Sunday, January 29, 2023
- ማስታወቂያ -
- ማስታወቂያ -

ቤቶች ኮርፖሬሽን ጨረታ ላወጣባቸው ንግድ ቤቶች በካሬ እስከ 31 ሺሕ ብር ወርሐዊ ኪራይ ቀረበ

- ማስታወቂያ -

ተዛማጅ ፅሁፎች

  • ‹‹እንደዚህ ዓይነት ዋጋ የሚያቀርቡ ይከራያሉ የሚል ግምት የለም›› ኮርፖሬሽኑ

የፌደራል ቤቶች ኮርፖሬሽን ባካሄደው አራተኛው ዙር የንግድና ድርጅት ቤቶች ኪራይ ጨረታ ላይ፣ የተሳታፊ ተጫራቾች ካቀረቧቸው ዋጋዎች መካከል ለ80.7 ካሬ ወርሐዊ ኪራይ የቀረበ 2.5 ሚሊዮን ብር ይገኝበታል፡፡ ይህም በካሬ 31,168 ብር ሲሆን፣ ኮርፖሬሽኑ ለጨረታ ካቀረባቸው 156 ቤቶች ከፍተኛውን ዋጋ ያገኘ ሆኗል፡፡

ተጫራቾች በካሬ ሜትር የሚጫረቱበትን ዋጋ አቅርበው ጨረታው የሚካሄድ ሲሆን፣ ለዚህም በመካኒሳ አካባቢ ለተገነባ አዲስ ሕንፃ መሬት ወለል ላይ ለሚገኝ የንግድ ቤት አንድ ተጫራች በካሬ 31,168 ብር ለመከራየት ባቀረቡት ሰነድ በአንደኝነት ደረጃ ተቀምጠዋል፡፡ ለዚሁ ቤት በሁለተኛነት የወጡት ሌላው ተጫራች ግለሰብ፣ ያቀረቡት 130,076 ብር፣ ወይም በካሬ 1,611 ብር ነው፡፡ ሦስተኛ የወጡት ግለሰብ ከሁለተኛው በካሬ በ110 ብር ዝቅ ያለ ዋጋ አቅርበዋል፡፡

በቦሌ ሳይት፣ በመካኒሳ ሳይትና በቶታል ተዘንዓ ሳይት ለተገነቡት ሦስት ቅይጥ የመኖሪያና ንግድ ሕንፃዎች የተካሄደው ጨረታ፣ ለንግድ ለሚሆኑት 156 ቤቶች ተጫራቾች የጨረታ ሰነዶችን ከኅዳር 19 ቀን እስከ ኅዳር 30 ቀን 2015 ዓ.ም. ድረስ በ500 ብር በመግዛት ኅዳር 30 ቀን 2015 ዓ.ም. ሰነዶቻቸውን አስገብዋል፡፡ ለጨረታው ማስከበሪያ 25,000 ብር ከሰነዶቻቸው ጋር አብረው አስገብተው የነበረ ሲሆን፣ ኮርፖሬሽኑም ሦስቱን ሳይቶች በማከታተል ታኅሳስ 1 እና 2 እንዲሁም ታኅሳስ 3 ቀን 2015 ዓ.ም. የጨረታ ሰነዶችን ከፍቶ ነበር፡፡

በመጀመሪያው ታኅሳስ 1 ቀን 2015 ዓ.ም. ተከፍቶ በነበረው ጨረታ፣ ምድር ላይ ለሚገኝና የቤት ቁጥሩ 695/002 የሆነ 155 ካሬ ላይ ላረፈ የንግድ ቤት 1.9 ሚሊዮን ብር ወርሐዊ ኪራይ ክፍያ የቀረበ ሲሆን፣ ይህም በካሬ 12,504 ብር ይሆናል፡፡ ለዚሁ ቤት የቀረበ ሌላ ጨረታ በሁለተኛነት የተቀመጡት አንደኛው ካቀረቡት ከ1.5 ሚሊዮን ብር በላይ ያንሳል፡፡ በሦስተኛ ደረጀ የተቀመጡ ተጫራች ደግሞ 290,214 ብር ወርሐዊ ኪራይ አቅርበዋል፡፡

በቀጣዩ ቀን መካኒሳ የሚገኘው ሕንፃ የቀረበ ሲሆን ለ80 ካሬ 2.5 ሚሊዮን ብር ኪራይ የቀረበውም በዚህ ሳይት ነው፡፡ በዚህ ሕንፃ ላይ ከቀረቡት ሌሎች ንግድ ቤቶችም ከፍተኛ ዋጋ ቀርቦላቸው ነበር፡፡ በ34 ካሬ ላይ ላረፈ ንግድ ቤት 439,701 ብር (በካሬ 12,852 ብር) ቀርቦ የነበረ ሲሆን፣ ለዚህ ቤት ያቀረቡት ወርሐዊ ኪራይ ዋጋ 35,783 ብር ነው፡፡ ሦስተኛውም ከሁለተኛው ጋር የተቀራረበ ዋጋ ነበር ያቀረቡት፡፡

በመካኒሳው ሳይት ለጨረታ ከቀረቡት 66 ንግድ ቤቶች ውስጥ ሌሎች ተጨማሪ ሦስት ቤቶችም በካሬ ከ7,198 እስከ 8,887 ብር ድረስ የኪራይ ዋጋ ቀርቦላቸው ነበር፡፡ የቦሌው ቅርንጫፉ ላይ የቀረቡት ቤቶች 76 ሲሆኑ፣ የቶታል ተዘንዓ አካባቢ ላይ የቀረቡት ደግሞ 14 ንግድ ቤቶች ናቸው፡፡

ስማቸው እንዲጠቀስ ያልፈለጉ አንድ የኮርፖሬሽኑ ኃላፊ ከሪፖርተር ለቀረበላቸው ጥያቄ ምላሽ ሲሰጡ፣ የተጋነነ ዋጋ የሚቀርብላቸው ቤቶች ይከራያሉ የሚል ግምት እንደሌላቸውና በአንደኝነት የሚወጡት የማይከፍሉ ከሆነ ሁለተኛ ለሚወጣው እንደ ጨረታው ሒደት ዕድል እንደሚሰጥ ተናግረዋል፡፡

‹‹ተጫርቶ መከራየት የፈለገ አሥር ሚሊዮን ብርም በማቅረብ ውድድር ውስጥ መግባት ይችላል፡፡ ይኼ ግን እስካልከፈሉ ትክክለኛ የኪራይ ዋጋውን አያሳይም፤›› ሲሉ ኃላፊው ተናግረዋል፡፡

ተጫራቾች ለጨረታ ማስከበሪያ የሚከፍሉት 25,000 ብር ሲሆን አንደኛ ወጥተው ካልከፈሉ ወይም ካልቻሉ ሊወሰድባቸው የሚችለው ይህ 25,000 ብር ብቻ እንደሆነ ኃላፊው አክለው ገልጸዋል፡፡ በኮርፖሬሽኑ ሦስተኛ ዙር ጨረታ ጊዜም እንደዚህ የተጋነነ ዋጋ ለንግድ ቤቶች ቀርቦ አንደኛ የወጡት በሲፒኦ የሚያሲዙትን 25,000 ብር እዚያው በማስቀረት ከጨረታ የመውጣት ሒደት ተከስቶ እንደነበር ኃላፊው ተናግረዋል፡፡

‹‹በባለፈው የጨረታ ጊዜም ይህ ተከስቶ የነበረና አንደኛ የወጡት ሳይከራዩ ቀርቶ ለሁለተኛው ዕድሉ ተሰጥቶ ያውቃል፤›› በማለት ተናግረዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች