Sunday, February 5, 2023
- Advertisment -
- Advertisment -

ሰላም አደፍራሾች ከአስከፊው ድርጊታቸው ይታቀቡ!

ለሐሳብ ነፃነት ክብር ቢሰጥ ኖሮ ኢትዮጵያ ለበርካታ ዓመታት ግጭት ውስጥ አትዘፈቅም ነበር፡፡ ልዩነትን በሐሳብ ሙግት የማስተናገድ ባህል ባለመኖሩ ግን ከሰላማዊ ክርክር ይልቅ ዱላ ይበረታል፡፡ ለሐሳብ ነፃነት የሚሰጠው ክብርና ፍላጎት ዝቅተኛ በመሆኑ፣ በየዘመኑ በኢትዮጵያ የፖለቲካ ምኅዳር ውስጥ የሚውረገረጉ ብዙዎቹ ፖለቲከኞች ቅርበታቸው ለፍጥጫ ነው፡፡ በሐሳብ ልዩነት ላይ በሰከነ መንገድ ከመነጋገር ይልቅ በሐሳብ የሚለዩትን ስም ማጥፋት፣ ማሳደድ፣ ማሰርና መግደል ነው የለመዱት፡፡ ይህ ችግር የመንግሥት ሥልጣን በሚቆናጠጡት ላይ ቢበረታም፣ ሥልጣን ለመያዝ በሚራኮቱ ብዙዎቹ ፖለቲከኞች ዘንድም በስፋት ይንፀባረቃል፡፡ በዚህም የተነሳ የፖለቲካ ምኅዳሩ የሰላም አደፍራሾች መናኸሪያ ከመሆኑም በተጨማሪ፣ ጥቅም እስከተገኘበት ድረስ ለታሪካዊ ጠላቶች በመገዛት አገርን ማተራመስ የተለመደ ተግባር ከሆነ ሰነባብቷል፡፡ የኢትዮጵያ ሕዝብም እከሌ ከእከሌ ሳይባል በዚህ ሳቢያ የመከራ ገፈት ቀማሽ ሆኗል፡፡ የፖለቲካ ሥልጣን ለመያዝም ሆነ ጥቅም ለማጋበስ ሲባል ሰላማዊ የሐሳብ ክርክር ሳይሆን ማስፈራራትና ዕርምጃ መውሰድ ልማድ በመደረጉ፣ ኢትዮጵያ የሰላም አደፍራሾች መፈንጫ ሆናለች፡፡ ሰላም አደፍራሾች ጭር ሲል ስለማይወዱ ምክንያት እየፈለጉ አገርና ሕዝብ እያመሱ ነው፡፡

በኢትዮጵያ ወቅታዊ ነባራዊ ሁኔታዎች ላይ በመመሥረት ሰላም አደፍራሾች ለምን ከየአቅጣጫው መንቀሳቀስ ጀመሩ ሲባል፣ ኢትዮጵያ ዘላቂ ሰላምና ዋስትና ያለው ዴሞክራሲያዊ ሥርዓት እንዳትገነባ በታሪካዊ ጠላቶችም ሆነ በሌሎች ሴራ መሆኑን ብዙዎች ይስማሙበታል፡፡ ኢትዮጵያ በአፍሪካ ቀንድ ውስጥ ብቻ ሳይሆን በመላው አፍሪካ ሊኖራት የሚገባትን የክብር ሥፍራ መያዝ እንደሚገባት በአገር ወዳዶች ጥረት ሲደረግ፣ በአካባቢው ጥቅማቸው ሊነካ ከሚችል ኃያላን ጀምሮ እስከ ግብፅና መሰሎቿ ድረስ በርካታ ሴራዎችን ያዳውራሉ፡፡ በመንግሥት መዋቅር ውስጥ ያሉና ከመዋቅሩ ውጪ ሆነው የአገርን ጥቅምና ብሔራዊ ደኅንነት የሚያናጉ፣ የተለያዩ ምክንያቶችን እየፈለጉ በኢትዮጵያውያን መካከል ጥላቻ የሚዘሩ የሴራው ተባባሪ ናቸው፡፡ ኢትዮጵያ ከሰሜኑ አውዳሚ ጦርነት በፕሪቶሪያው የሰላም ስምምነት አማካይነት ጊዜያዊ ዕፎይታ ያገኘች በመሰለችበት ወቅት፣ ከአዲስ አበባ ከተማ እስከ ኦሮሚያ ክልል ወለጋ ዞኖች ድረስ የሚስተዋለው ሰላም አደፍራሽነት አገርን ከማናጋት ተለይቶ የሚታይ ሴራ አይደለም፡፡ ኢትዮጵያ በአፍሪካ ቀንድ የትብብር ማዕከል እንዳትሆን፣ የተፈጥሮ ፀጋዎቿን አልምታ እንዳታድግ፣ በዓባይ ውኃ ላይ ያላትን ተጠቃሚነት ለማደናቀፍና ለመሳሰሉት እኩይ ሴራ ማሳኪያ አንዱ ዘዴ ሰላም መንሳት ነው፡፡

