Sunday, January 29, 2023
- ማስታወቂያ -
- ማስታወቂያ -

ባለፉት አምስት ወራት ኤክስፖርት ከተደረገ ቡና 615 ሚሊዮን ዶላር መገኘቱ ተገለጸ

- ማስታወቂያ -

ተዛማጅ ፅሁፎች

በዓመቱ መጨረሻ ሁለት ቢሊዮን ዶላር ይገኝበታል ተብሎ ከሚጠበቀው የቡና ኤክስፖርት፣ ባለፉት አምስት ወራት 615 ሚሊዮን ዶላር ገቢ መገኘቱን የኢትዮጵያ ቡናና ሻይ ባለሥልጣን አስታወቀ፡፡

የቡናና ሻይ ባለሥልጣን ምክትል ዋና ዳይሬክተርና የግብይት ዘርፍ ኃላፊ አቶ ሻፊ ዑመር፣ ባለፉት አምስት ወራት ከ109,000 ቶን በላይ የቡና ምርት ለውጭ ገበያ መቅረቡን ተናግረዋል፡፡

በተጠቀሰው ጊዜ ውስጥ አገሪቱ ለውጭ ገበያ ካቀረበችው ቡና 615.4 ሚሊዮን ዶላር ገቢ መገኘቱን ለሪፖርተር የገለጹት አቶ ሻፊ፣ ወቅቱ ምርት በብዛት ወደ ገበያ የሚቀርብበት ባይሆንም ከቀደሙት ዓመታት የተሻለ ውጤት የተገኘበትና ካለፈው ዓመት ተመሳሳይ ወቅት ጋር ሲነፃፃር የ100 ሚሊዮን ዶላር ብልጫ እንዳለው አስታውቀዋል፡፡

ኢትዮጵያ በተያዘው የበጀት ዓመት የመጀመሪያዎቹ ሦስት ወራት ለውጭ ገበያ ያቀረበችው የቡና መጠን ከታቀደው ዕቅድ ያነሰ ቢሆንም፣ የተገኘው ገቢ ከዕቅድ በላይ መሆኑን ባለሥልጣኑ ማስታወቁ ይታወሳል፡፡

ጀርመን፣ ሳዑዲ ዓረቢያ፣ ቤልጂየም፣ አውስትራሊያና ጃፓን የቡና ምርቱ ከተላከባቸው አገሮች ተጠቃሾቹ መሆናቸው ተጠቅሶ፣ የቻይና ገበያ ሌላው መዳረሻ ከመሆኑ ባሻገር ወደ ኢንዶኔዥያ ቡና መላክ መጀመሩ ለተገኘው ገቢው መጨመር አስተዋጽኦ ማድረጉ ተገልጿል፡፡

ኢትዮጵያ በ2014 ዓ.ም. ወደ የተለያዩ የዓለም አገሮች ከላከችው 300,000 ቶን የቡና ምርት 1.4 ቢሊዮን ዶላር ማግኘቷ የሚታወስ ሲሆን፣ ዘንድሮ 360,000 ቶን ቡና ወደ ውጭ በመላክ ሁለት ቢሊዮን ዶላር ገቢ ለማግኘት መታቀዱን የቡናና ሻይ ባለሥልጣን አስታውቋል፡፡

የገበያ ልማትና ቁጥጥር ዘርፍ ምክትል ዋና ዳይሬክተር ከዚህ ቀደም እንዳስታወቁት፣ ከዘርፉ የሚገኘውን የገቢ ጭማሪ ለማስቀጠል መሥሪያ ቤታቸው ሁለት ዓይነት ስትራቴጂዎችን ይዞ እየተንቀሳቀሰ ነው፡፡ የመጀመሪያው ነባር ወይም ትልልቅ ገዥ የሆኑ አገሮች ገበያ ላይ መቆየት ሲሆን፣ በሌላ በኩል አዳዲስ ገበያ ማፈላለግ የሚለው ይገኝበታል፡፡ በተለይም ወደ እስያና የሩቅ ምሥራቅ አገሮች በማምራት ቻይና፣ ታይዋን፣ ሩሲያ በኢትዮጵያ የቡና ገዥ አገሮች ዝርዝር ውስጥ እንዲካተተቱ በርካታ ሥራዎች መከናወናቸው ተገልጿል፡፡

ኢትዮጵያ ዓምናን ጨምሮ ከቡና ኤክስፖርት ከፍተኛ ገቢ እያገኘች ቢሆንም፣ በአንፃሩ ቡናን ወደ ውጭ የሚልኩ የኅብረት ሥራ ማኅበራት የሚያቀርቡት ምርትና ያላቸው የገበያ ድርሻ ከጊዜ ወደ ጊዜ መቀነሱ በቅርቡ በደቡብ ምዕራብ ኢትዮጵያ ሚዛን አማን ከተማ በተደረገ የቡና ምርት ልማትና ግብይት ሲምፖዚየም መገለጹ አይዘነጋም፡፡

ምርት ወደ ውጭ የሚልኩ የኅብረት ሥራ ማኅበራት የምርት መጠን መቀነስና መቆራረጥ ምክንያትን ለመለየት 25 በሚደርሱ የኅብረት ሥራ ማኅበራት ላይ የኢትዮጵያ ኅብረት ሥራ ኮሚሽን የዳሰሳ ጥናት ማካሄዱ የሚታወስ ሲሆን፣ ከተገኙ ውጤቶች መካከል ማኅበራቱ መሰብሰብ ከሚችሉት ምርት መካከል 65 በመቶ ብቻ እንደሚሰበስቡና ለዚህም በምርት መሰብሰቢያ ወቅት በቂ ፋይናንስ አለማግኘት፣ አስተማማኝ የገበያ መዳረሻ ችግርና የዋጋ መዋዠቅ ተጠቃሾቹ መሆናቸው ተጠቅሶ ነበር፡፡

በሚዛን አማን ከተማ በተከናወነው ሲምፖዚየም የተሳፉት የቡናና ሻይ ባለሥልጣን፣ የውጭ ጉዳይ ሚኒስቴር፣ የግብርና ሚኒስቴርና ቡና ወደ ውጭ የሚልኩ ማኅበራት የጋራ ፎረም በመመሥረት ችግሩን ወደ ዕቅድ በመቀየር ለይቶ ለመፍታት ስምምነት ላይ መድረሳቸው ይታወሳል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች