Sunday, February 5, 2023
- Advertisement -
- Advertisement -
ማኅበራዊበአማራ ክልል የገጠር መሬትን በስጦታ ማስተላለፍ ለጊዜው ታገደ

በአማራ ክልል የገጠር መሬትን በስጦታ ማስተላለፍ ለጊዜው ታገደ

ቀን:

የአማራ ክልል መሬት ቢሮ በከተሞች ዙሪያ ገጠር አካባቢዎች በከተማ የአስተዳደር ፕላን ወሰን በተጠቃለለ የእርሻ መሬቶች ላይ ሕገወጥነት በመበራከቱ፣ በስጦታና መሰል ተግባራት የሚደረግ የመሬት ማስተላለፍ አገልግሎትን በጊዜያዊነት አገደ፡፡

ቢሮው ባደረገው ክትትልና ግምገማ በከተሞች ዙሪያ ያለ የገጠር መሬት አገልግሎት ተግባራት፣ ለከፍተኛ ብክነትና የአስተዳደር ብልሽት እየተጋለጠ መሆኑ በግልጽ እንደተደረሰበት አስታውቋል፡፡

ድርጊቱ የከተሞች መስፋፋትና የኢንዱስትሪ ልማትን የሚገታ፣ እንዲሁም መሬትን በቁጠባ የመጠቀምና ብክነትን የመከላከል ዘላቂ የሆነ የአርሶ አደር ባለይዞታ ጥቅምን አስከብሮ በመሄድ በኩል፣ በክልሉ ከፍተኛ ችግር በመፍጠር ላይ እንደሚገኝ፣ በመሬት ቢሮ ኃላፊው አቶ ሲሳይ ዳምጤ ተፈርሞ ለሁሉም ዞኖችና ለሪጆፖሊ መሬት መምርያዎች የተላለፈው ሰርኩላር ያስረዳል፡፡

በጥናት ላይ ተመሥርቶ ግልጽ የሆነ አሠራር እስኪወርድ ድረስ ማንኛውም ከገጠር መሬት ስጦታ ጋር የተያያዘ አገልግሎትን ቢሮው ማገዱን ገልጾ፣ የዞን መምርያዎች በሥራቸው ላሉ የገጠር ወረዳ መሬት ጽሕፈት ቤቶች የተላከላቸውን ሰርኩላር መነሻ በማድረግ ተግባራዊ እንዲደረጉ በጥብቅ አሳስቧል፡፡

በክልሉ ባሉ የገጠር መሬት ይዞታ ባለባቸው የገጠርና ከተማ አስተዳደሮች የገጠር መሬትን አገልግሎት የማሻሻል ሥራ በመከናወን ላይ ቢገኝም፣ ከቅርብ ጊዜ ወዲህ በክልሉ ገጠር መሬት አስተዳደርና አጠቃቀም አዋጅ 252/09 አንቀጽ 16 እና እሱን ተከትሎ በወጣው ደንብና መመርያ መሠረት በከተሞች ዙሪያ ያለን የገጠር መሬት ከአዋጁ፣ ከደንብና ከመመርያ ውጪ ሕጉን በተዛባ መንገድ በመተርጎም በመፈጸም በኩል ከፍተኛ የሆነ ችግር እየገጠመ ነው ብሏል፡፡

ከአማራ ክልላዊ መንግሥት የተሻሻለው የገጠር መሬት አስተዳደርና አጠቃቀም አዋጅ ቁጥር 252/2009 ዓ.ም. አንቀጽ 16 ላይ እንደተገለጸው፣ ማንኛውም የገጠር መሬት ባለይዞታ የይዞታም ሆነ የመጠቀም መብቱን በክልሉ ውስጥ ለሚኖርና በአዋጁ ላይ ከተመለከቱ መመዘኛዎች መካከል ቢያንስ አንዱን ለሚያሟላ ሰው በስጦታ ማስተላለፍ ይቻላል፡፡

ማንኛውም የገጠር መሬት ባለ ይዞታ፣ ‹‹በግብርና ሥራ ለሚተዳደር ወይም በዚሁ ሙያ መተዳደር ለሚፈልግ ልጁ ወይም የልጅ ልጁ ወይም ለማንኛውም ሌላ የቤተሰቡ አባል›› አንደኛው በስጦታ የሚተላለፍበት መመዘኛ ሲሆን፣ ‹‹መረጃውን በጽሑፍ አረጋግጦ እስከሰጠ ድረስ በወቅቱ እየጦረው ላለና አገልግሎኛል ወይም እያገለገለኝ ነው ብሎ ላመነውና በግብርና ሥራ ለሚተዳደር ወይም በዚሁ ሙያ መተዳደር ለሚፈልግ ሌላ ማንኛውም ሰው››፣ ሌላው የገጠር መሬት በስጦታ ለማስተላለፍ መመዘኛ መሆኑ ተመላክቷል፡፡

የአማራ ክልል መሬት ቢሮ እንዳስታወቀው፣ ከታኅሳስ 7 ቀን 2015 ዓ.ም. ጀምሮ ለተላለፈው ደብዳቤ መሻሪያ እስካልደረሰ ድረስ የተሰጠ አገልግሎት በተቋማዊ አሠራር ሕጋዊ ተቀባይነት የለውም፡፡ ሰርኩላሩን ተላልፈው በሕገወጥ ድርጊት በቀጥታም ይሁን በተዘዋዋሪ ተሳታፊ የሆኑ ተቋማትና ባለሙያዎች በሕግ የሚያስጠይቃቸው መሆኑን አሳስቧል፡፡

ሪፖርተር በአማራ ክልል ከገጠር መሬት ስጦታ ጋር ተያይዞ ስለታገደው አገልግሎት ተጨማሪ መረጃ ለማግኘት፣ ወደ አማራ ክልል መሬት ቢሮ በተደጋጋሚ ላደረገው የስልክ ጥሪ ምላሽ ማግኘት አልቻለም፡፡

spot_img
- Advertisement -

ይመዝገቡ

spot_img

ተዛማጅ ጽሑፎች
ተዛማጅ

የኢትዮጵያ ኦርቶዶክስ ተዋሕዶ ቤተ ክርስቲያንና የመንግሥት ውዝግብ

የጠቅላይ ሚኒስትር ዓብይ አህመድ (ዶ/ር) መንግሥት ባለፉት አራት ዓመታት...

የኢትዮጵያ ካፒታል ገበያ ምሥረታ ዝግጅቶችና ከገበያው የሚጠበቁ ዕድሎች

ኢትዮጵያ ከ50 ዓመት በኋላ ዳግም የምታስጀምረውን የካፒታል ገበያ ዘመኑን...

አዲሱ የብሔራዊ ባንክ ገዥ ትኩረት የሚያደርጉባቸውን ቀዳሚ ጉዳዮች ይፋ አደረጉ

አዲሱ የኢትዮጵያ ብሔራዊ ባንክ ገዥ ትኩረት አድርገው የሚሠሩባቸውን ቀዳሚ...

መንግሥት የደቡብ ሱዳን ታጣቂዎች ድንበር ጥሰው የሚያደርሱትን ጥቃት እንዲያስቆም ተጠየቀ

የሕዝብ ተወካዮች ምክር ቤት የውጭ ግንኙነትና የሰላም ጉዳዮች ቋሚ...