ኢትዮጵያን ከአንዱ ችግር ወደ ሌላው በማንከባለል ሰላም አልባ ለማድረግ በሚደረገው የታሪካዊ ጠላቶች ሴራ ተባባሪ የሚሆኑት ደግሞ፣ ከተፀነሱበት ጊዜ ጀምሮ በአገር ጥላቻና ቂም ተኮትኩተው ያደጉ የጥፋት ትርክት ሰለባዎች ናቸው፡፡ እነዚህ አገር ሰላም ስትሆን በመንግሥትና በፓርቲ መዋቅር ውስጥ ሰርገው በመግባት መጠነ ሰፊ ዝርፊያ መፈጸምና ማስፈጸም፣ መሬት ማስወረር፣ የመልካም አስተዳደር ዕጦት በመፍጠር ተገልጋዮችን ማስመረር፣ ፍትሕን እንደ ሸቀጥ መቸብቸብ፣ በሕዝብ መካከል ሊኖር የሚገባውን መተማመን ማጥፋት፣ ንፁኃንን ማሰቃየት፣ የመንግሥትና የፓርቲን ሥራ በማደባላለቅ ግራ ማጋባት፣ እጃቸው የገባ የአገር ሚስጥር ማባከንና በመሳሰሉት የክፋት ድርጊቶች ለሰላም መደፍረስ የበኩላቸውን ሚና ይጫወታሉ፡፡ ተጠያቂነት እንዳይኖርባቸውም ኔትወርካቸውን አጠናክረው ስለሚንቀሳቀሱ፣ በማኅበራዊ የትስስር ገጾች ተከፋይ ቀስቃሾቸቸውን በማሰማራት ጭምር የተፅዕኖ አድማሳቸውን ያሰፋሉ፡፡ በማኅበረሰቦች ውስጥም የብሔርና የእምነት ተራ ልዩነቶችን በመለጠጥ ከፋፋይ አጀንዳዎችን ይነዛሉ፡፡ በውጭም ሆነ በአገር ውስጥ ሆነው አመፃ ከሚያራምዱ ኃይሎች ጋር በመተባበር የጭካኔ ድርጊቶችን ያስፈጽማሉ፡፡

ቁጥራቸው ከ120 ሚሊዮን በላይ እንደሚሆኑ ከሚታሰቡ ኢትዮጵያውያን መካከል አብዛኞቹ ምግብ ለማግኘት ከባድ ፈተና በሚያዩባት ኢትዮጵያ ውስጥ፣ አንዱን ምስኪን ኢትዮጵያዊ የሌላው ምስኪን ጠላት አድርጎ በመፈረጅ ማንነትን መሠረት ያደረጉ ጭፍጨፋዎችን ያበረታታሉ፡፡ ከጭፍጨፋ የተረፉ በርካታ ሚሊዮኖች ከቀዬአቸው ተፈናቅለውና ሜዳ ላይ ወድቀው ለአስቸኳይ ጊዜ ዕርዳታ ጠባቂነት ተዳርገው፣ በጦርነቱ ምክንያት ከፍተኛ ቁጥር ያላቸው የጋራ መሠረተ ልማቶችና የግለሰብ ንብረቶች ወድመው፣ ወገኖቻቸውን በጦርነቱና በተለያዩ ሥፍራዎች በተፈጸሙ ጥቃቶች ያጡ በጣም በርካቶች ለአካላዊና ለሥነ ልቦናዊ ጉዳት ተዳርገውና ለመግለጽ የሚያስቸግሩ የሰብዓዊ መብት ጥሰቶች ብዙዎችን ተስፋ ቢስ አድርገው አገር የሰላም ያለህ ብትልም ለማዳመጥ አይፈልጉም፡፡ ነገር ግን ድብቅ ፍላጎታቸውን በተገኘው አጋጣሚ ለማሳካት ስለሚፈልጉ ደግሞ ‹‹የትም ፍጪው ዱቄቱን አምጪው›› በሚባለው የክፉዎች መርህ፣ ኢትዮጵያ ውስጥ አንፃራዊ ሰላምና መረጋጋት እንዳይፈጠር ምክንያት እየፈለጉ ግጭት ለመቀስቀስ ማናቸውንም ድርጊቶች ከመፈጸም አይመለሱም፡፡ በዚህም ኢትዮጵያን ለማዳከም ከሚፈልጉ ታሪካዊ ጠላቶች ጋር እየተባበሩ ሰላም ያደፈርሳሉ፡፡

