Monday, January 30, 2023
- ማስታወቂያ -
- ማስታወቂያ -

ለኤሌክትሪክ ኃይል አመንጪ ግብዓት አምራችና ገጣጣሚ ኢንዱስትሪዎች የጉምሩክ ቀረጥ ማሻሻያ ተደረገ

- ማስታወቂያ -

ተዛማጅ ፅሁፎች

የገንዘብ ሚኒስቴር ካለፈው ዓመት መስከረም ወር ጀምሮ ተግባራዊ በተደረገው የጉምሩክ ታሪፍ ማሻሻያ እንዲቋረጥ በተደረገው የታሪፍ መደብ ጥያቄ ላነሱ የአሌክትሪክ ኃይል አመንጭ ግብዓት አምራቾችና ገጣጣሚ ድርጅቶች (ኢንዱስትሪዎች) የጉምሩክ ታሪፍ ማሻሻያ አደረገ፡፡

ሪፖርተር የተመለከተውና በገንዘብ ሚንስትር ዴኤታው እዮብ ተካልኝ (ዶ/ር) ተፈርሞ ለጉምሩክ ኮሚሽን የተመራው ሰርኩላር እንደሚያስረዳው፣ የአገር ውስጥ ኢንዱስትሪዎች እንዲበረታቱና ከለላ እንዲያገኙ በሁለተኛ መደብ ‹‹ሀ›› የጉምሩክ ታሪፍ ሲስተናገዱበት የነበረው ሥርዓት ካለፈው መስከረም ወር 2014 ዓ.ም. ጀምሮ ተግባራዊ በተደረገው ሁሉን አቀፍ የጉምሩክ ታሪፍ ማሻሻያ እንዲቀር ተደርጎ ነበር፡፡

ይህ በመሆኑ የተንዛዙ የታሪፍ ከለላ ሥርዓትና ፍትኃዊ ያልሆነ ውድድርና መሰል ችግሮች ቢፈቱም፣ ጥቂት የሚባሉ አምራቾችና ገጣጣሚዎች የማሻሻያው ምጣኔ እንዲስተካከል ያቀረቡትን ጥያቄ መሠረት ተገቢውን ዳሰሳ በማድረግ ማሻሻያ መደረጉን ገንዘብ ሚኒስቴር ገልጿል፡፡

የገንዘብ ሚኒስቴር እንዳስታወቀው፣ አምራቾችና ገጣጣሚዎች ይበልጥ ተወዳዳሪ ሆነው ገቢ ምርቶችን በአገር ውስጥ ለመተካት የሚደረገውን ጥረት ውጤታማ ለማድረግ በተወሰኑ ግብዓቶችና ምርቶች ላይ የጉምሩክ ቀረጥ ማሻሻያው ተደርጓል፡፡

በተደረገው አዲሱ የጉምሩክ ቀረጥ ማሻሻያ መሠረት ኃይላቸው ከ75 ኪሎ ቮልት ያልበለጠ የኤሌክትሪክ ኃይል አመንጪ ሙሉ ክፍሎችና ሮተሪ ኮንቨርተሮች በአገር ውስጥ ኢንዱስትሪ እንዲገጣጠሙ፣ ሙሉ በሙሉ ተበትነው የቀረቡ ከሆነ ነፃ የጉምሩክ ቀረጥ ልክ ሲፈቀድላቸው፣ በአገር ውስጥ ኢንዱስትሪ  እንዲገጣጠሙ በከፊል ተበትነው የቀረቡ ደግሞ አምስት በመቶ የቀረጥ ልክ፣ እንዲሁም ሙሉ በሙሉ ተገጣጥመው የቀረቡ ግብዓቶች ከሆኑ 15 በመቶ የቀረጥ ልክ እንዲኖራቸው (እንዲከፍሉ) ይደረጋል፡፡

ከመስከረም 2014 ዓ.ም. ጀምሮ ይፋ ተደርጎ በነበረው የታሪፍ ጥራዝ የታሪፍ ቁጥር 85.02 ላይ የሰፈሩት የኤሌክትሪክ ኃይል አመንጪ ሙሉ ክፍሎችና ሮተሪ ኮንቨርተሮች 15 በመቶ የጉምሩክ ቀረጥ ተጥሎባቸው እንደነበር ይታወሳል፡፡

በሌላ በኩል በአገር ውስጥ ኢንዱስትሪ እንዲገጣጠሙ ሙሉ በሙሉ ተበትነው የቀረቡ የብርሃን ፈንጣቂ ኤልኢዲ (LED) አምፖሎች አምስት በመቶ የጉምሩክ ቀረጥ ልክ ሲጣልባቸው፣ ሙሉ በሙሉ ተገጣጥመው የቀረቡት ላይ ደግሞ 25 በመቶ የጉምሩክ ቀረጥ ማሻሻያ ተደርጎባቸዋል፡፡ ከዚህ ቀደም አገልግሎት ላይ በነበረው የጉምሩክ ታሪፍ አወቃቀር መሠረት በአገር ውስጥ ኢንዱስትሪ እንዲገጣጠሙ በከፊል ተበትነው የቀረቡ እንዲሁም ሙሉ በሙሉ ተገጣጥመው የቀረቡ ብርሃን ፈንጣቂ የኤልኢዲ አምፖሎች ከ15 እስከ 25 በመቶ የጉምሩክ ቀረጥ ይጣልባቸው ነበር፡፡

የጉምሩክ ኮሚሽን በበኩሉ የጉምሩክ ሥነ ሥርዓት ለሚፈጽምባቸው ቅርንጫፍ ጽሕፈት ቤቶች በላካው ሰርኩላር የተወሰኑ አምራችና ገጣጣሚ ድርጅቶች በሚጠቀሙባቸው ግብዓቶች ላይ የጉምሩክ ቀረጥ ማስተካከያ እንዲደረግ ያቀረቡትን ጥያቄ መነሻ በማድረግ በተለዩ የዕቃ ዓይነቶች የጉምሩክ ታሪፍ ማሻሻያ መደረጉን አስታውቆ፣ ከታኅሳስ 3 ቀን 2015 ዓ.ም. ጀምሮ ተቀባይነት በሚያገኙ የጉምሩክ ዲክላራናሲዮኞች ላይ ማሻሻያው ተግባራዊ እንዲደረግ አሳስቧል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች