ያካሄደው አዋሽ ባንክ የ43 ቢሊዮን...

    አቢሲኒያ ባንክ ካለፈው ዓመት የ127 በመቶ ብልጫ ያለው ትርፍ በማግኘት አዲስ ታሪክ አስመዘገበ

    አቢሲኒያ ባንክ ከቀደሚ የሒሳብ ዓመት የ127 በመቶ ብልጫ ያለው...