እዚህ ላይ መዘንጋት የሌለበት ትናንት ጠላት ሆነው ትርምስ ሲፈጥሩ የነበሩ ዛሬ ወዳጅ ሆነው ሲቀርቡ መታየታቸው ነው፡፡ እነሱ ለረዥም ጊዜ የተካኑበት ‹‹ዘላቂ ጥቅም እንጂ ዘላቂ ጠላትና ወዳጅ የሚባል የለም›› የሚሉት መርህ፣ በዓለም ዙሪያ በሚሊዮኖች መቃብር ላይ ከትናንት ባላንጣዎቻቸው ጋራ ‹‹ለጤናችን›› እያሉ መለኪያ እንዲያጋጩ አይከለክላቸውም፡፡ የትናንት ባላጋራ እስከገበረና ፍላጎታቸውን ለማሟላት ቃል እስከገባ ድረስ፣ የትናንት ወዳጃቸውን ገለል ለማድረግ ዓይናቸውን አያሹም፡፡ እነሱ ዘንድ ዋናው ቁምነገር ‹‹እኛ እስከመሰለን ድረስ በጨረታው አንገደድም›› የሚለው ነው፡፡ አሜሪካም ሆነች አውሮፓ በዚህ የተካኑ በመሆናቸው፣ ወዳጅነታቸውም ሆነ ጠላትነታቸው በብልኃት ነው መያዝ ያለበት፡፡ በማንም አገር የውስጥ ጉዳይ ጣልቃ ያለ መግባት ዓለም አቀፋዊው መርህ እነሱ በሚፈልጉት ጊዜ ሊጣስ እንደሚችል ዋናው ማሳያ፣ ‹‹የሰብዓዊ መብት አከባበር›› ጥያቄ ማንሳት መሆኑን ማንም አይስተውም፡፡ የሚደግፉት መንግሥት ዜጎቹን መፈጠራቸውን እስኪጠሉ ድረስ ቀጥቅጦ ሲገዛ ገላማጭ የለውም፡፡ የሚጠሉት ሲሆን ደግሞ ጭው ካለ በረሃ ውስጥ ንፁህ አውጥቶ ዜጎቹን ቢያጠጣ እንኳን እንደ ሰይጣን ይፈረጃል፡፡ በውስጥ የተደራጁ ጠላቶቹ ዕገዛ ተደርጎላቸው የመጨረሻው ስንብትም ይደረግለታል፡፡

የሙአመር ጋዳፊን የምድር ገነት ሊቢያና የአሁኗን የምድር ሲኦል ሊቢያ፣ እንዲሁም የሳዳም ሁሴንን የተረጋጋችና የታፈረች ኢራቅንና የአሁኗን ምስቅልቅል ኢራቅ፣ እንዲሁም ሌሎች በአካባቢው የወደሙ አገሮችን የሚያስታውስ ማንም ሰው የሰላም መደፍረስ በምን ምክንያት እንደሚከሰት አይስተውም፡፡ እዚህ ላይ እየተነጋገርን ያለነው አምባገነኖችን በመሸከም አገርን ወደ ቀጣዩ ትውልድ ስለማስተላለፍ አይደለም፡፡ ነገር ግን አገርን በሥርዓት እየገነቡ ልማትን በማስፋፋት አንገትን ቀና ለማድረግ፣ እንደ ኢትዮጵያ ያሉ አገሮች ከሌሎች ወድቀት መማር እንዳለባቸው ነው፡፡ በኢትዮጵያ ሁሉንም ዜጎች ያለ አድልኦ በእኩልነት የሚያስተናግድ ዴሞክራሲያዊ ሥርዓት መገንባት ይቻላል፡፡ ኅብረ ብሔራዊቷ ኢትዮጵያ ከብሔርና መሰል ጭቅጭቆች ተላቃ ፍትሕ፣ እኩልነትና ነፃነት የሚያስገኝ ፌዴራላዊ ሥርዓት መገንባት ትችላለች፡፡ ለዚህ ግንባታ ድጋፍ ማድረግ የሚችሉ በተለያዩ መስኮች አንቱ የተባሉ የተማሩና የተመራመሩ በርካታ ኢትዮጵያውያን በአገር ውስጥም በውጭም አሉ፡፡ ሰላማዊትና ዴሞክራሲያዊት ኢትዮጵያ በሁሉም ዜጎቿ ትብብር እንድትገነባ የሚያግዙ ዕውቀት ያላቸው፣ ልምድ ያካበቱና በሥነ ምግባራቸው የተመሰከረላቸው በርካታ ልጆቿ እያሉ፣ ለአገር ክብርና ፍቅር የሌላቸው የጠላት ተላላኪዎች በተደጋጋሚ ሰላም እንዲያደፈርሱ መፈቀድ የለበትም፡፡ ሰላም አደፍራሾች ከአስከፊው ድርጊታቸው መታቀብ አለባቸው!

በብዛት የተነበቡ ፅሁፎች

ከውጭ ይገቡ የነበሩ 38 ዓይነት ምርቶች እንዳይገቡ ዕግድ ተጣለ

የኢትዮጵያ ብሔራዊ ባንክ 38 ከውጪ የሚገቡ ምርቶች ላይ ዕገዳ...

የአየር መንገድ ተጓዦች በሻንጣ የሚያስገቡትን የልብስና የጫማ ብዛት የሚገድብ ረቂቅ መመርያ ተዘጋጀ

ከቀረጥ ነፃ ይገቡ የነበሩ ዕቃዎች 87 በመቶ እንዲቀንሱ ተደርጓል መንገደኞች...

አሜሪካ ሕወሓትን በማሳመንና በመጫን በሰላም ሒደቱ ትልቅ ሚና መጫወቷን የኢትዮጵያ ዋና ተደራዳሪ አስታወቁ

የተመድና የአውሮፓ ኅብረት አበርክቶ አሉታዊ እንደነበር ጠቁመዋል በመንግሥትና በሕወሓት መካከል...

ኢትዮጵያ በ2023 የሚኖራት የውጭ ምንዛሪ ክምችት ለ18 ቀናት ግዢ መፈጸሚያ ብቻ እንደሚሆን አይኤምኤፍ ተነበየ

ኢትዮጵያ በ2023 የሚኖራት የውጭ ምንዛሪ ክምችት ለ0.6 ወር ወይም...
- Advertisment -

ትኩስ ፅሁፎች

የኢትዮጵያ ኦርቶዶክስ ተዋሕዶ ቤተ ክርስቲያንና የመንግሥት ውዝግብ

የጠቅላይ ሚኒስትር ዓብይ አህመድ (ዶ/ር) መንግሥት ባለፉት አራት ዓመታት...

የኢትዮጵያ ካፒታል ገበያ ምሥረታ ዝግጅቶችና ከገበያው የሚጠበቁ ዕድሎች

ኢትዮጵያ ከ50 ዓመት በኋላ ዳግም የምታስጀምረውን የካፒታል ገበያ ዘመኑን...

አዲሱ የብሔራዊ ባንክ ገዥ ትኩረት የሚያደርጉባቸውን ቀዳሚ ጉዳዮች ይፋ አደረጉ

አዲሱ የኢትዮጵያ ብሔራዊ ባንክ ገዥ ትኩረት አድርገው የሚሠሩባቸውን ቀዳሚ...

መንግሥት የደቡብ ሱዳን ታጣቂዎች ድንበር ጥሰው የሚያደርሱትን ጥቃት እንዲያስቆም ተጠየቀ

የሕዝብ ተወካዮች ምክር ቤት የውጭ ግንኙነትና የሰላም ጉዳዮች ቋሚ...

አዲስ ሲኖዶስ አቋቁመዋል በተባሉና በኦሮሚያ መንግሥት ላይ ክስ ለመመሥረት...
spot_img

ተዛማጅ ፅሁፎች

ኢትዮጵያ ከገባችበት አረንቋ ውስጥ በፍጥነት ትውጣ!

የአገር ህልውና ከሕዝብ ሰላምና ደኅንነት ጋር በእጅጉ የተቆራኘ ነው፡፡ አገር ሰላም ውላ ማደር የምትችለው ደግሞ የሕዝብ ደኅንነት አስተማማኝ ሲሆን ነው፡፡ ሕዝብና መንግሥት በአገር ህልውና...

የፈተናው ውጤት የፖለቲካው ዝቅጠት ማሳያ ነው!

በ12ኛ ክፍል መልቀቂያ ፈተና ከአጠቃላይ ተፈታኞች ውስጥ 3.3 በመቶ ያህሉ ብቻ ማለፋቸው፣ የአገሪቱን የትምህርት ጥራት ደረጃ በሚገባ ያመላከተ መስተዋት እንደሆነ አድርጎ መቀበል ተገቢ ነው፡፡...

የምግብ ችግር አገራዊ ሥጋት ስለደቀነ ፈጣን ዕርምጃ ይወሰድ!

ኢትዮጵያ ውስጥ የሰው ልጆችን አቅም በብርቱ እየፈተኑ ያሉ በርካታ ችግሮች አሉ፡፡ ከችግሮቹ ብዛት የተነሳ አንዱን ከሌላው ለማስቀደም የማይቻልበት ደረጃ ላይ የተደረሰ ቢሆንም፣ የምግብና የሰላም...